சிறை கைதிகளிடம் தொலைபேசி கட்டணம் வசூல்: சிறைத்துறை டிஜிபி பதிலளிக்க மதுரை ஐகோர்ட் உத்தரவு!

தமிழ்நாட்டில் உள்ள மத்திய மற்றும் மாவட்டச் சிறைகளில் அடைக்கப்பட்டுள்ள கைதிகள் தங்களது குடும்பத்தினர் மற்றும் வழக்கறிஞர்களிடம் தொலைபேசி வாயிலாகப் பேசுவதற்கு அதிக கட்டணம் வசூலிக்கப்படுவதை எதிர்த்துத் தொடரப்பட்ட வழக்கில், சிறைத்துறை தலைவர் (டிஜிபி) மற்றும் தொலைபேசி சேவை வழங்கும் தனியார் நிறுவனம் ஆகியவை உரிய பதிலளிக்க சென்னை உயர்நீதிமன்ற மதுரைக் கிளை உத்தரவிட்டுள்ளது.

தமிழக சிறைகளில் உள்ள தண்டனைக் கைதிகள் மற்றும் விசாரணைக் கைதிகள் தங்களது குடும்பத்தினருடனும், சட்ட ரீதியான ஆலோசனைகளுக்காக வழக்கறிஞர்களுடனும் பேசுவதற்காகப் பிரத்யேக தொலைபேசி வசதி அறிமுகப்படுத்தப்பட்டு நடைமுறையில் இருந்து வருகிறது. இந்நிலையில், இந்தத் தொலைபேசி இணைப்புகளை இயக்கி வரும் தனியார் சேவை நிறுவனம் கைதிகளிடம் அரசு நிர்ணயித்த கட்டணத்தை விடவும், வெளிச் சந்தை நடைமுறைகளை விடவும் கூடுதல் கட்டணம் வசூலிப்பதாகக் கூறி சென்னை உயர்நீதிமன்ற மதுரைக் கிளையில் பொதுநல மனு ஒன்று தாக்கல் செய்யப்பட்டது.

அம்மனுவில், "சிறையில் உள்ள கைதிகள் மன உளைச்சலில் இருந்து விடுபடவும், தங்களது குடும்பத்துடனான உறவைத் தொடரவும், வழக்கறிஞர்களிடம் சட்ட உதவி பெறவும் தொலைபேசி வசதி மிக இன்றியமையாதது. ஆனால், சிறைத்துறை நிர்வாகமும் சம்பந்தப்பட்ட சேவை வழங்கும் நிறுவனமும் கைதிகளிடம் அளவுக்கு அதிகமான நிமிடக் கட்டணங்களை வசூலித்து வருகின்றன. எளிய பொருளாதாரப் பின்னணியைக் கொண்ட கைதிகளின் குடும்பத்தினரால் இக்கட்டணத்தைச் செலுத்த முடிவதில்லை. எனவே, சிறைக் கைதிகளிடம் இத்தகைய கூடுதல் கட்டணம் வசூலிப்பதற்கு உடனடியாகத் தடை விதிக்க வேண்டும்; அனைத்துக் கைதிகளுக்கும் நியாயமான கட்டணத்திலோ அல்லது இலவசமாகவோ தொலைபேசி வசதியை முறைப்படுத்தி வழங்க உத்தரவிட வேண்டும்" என்று கோரப்பட்டிருந்தது.

இதையும் படிங்க: பெண் ஊழியர்களுக்கு மாதவிடாய் விடுமுறை: அரசு முடிவெடுக்காவிட்டால் நீதிமன்றமே உத்தரவிடும் - மதுரை ஐகோர்ட்!

இம்மனுவை விசாரித்த உயர்நீதிமன்ற மதுரைக் கிளை நீதிபதிகள் அமர்வு, மனுதாரரின் குற்றச்சாட்டுகள் குறித்து தீவிரக் கவலை தெரிவித்தது. சிறைக் கைதிகளின் அடிப்படைத் தொடர்பு வசதியில் எவ்விதத் தனியார் சுரண்டலும் அனுமதிக்கப்படக் கூடாது என்பதைச் சுட்டிக்காட்டிய நீதிபதிகள், கைதிகளிடம் தொலைபேசிக் கட்டணம் வசூலிக்கப்படுவது எந்த விதிகளின் அடிப்படையில் நடைபெறுகிறது? என்பது குறித்து தமிழ்நாடு சிறைத்துறை தலைமை இயக்குநர் (டிஜிபி) மற்றும் தொலைபேசி சேவை வழங்கும் நிறுவனம் ஆகியவை விரிவான பிரமாணப் பத்திரம் மூலம் பதிலளிக்க வேண்டும் என உத்தரவிட்டு நோட்டீஸ் அனுப்ப ஆணை பிறப்பித்தனர். இவ்வழக்கு சிறைத்துறை வட்டாரங்களில் பெரும் கவனத்தைப் பெற்றுள்ளது.

இதையும் படிங்க: அனுமதி கிடைக்குமா..? பைக் டாக்சி விவகாரம்..! உயர் நீதிமன்ற மதுரை கிளையில் தமிழக அரசு பதில் மனு.!!