முதலமைச்சர் ச.ஜோசப் விஜய் நாளை இரவு லண்டன் பயணம்.. தொழிலதிபர்களுடன் நேரடிப் பேச்சுவார்த்தை!

தமிழ்நாட்டின் தொழில் வளர்ச்சியை அடுத்த கட்டத்திற்கு எடுத்துச் செல்லும் நோக்கில், சர்வதேச அளவிலான புதிய முதலீடுகளைப் பெருமளவில் ஈர்ப்பதற்காக முதலமைச்சர் ச.ஜோசப் விஜய் நாளை (செப்டம்பர் 10) இரவு 10 மணியளவில் சென்னையிலிருந்து துபாய் வழியாக இங்கிலாந்து தலைநகர் லண்டனுக்கு அரசு முறைப் பயணம் மேற்கொள்கிறார். முதலமைச்சராகப் பொறுப்பேற்ற பிறகு அவர் மேற்கொள்ளும் முதல் வெளிநாட்டு அரசு முறைப் பயணம் இதுவாகும் என்பதால் அரசியல் மற்றும் தொழில் துறை வட்டாரங்களில் பெரும் எதிர்பார்ப்பு எழுந்துள்ளது.

சட்டமன்ற பட்ஜெட் கூட்டத்தொடர் தேதி குறிப்பிடப்படாமல் நிறைவடைந்ததைத் தொடர்ந்து, தமிழகத்திற்குப் புதிய தொழில் முதலீடுகளைக் கொண்டு வருவதற்கான முன்னெடுப்புகளைத் தமிழக அரசு முழு வீச்சில் தீவிரப்படுத்தியுள்ளது. இதன் ஒரு பகுதியாக, ஐரோப்பிய நாடுகளின் முன்னணித் தொழிலதிபர்கள், முதலீட்டாளர்கள் மற்றும் சர்வதேச வர்த்தக அமைப்புகளின் பிரதிநிதிகளை நேரில் சந்தித்துப் பேச்சுவார்த்தை நடத்துவதற்காக முதலமைச்சர் ச.ஜோசப் விஜய் லண்டன் பறக்கிறார்.

இதையும் படிங்க: துபாய் பறக்கும் முதல்வர் விஜய்: நடிகர் அஜித்துடன் திடீர் சந்திப்பு; லண்டனில் முதலீட்டாளர்கள் மாநாடு!

இதற்காக, சென்னை சர்வதேச விமான நிலையத்திலிருந்து நாளை இரவு 10:00 மணிக்கு வழக்கமான எமிரேட்ஸ் ஏர்லைன்ஸ் பயணிகள் வணிக விமானம் மூலம் புறப்படும் முதல்வர், துபாய் சர்வதேச விமான நிலையத்தை அடைந்து, அங்கிருந்து இணைப்பு விமானம் வாயிலாக லண்டன் சென்றடைகிறார். முதலமைச்சருடன் தொழில் துறை மற்றும் வழிகாட்டி (Guidance) நிறுவனத்தின் உயர் அதிகாரிகளும், நிதித்துறை செயலாளர்களும் அரசு முறைப் பயணமாக லண்டன் விரைகின்றனர்.

லண்டனில் ஒரு வாரம் முகாமிடும் முதலமைச்சர் விஜய், பிரிட்டன் மற்றும் ஐரோப்பிய நாடுகளைச் சேர்ந்த முக்கிய தொழில் நிறுவனங்களின் தலைமை அதிகாரிகளுடன் தொடர் முதலீட்டு ஆலோசனைக் கூட்டங்களை நடத்துகிறார். தமிழ்நாட்டில் தொழில் தொடங்குவதற்கு உள்ள சாதகமான உள்கட்டமைப்பு, திறமையான மனித வளம் மற்றும் அரசு வழங்கும் சிறப்புச் சலுகைகளை எடுத்துரைத்து, ஆட்டோமொபைல், புதுப்பிக்கத்தக்க எரிசக்தி, விண்வெளி மற்றும் பாதுகாப்புத் துறை உள்ளிட்ட பல்வேறு துறைகளில் பல்லாயிரக்கணக்கான கோடி ரூபாய் மதிப்பிலான புதிய தொழில் முதலீடுகளை ஈர்ப்பதற்கான முக்கியப் புரிந்துணர்வு ஒப்பந்தங்களில் (MoUs) அவர் கையெழுத்திடவுள்ளார். மேலும், லண்டனில் வசிக்கும் புலம்பெயர் தமிழ்ச் சமூகத்தினரையும் முதல்வர் நேரில் சந்தித்துக் கலந்துரையாட உள்ளார். அனைத்து நிகழ்ச்சிகளையும் வெற்றிகரமாக முடித்துக்கொண்டு வரும் செப்டம்பர் 16-ஆம் தேதி முதல்வர் மீண்டும் தாயகம் திரும்புவார் என அரசு வட்டாரங்கள் தெரிவிக்கின்றன.

இதையும் படிங்க: சர்வதேச சட்டவிரோத பணத்தில் உலக மக்கள் அனைவருக்கும் லேப்டாப் தரலாம்: தலைமை நீதிபதி சூர்யா காந்த் பேச்சு!