18 தொழிலாளர்கள் உயிரிழந்த அமோனியா விபத்து... இறால் தொழிற்சாலைக்கு ‘சீல்’! மின்சாரமும் துண்டிப்பு
திருவள்ளூரில் ஜூன் 21ம் தேதி ஏற்பட்ட அம்மோனியா வாயு கசிவு காரணமாக 18 பேர் உயிரிழந்த சம்பவத்தைத் தொடர்ந்து, சம்பந்தப்பட்ட தொழிற்சாலைக்கு அதிகாரிகள் முழுமையாக சீல் வைத்துள்ளனர்.
by
திருவள்ளூர் மாவட்டம் கன்னிகைப்பேரில் செயல்பட்டு வந்த கடல் உணவுப் பொருட்கள் ஏற்றுமதி தொழிற்சாலையில் அமோனியா வாயு கசிவு ஏற்பட்டு 18 தொழிலாளர்கள் உயிரிழந்த சம்பவம் பெரும் அதிர்வலைகளை ஏற்படுத்தியிருந்தது. இந்த சம்பவத்திற்குப் பிறகு பாதுகாப்பு நடவடிக்கைகள் தீவிரப்படுத்தப்பட்ட நிலையில், தற்போது அந்த தொழிற்சாலைக்கு அதிகாரிகள் முழுமையாக சீல் வைத்து மின்சார இணைப்பையும் துண்டித்துள்ளனர்.
கடந்த மாதம் 21-ஆம் தேதி தொழிற்சாலையில் ஏற்பட்ட அமோனியா வாயு கசிவால் வடமாநிலத்தைச் சேர்ந்த 18 பெண் தொழிலாளர்கள் உயிரிழந்தனர். மேலும் பலர் உடல்நலக் குறைவு காரணமாக மருத்துவமனைகளில் சிகிச்சை பெற்றனர். இந்த விபத்து தமிழகம் முழுவதும் பெரும் பரபரப்பை ஏற்படுத்தியதோடு, தொழிற்சாலைகளில் பாதுகாப்பு நடைமுறைகள் குறித்த கேள்விகளையும் எழுப்பியது.
விபத்துக்குப் பிறகு தொழிற்சாலையில் மீதமிருந்த அமோனியா வாயுவை முழுமையாக அகற்றும் பணிகள் தொடர்ந்து நான்கு நாட்கள் நடைபெற்றன. பாதுகாப்பு நிபுணர்களின் கண்காணிப்பில் மேற்கொள்ளப்பட்ட இந்தப் பணிகள் நிறைவடைந்த பின்னரும், மாவட்ட நிர்வாகம் தொடர்ந்து பல்வேறு முன்னெச்சரிக்கை நடவடிக்கைகளை மேற்கொண்டது.
இதையும் படிங்க: அமோனியா கசிவு விவகாரம்..!! பவர் கட்.. தொழிற்சாலைக்கு 'சீல்' வைத்த அதிகாரிகள்..!!
மாவட்ட நிர்வாகத்தின் உத்தரவின் பேரில் தொழிற்சாலையின் அலுவலகம், குடோன், தளவாட அறை, தொழிலாளர்கள் தங்கியிருந்த குடியிருப்பு உள்ளிட்ட ஐந்து முக்கிய பகுதிகளுக்கு அதிகாரிகள் முதலில் சீல் வைத்தனர். அதனைத் தொடர்ந்து தொழிற்சாலை வளாகத்தில் தேங்கியிருந்த கழிவுநீரை அகற்றும் பணிகளும் மேற்கொள்ளப்பட்டன. மேலும் பாதுகாப்பு காரணங்களுக்காக வளாகத்தில் இருந்த சுமார் 20 மரங்களும் வெட்டி அகற்றப்பட்டன.
இந்த அனைத்து பணிகளும் நிறைவடைந்த நிலையில், இன்று திருவள்ளூர் வருவாய் கோட்டாட்சியர் தலைமையில் அதிகாரிகள் தொழிற்சாலையின் பிரதான நுழைவாயிலுக்கு அதிகாரப்பூர்வமாக சீல் வைத்தனர். இதன் மூலம் தொழிற்சாலையின் அனைத்து செயல்பாடுகளும் முழுமையாக நிறுத்தப்பட்டுள்ளன.
இதனைத் தொடர்ந்து, தொழிற்சாலைக்கு வழங்கப்பட்டு வந்த மின்சார இணைப்பும் வருவாய்துறை அதிகாரிகள் முன்னிலையில் துண்டிக்கப்பட்டது. விபத்து தொடர்பான விசாரணை தொடர்ந்து நடைபெற்று வரும் நிலையில், பாதுகாப்பு விதிமுறைகள் மீறப்பட்டனவா, அலட்சியம் ஏற்பட்டதா என்பது குறித்து சம்பந்தப்பட்ட துறைகள் தீவிரமாக விசாரணை நடத்தி வருகின்றன.
இதையும் படிங்க: "எ.வ.வேலுக்கு சிக்கல்! சாலை முறைகேடு வழக்கில் புதிய திருப்பம்... சுப்ரீம் கோர்ட்டை நாடும் தமிழக அரசு!"
