“வலையில் விழுந்தது... விலையில் விழவில்லையே...” - தசரா திருவிழாவால் மீனவர்களுக்கு ஏற்பட்ட பரிதாபம்...!

தூத்துக்குடி திரேஸ்புரம் நாட்டுப் படகு மீன்பிடி துறைமுகத்தில் மீன்களின் வரத்து குறைவாக இருந்த நிலையில், தசரா திருவிழா காரணமாக மீன்களை வாங்க பொதுமக்களின் கூட்டம் இல்லாததால் மீன்களின் விலை வீழ்ச்சி.

திரேஸ்புரம் நாட்டு படகு மீன்பிடி துறைமுகத்திலிருந்து ஏராளமான நாட்டுப் படகுகள் ஆழ்கடலுக்கு மீன் பிடிக்க செல்கின்றன. இந்நிலையில் தசரா திருவிழா காரணமாக மீன்களுக்கு விலை கிடைக்காததால் ஏராளமான நாட்டு படகுகள் கடலுக்கு மீன் பிடிக்க செல்லவில்லை.

குறைந்த அளவு மீன்பிடி படகுகளே கடலுக்குச் சென்றன. இன்று சனிக்கிழமை என்பதால் ஆழ் கடலுக்கு மீன் பிடிக்க சென்ற குறைவான படகுகள், இன்று கரை திரும்பினர். கரை திரும்பிய படகுகளின் மீன்களின் வரத்து குறைவாக காணப்பட்டது.

இதையும் படிங்க: மாலத்தீவில் கைதான 25 தூத்துக்குடி மீனவர்களை மீட்க வேண்டும்! மத்திய அரசுக்கு முதல்வர் விஜய் கடிதம்!

தற்போது தசரா திருவிழா நடைபெற்று வருவதாலும், தூத்துக்குடி மாவட்டத்தில் குலசேகரப்பட்டினம் முத்தாரம்மன் திருவிழாவிற்காக ஏராளமான பக்தர்கள் மாலை அணிந்து விரதம் இருந்து வருவதாலும் ஏராளமானோர் அசைவ உணவுகளை தவிர்ப்பர்.  

இதன் காரணமாக மீன்பிடி துறைமுகத்தில் மீன்களை வாங்க பொதுமக்கள் கூட்டம் மற்றும் வியாபாரிகளின் கூட்டம் குறைவாகவே காணப்பட்டது. மீன்களின் விலை இதன் காரணமாக வீழ்ச்சி அடைந்தது.

சீலா மீன் கிலோ 800 ரூபாய் வரையும் விளைமீன், ஊழி பாறை ஆகிய ரக மீன்கள் கிலோ 300 ரூபாய் முதல் 500 ரூபாய் வரை விற்பனையானது. நண்டு ஒரு கிலோ அறுநூறு ரூபாய்க்கும், சால மீன் ஒரு கூடை 700 ரூபாய் வரை விற்பனையானது.

ஏற்றுமதி ரகம் வாய்ந்த சூரை மீன்கள் கிலோ 180 வரை விற்பனையானது. மீன்களுக்கு விலை கிடைக்காததால் மீனவர்கள் கவலை அடைந்தனர். தசரா திருவிழாவிற்கு பின்பு மீன்களுக்கு நல்ல விலை கிடைக்கும் என எதிர்பார்ப்பில் மீனவர்கள் உள்ளனர்.

இதையும் படிங்க: “இனியும் பொறுத்துக்க முடியாது...” - நடுக்கடலில் இறங்கி அடித்த மீனவர்கள்... தூத்துக்குடியில் உச்சக்கட்ட பரபரப்பு...!