"உயிர் தியாகம்"..! சங்கர லிங்கனார் நினைவு நாள்..!! முதல்வர் விஜய், ஸ்டாலின் வீரவணக்கம்..!

தமிழ்நாடு எனும் பெயருக்காகத் தன் இன்னுயிரையே தியாகம் செய்த வீரத்தியாகி சங்கரலிங்கனாரின் நினைவு நாளில் தமிழகத் தலைவர்கள் வீரவணக்கம் செலுத்தியுள்ளனர். முதலமைச்சர் விஜய் தனது வாழ்த்துச் செய்தியில், நமது மாநிலத்திற்குத் தமிழ்நாடு எனப் பெயர் மாற்றம் செய்ய வேண்டும் எனக் கோரிக்கை வைத்து அறவழியில் 76 நாட்கள் உண்ணாநோன்பிருந்து தன் உயிரைத் தியாகம் செய்த சங்கரலிங்கனாருக்கு வீரவணக்கம் செலுத்துவதாகத் தெரிவித்தார்.

உயிரைவிடத் தமிழினத்தின் அடையாளமே பெரிது என நிரூபித்த அவரது தியாகம் தமிழக மற்றும் இந்திய வரலாற்றில் பொன்னெழுத்துகளால் பொறிக்கப்பட வேண்டிய ஒன்று என்றும், அவரது உறுதியும் தியாகமும் என்றும் நமக்கு வழிகாட்டட்டும் என்றும் அவர் கூறியுள்ளார்.

திமுகத் தலைவர் மு.க. ஸ்டாலின் தனது செய்தியில், தமிழ்நாடு எனும் பெயருக்காக உயிரையே கொடுத்த உணர்வாளர் சங்கரலிங்கனார் நினைவு நாளை நினைவுகூர்ந்தார். வரலாற்றில் பல பெயர்கள் இருக்கலாம். ஆனால் ஒரு பெயருக்காக உயிரையே இழந்த வரலாறுதான் விருதுநகர் தந்த வீரத்தியாகி சங்கரலிங்கனாருடையது என்று குறிப்பிட்டார். தமிழ்நாட்டுக்குத் தமிழ்நாடு எனப் பெயர்சூட்ட வேண்டுமென 76 நாட்கள் உண்ணாநோன்பிருந்து இறுதியில் உயிரையே துறந்தார். ஆயினும் அன்றைய ஆட்சியாளர்கள் அவரது கோரிக்கையை நிறைவேற்றவில்லை. கழக ஆட்சி அமையும்வரை காலம் கனியவில்லை. வென்றது கழகம், வந்தார் அண்ணா, நிறைவேற்றினார் தீர்மானத்தை, தமிழ்நாடு தமிழ்நாடானது என்று அவர் நினைவுகூர்ந்தார்.

இதையும் படிங்க: தலைமை தேர்தல் ஆணையருக்கு எதிரான போராட்டத்தை புறக்கணிக்கிறதா தவெக?... செங்கோட்டையன் கொடுத்த ஷாக்கிங் விளக்கம்...!

தமிழ்நாடு பெயர்சூட்டலில் பலரின் போராட்டங்களும் திராவிட முன்னேற்றக் கழகத்தின் முயற்சிகளும் அடங்கியுள்ளன. ஆனால் இப்போராட்டத்தில் தனது இன்னுயிரையே இழக்கத் துணிந்த சங்கரலிங்கனாரின் தமிழுணர்வுக்கு ஈடு இணை ஏதுமில்லை. தமிழ்நாடு என்ற பெயர் இம்மாநிலத்தில் ஒலிக்குமட்டும் சங்கரலிங்கனாரின் புகழும் ஓயாது என்றும் தமிழ்நாடு வாழ்க என்றும் அவர் தெரிவித்தார்.

இதையும் படிங்க: ஆந்திராவில் கனக துர்க்கை கோயிலில் தரிசனம் செய்யும் சி.எம். விஜய்... அந்த அம்மனுக்கு இவ்வளவு பவரா?