கோரிக்கை நிறைவேறுமா..? போராடும் தமிழ் ஓதுவார்கள்.. அமைச்சர் நிர்மல் குமார் பேச்சு வார்த்தை..!!

மதுரை மீனாட்சி அம்மன் கோயில் குடமுழுக்கு விழாவை முன்னிட்டு தமிழ் ஓதுவார்கள் கோயில் வாசலில் போராட்டம் நடத்தினர். தமிழில் வேத மந்திரங்களும் திருமுறைகளும் முழங்கப்பட வேண்டும் என்ற கோரிக்கையை அவர்கள் வலியுறுத்தினர். சமஸ்கிருத மந்திரங்களுடன் தமிழ் மொழிக்கும் சமமான இடம் அளிக்கப்பட வேண்டும் என்பதே அவர்களின் முக்கிய கோரிக்கையாக இருந்தது.

உலகப்புகழ் பெற்ற இந்தக் கோயிலில் பன்னிரண்டு ஆண்டுகளுக்குப் பிறகு நடைபெறும் திருக்குடமுழுக்கு விழா செப்டம்பர் 17ஆம் தேதி அன்று நடைபெற உள்ளது. கோபுர கலச நன்னீராட்டு, கருவறை பூஜை, வேள்வி உள்ளிட்ட முக்கிய நிகழ்வுகளில் தமிழ் திருமுறைகளையும் தமிழ் சைவ மந்திரங்களையும் ஓதுவார்கள் பாட வேண்டும் என்ற கோரிக்கை நீண்ட நாட்களாக எழுந்து வந்தது. தெய்வத் தமிழ்ப் பேரவை உள்ளிட்ட அமைப்புகள் இதற்காக நீதிமன்றத்தில் மனுக்கள் தாக்கல் செய்தன. உயர் நீதிமன்றம் சில உத்தரவுகளைப் பிறப்பித்தது. அதன்படி தமிழ் ஓதுவார்கள் பங்கேற்க அனுமதி அளிக்கப்பட்டதாக தகவல்கள் வெளியாயின.

இந்தப் பின்னணியில் கோயில் வாசலில் ஓதுவார்கள் குழு ஒன்று போராட்டத்தில் ஈடுபட்டது. தமிழ் மொழிக்கு முழுமையான அங்கீகாரம் கிடைக்க வேண்டும் என்றும், வேள்விச் சாலையிலும் பிற முக்கிய இடங்களிலும் தமிழ் மந்திரங்கள் முழங்கப்பட வேண்டும் என்றும் அவர்கள் வலியுறுத்தினர். போராட்டம் அமைதியாக நடைபெற்றாலும், சில இடங்களில் காவல்துறை தலையிட்டதாகவும், சிலர் கைது செய்யப்பட்டதாகவும் தகவல்கள் வந்தன. பின்னர் சில போராட்டங்கள் திரும்பப் பெறப்பட்டன.இந்நிலையில் அமைச்சர் சி.டி.ஆர். நிர்மல்குமார் கோயில் ஏற்பாடுகளை ஆய்வு செய்ய வந்தார்.

இதையும் படிங்க: 100% ரெடி..! மீனாட்சியம்மன் கோவில் குடமுழுக்கு..!! ஏற்பாடுகள் தயார் என அமைச்சர் நிர்மல் குமார் பேட்டி..!!

அவர் ஓதுவார்களுடன் பேச்சுவார்த்தை நடத்தினார். அவர்களின் கோரிக்கைகளைக் கேட்டறிந்து, குடமுழுக்கு நிகழ்வுகளில் தமிழ் திருமுறைகளுக்கு உரிய இடம் அளிக்கப்படும் என்ற உத்தரவாதத்தை வழங்கினார். பல்வேறு கோயில்களில் பணியாற்றி வரும் ஓதுவார்கள் மதுரைக்கு தற்காலிகமாக பணியிட மாற்றம் செய்யப்பட்டு பாராயணம் பாட வருகின்றனர் என்ற தகவலும் வெளியானது. இதன் மூலம் தமிழ் மொழிக்கு முக்கியத்துவம் அளிக்கப்படும் என எதிர்பார்க்கப்படுகிறது.

இதையும் படிங்க: “ஆதாரம் காட்ட முடியுமா?...” - மு.க.ஸ்டாலினுக்கு ஓபன் சவால் விட்ட அமைச்சர் சிடிஆர் நிர்மல் குமார்...!