இன்றும், நாளையும்..!! முதியோர், மாற்றுத்திறனாளிகளின் வீடுகளுக்கே செல்லும் ரேஷன் பொருட்கள்..!!

முதலமைச்சரின் தாயுமானவர் திட்டத்தின் கீழ் 65 வயதுக்கு மேற்பட்ட முதியோர் மற்றும் மாற்றுத்திறனாளிகளின் வீட்டுக்கு சென்று பொது வினியோகத்திட்ட பொருள்கள் வினியோகம் செய்யப்பட்டு வருகின்றன. அதன்படி முதியோர் மற்றும் மாற்றுத்திறனாளிகளின் வசதிக்காக சென்னை முழுவதும் 990 ரேஷன் கடைகள் இன்று (செவ்வாய்க்கிழமை) மற்றும் நாளை (புதன்கிழமை) ஆகிய இரு நாட்களும் வீடு தேடி அத்தியாவசியப் பொருட்களை வினியோகம் செய்ய உத்தரவிடப்பட்டுள்ளது.

கூட்டுறவுத் துறையின் கீழ் செயல்படும் இந்த ரேஷன் கடைகள், முதல்-அமைச்சர் தாயுமானவர் திட்டத்தின் கீழ் பயன்பெறும் முதியோர் மற்றும் மாற்றுத்திறனாளிகளுக்கு சிரமமின்றி உதவும் வகையில் இந்த சிறப்பு ஏற்பாடு செய்யப்பட்டுள்ளது. அண்ணாநகர், ஆலந்தூர், பெருங்குடி, சோழிங்கநல்லூர், தேனாம்பேட்டை, அடையாறு, திருவொற்றியூர், மணலி, மாதவரம், தண்டையார்பேட்டை, ராயபுரம், திரு.வி.க. நகர், அம்பத்தூர், கோடம்பாக்கம், வளசரவாக்கம், பல்லாவரம், குரோம்பேட்டை மற்றும் தாம்பரம் ஆகிய 18 மண்டலங்களில் உள்ள அனைத்து ரேஷன் கடைகளும் இந்தத் திட்டத்தில் ஈடுபடுத்தப்படுகின்றன.

இதுகுறித்து சென்னை மண்டல கூட்டுறவுச் சங்கங்களின் கூடுதல் பதிவாளர் பாபு வெளியிட்ட அறிக்கையில், “முதியவர்கள் மற்றும் உடல் ஊனமுற்றோர் வெளியே சென்று வரிசையில் நிற்காமல், தங்கள் வீட்டிலேயே அரிசி, சர்க்கரை, பருப்பு, எண்ணெய் உள்ளிட்ட அத்தியாவசியப் பொருட்களைப் பெறும் வகையில் இந்த ஏற்பாடு செய்யப்பட்டுள்ளது. தாயுமானவர் திட்டத்தின் கீழ் பதிவு செய்யப்பட்ட பயனாளிகள் இந்த வாய்ப்பை தவறாமல் பயன்படுத்திக் கொள்ள வேண்டும்” என்று கேட்டுக் கொண்டார்.

இதையும் படிங்க: சட்டையை சுழற்றிய விஜய்... தமிழகம் முழுவதும் ரேஷன் கடைகளுக்கு பறந்த அதிரடி உத்தரவு...!

இந்தத் திட்டம், கொரோனா காலத்திலிருந்து தொடர்ந்து வரும் முதியோர் நலப் பாதுகாப்பு நடவடிக்கைகளின் ஒரு பகுதியாகக் கருதப்படுகிறது. வீடு தேடி வினியோகம் செய்யும் முறை மூலம், பயனாளிகள் போக்குவரத்து சிரமம், நீண்ட வரிசை, உடல்நலக் குறைவு போன்ற பிரச்சினைகளில் இருந்து தப்பித்து, உரிய நேரத்தில் தரமான பொருட்களைப் பெற முடியும். கூட்டுறவுச் சங்கங்கள் இந்தப் பணியை திறமையாகவும், வெளிப்படையாகவும் மேற்கொள்ள அறிவுறுத்தப்பட்டுள்ளன.

ரேஷன் கடை விற்பனையாளர்கள் தங்கள் பகுதியில் உள்ள தாயுமானவர் திட்ட பயனாளிகளின் பட்டியலைப் பெற்று, அவர்களுடன் தொடர்பு கொண்டு, தேவையான பொருட்களை வீட்டுக்கு நேரடியாக எடுத்துச் செல்ல வேண்டும். இதன்மூலம் சமூகப் பாதுகாப்புத் திட்டங்களை மேலும் வலுப்படுத்தும் வகையில் அரசு நடவடிக்கை எடுத்துள்ளது.

இந்த முயற்சியானது, சென்னை நகரின் அனைத்துப் பகுதிகளிலும் வசிக்கும் ஆயிரக்கணக்கான முதியோர் மற்றும் மாற்றுத்திறனாளிகளின் வாழ்க்கையை எளிதாக்கும் என எதிர்பார்க்கப்படுகிறது. பயனாளிகள் தங்கள் ரேஷன் கார்டு மற்றும் அடையாள அட்டையை தயாராக வைத்திருக்குமாறு கூட்டுறவுத் துறை அதிகாரிகள் அறிவுறுத்தியுள்ளனர்.
 

இதையும் படிங்க: ராஜா ராஜாதான்... ராஜாங்கம் தொடரட்டும்... திமுக தலைவர் ஸ்டாலின் வாழ்த்து..!