கலையரசன் கைது..! தவெகவின் பாசிச செயல்.! திமுக தலைவர் ஸ்டாலின் ஆவேசம்.!!

முனைவர் கலையரசன் அவர்களை சட்டவிரோதமாகக் கைது செய்ததாக தமிழ்நாடு அரசின் செயல்பாட்டை கண்டித்து திமுக தலைவர் மு.க.ஸ்டாலின் கடுமையான கருத்து தெரிவித்துள்ளார். சென்னை வளர்ச்சி ஆராய்ச்சி நிறுவனத்தில் உதவிப் பேராசிரியராகப் பணியாற்றும் அவரது கைது செய்தியைக் கேட்டு மிகுந்த அதிர்ச்சிக்கு உள்ளானதாக அவர் குறிப்பிட்டார். அதிகாலை சீருடை அணியாத காவலர்கள் முனைவர் கலையரசனை சட்டவிரோதமாகக் கைது செய்து வாடகை வாகனத்தில் ஏற்றிச் சென்றதாகத் தெரிவித்த ஸ்டாலின், கைது செய்யப்பட்டவர் சாதாரண நபரோ குற்றப் பின்னணி கொண்டவரோ அல்ல என்று வலியுறுத்தினார்.

 கலையரசன் தமிழ்நாட்டின் முதன்மையான ஆராய்ச்சி நிறுவனத்தில் பணிபுரியும் பேராசிரியர் என்றும், இந்தியாவின் தலைசிறந்த பல்கலைக்கழகமான ஜே.என்.யூவில் பொருளாதாரத்தில் முனைவர் பட்டம் பெற்றவர் என்றும் அவர் கூறினார். உலகின் தலைசிறந்த பல்கலைக்கழகமான கேம்பிரிட்ஜ் பல்கலைக்கழகம் பதிப்பித்த “தி டிராவிடியன் மாடல்” நூலின் ஆசிரியர்களில் ஒருவர் என்பதையும், ஒன்றிய அரசின் திட்டக்குழுவில் பொறுப்பு வகித்தவர், தமிழ்நாடு அரசின் பொருளாதார ஆய்வறிக்கையைத் தயார் செய்வதில் பங்களித்தவர் என்பதையும் நினைவுபடுத்தினார். தமிழ்நாடு முதலமைச்சர் தலைவராக இருக்கும் தமிழ்நாடு காலநிலை மாற்ற நிர்வாகக் குழுவின் உறுப்பினராக இப்போதும் இருப்பவர் என்றும் அவர் சுட்டிக்காட்டினார்.

அப்படிப்பட்டவரைத் தெரியாமல் கைது செய்துவிட்டோம் என்று கூறுவது நம்பும்படி இல்லை என ஸ்டாலின் தெரிவித்தார். செய்யாத குற்றத்திற்காக அடிப்படை உரிமைகள் அனைத்தையும் மறுத்து, அவரது செல்போனைப் பறித்து கைது செய்து அலைக்கழித்ததைச் சாதாரணச் செயலாக எவரும் கடந்துபோக முடியாது என்றும், குற்றவாளிகளை எல்லாம் கூத்தடிக்க விட்டுவிட்டு கல்வியாளர்களை அச்சுறுத்திப் பார்ப்பது எவ்வளவு பெரிய அசிங்கம் என்றும் கேள்வி எழுப்பினார்.முனைவர் கலையரசன் ஏன் கைது செய்யப்பட்டார் என கேட்ட ஸ்டாலின், டிராவிடியன் மாடல் என்ற பதத்தை முன்வைத்து திராவிட ஆட்சியால் தமிழ்நாடு அடைந்த வளர்ச்சியை உலகம் முழுவதும் பறைசாற்றியதற்காகவா, அல்லது த.வெ.க. ஆட்சி அமைந்த பிறகுதான் தமிழ்நாடு இதுவரை சந்தித்திராத விலைவாசி உயர்வைச் சந்தித்துள்ளது என்ற உண்மையைச் சொன்னதற்காகவா என கேள்வி எழுப்பினார்.

இதையும் படிங்க: அதிக கட்டணம் வசூலித்தால் ஆம்னி பேருந்து பறிமுதல்: சேலத்தில் போக்குவரத்துத்துறை அமைச்சர் எச்சரிக்கை!

முட்டாள்களால் நிறைந்த த.வெ.க.வுக்கும் கல்விக்கும் எந்தத் தொடர்பும் இல்லை என்பது அனைவரும் அறிந்ததுதான் என்றும், ஆனால் கல்வியாளர்களைக் கைது செய்து மிரட்டும் அளவுக்கு அறிவின் மீது ஒவ்வாமை கொண்டவர்களாக இவர்கள் நடந்துகொள்வார்கள் என நிச்சயமாக நினைக்கவில்லை என்றும் அவர் கூறினார். பாசிசத்தில் பா.ஜ.க.வையும் மிஞ்சிவிடுவார்கள் என்பதைத்தான் இந்தக் கைது காட்டுகிறது என அவர் தெரிவித்தார். முதலமைச்சரின் ஒப்புதலோடும் உயரதிகாரிகளின் அனுமதியோடும்தான் இந்த அத்துமீறல் நடக்கிறதா என்றும் கேள்வி எழுப்பினார்.

இதையும் படிங்க: நொய்யல், தென்பெண்ணையில் சோப்பு நுரையா.? பொறுப்பற்ற பேச்சு.! அமைச்சரை சாடிய வேல்முருகன்.!!