டாஸ்மாக் பாரில் கடனா..? அமைச்சர் விக்னேஷ் சொன்னது என்ன.? தமிழ்நாடு அரசு விளக்கம்.!

தமிழக மதுவிலக்கு மற்றும் ஆயத்தீர்வைத் துறை அமைச்சர் விக்னேஷ், டாஸ்மாக் பார்களில் தொடர்ந்து மது அருந்துபவர்களுக்குக் கடன் வழங்கலாம் என்றும், ஒருவேளை அவர்கள் கடனைத் திருப்பிச் செலுத்தாமல் இறந்துவிட்டால் அந்தக் கடனைத் தமிழக வெற்றிக் கழக அரசே ஏற்றுக்கொண்டு அடைத்துவிடும் என்றும் அறிவித்ததாகக் குறிப்பிடப்பட்டுள்ளது. இந்தத் தகவல் முற்றிலும் பொய்யானது என விளக்கம் கொடுக்கப்பட்டுள்ளது. உண்மையில் அமைச்சர் விக்னேஷ் கோவையில் செய்தியாளர்களிடம் பேசும்போது டாஸ்மாக் பார்களில் உணவுக்கூடங்கள் அமைப்பது தொடர்பாகவே பேசியிருந்தார்.

பார்களில் தரமான உணவு வழங்க அனுமதி அளிக்கப்படும் என்றும், புதிய டெண்டரில் அதற்கான விதிமுறைகள் இடம்பெறும் என்றும் அவர் தெரிவித்திருந்தார். அந்த அசல் செய்தியை அடிப்படையாகக் கொண்டு கடன் வழங்கல் குறித்த பொய்யான தகவலைச் சேர்த்துப் பரப்பி வருகின்றனர். தமிழக அரசின் தகவல் சரிபார்ப்புப் பிரிவும் இந்தச் செய்தியை உடனடியாக மறுத்துள்ளது. அமைச்சர் விக்னேஷ் எந்தக் கட்டத்திலும் மது அருந்துபவர்களுக்குக் கடன் வழங்குவது குறித்துப் பேசவில்லை என்றும், இது முற்றிலும் போலித் தகவல் என்றும் அரசு தெளிவுபடுத்தியுள்ளது. டாஸ்மாக் பார்களில் கடன் முறை என்பது அரசின் எந்தக் கொள்கையிலும் இல்லை.

மது விற்பனை தொடர்பான விதிமுறைகள் தெளிவாக வரையறுக்கப்பட்டுள்ளன. பணம் செலுத்தி மட்டுமே மது வாங்க முடியும் என்பதே நடைமுறை.இந்தப் போலி செய்தி சமூக ஊடகங்களில் பரவியதால் பலரும் குழப்பமடைந்தனர். சிலர் இதை உண்மை என நம்பிப் பகிர்ந்தனர். ஆனால் உண்மை நிலையை ஆய்வு செய்தபோது, அசல் செய்தியின் உள்ளடக்கம் மாற்றப்பட்டிருப்பது தெளிவாகியது. அமைச்சர் பேசியது உணவு வசதி குறித்து மட்டுமே. அதைத் திரித்து கடன் மற்றும் இறப்புக்குப் பிறகு அரசு பொறுப்பேற்கும் என்ற கருத்தைச் செருகிவிட்டனர்.தமிழக அரசு டாஸ்மாக் துறையில் பல்வேறு சீர்திருத்தங்களை மேற்கொண்டு வருகிறது.

இதையும் படிங்க: குடிமகன்களால் தொல்லை..! எடுத்த நடவடிக்கை என்ன? தமிழக அரசுக்கு ஐகோர்ட் உத்தரவு!

பார்களின் சுகாதார நிலையை மேம்படுத்துவது, தரமற்ற உணவு விற்பனையைக் கட்டுப்படுத்துவது போன்ற நடவடிக்கைகள் இதில் அடங்கும். ஆனால் கடன் வழங்கல் போன்ற எந்தத் திட்டமும் அறிவிக்கப்படவில்லை என்று தெரிவிக்கப்பட்டுள்ளது. மது அருந்துவோர் தங்கள் பொறுப்பில் மட்டுமே அதைச் செய்ய வேண்டும் என்பதே அரசின் நிலைப்பாடு.சமூக ஊடகங்களில் பரவும் இதுபோன்ற போலித் தகவல்களை உடனடியாக நம்பாமல் சரிபார்த்துப் பார்ப்பது அவசியம் எனவும் பொய் செய்திகள் பரப்ப கூடாது எனவும் வலியுறுத்தப்பட்டுள்ளது. 

இதையும் படிங்க: விசாரணையின்றி டாஸ்மாக் ஊழியர்களை பணிநீக்கம் செய்ய கூடாது! சென்னை உயர்நீதிமன்றம் அதிரடி உத்தரவு!