தமிழகத்தில் வேகமெடுக்கும் டெங்கு!! உஷார் நிலையில் அரசு!! மக்களுக்கு முக்கிய அறிவுரை!!

தமிழகத்தில் டெங்கு காய்ச்சல் பாதிப்பு கடந்த சில நாட்களாக கவலைக்குரிய அளவில் உயர்ந்து வருகிறது. பொதுமக்களிடையே அதிர்ச்சியை ஏற்படுத்தியுள்ள இந்த நிலையில், தினசரி 300-க்கும் மேற்பட்ட புதிய பாதிப்புகள் உறுதி செய்யப்பட்டு வருகின்றன. நேற்று ஒரே நாளில் 301 பேருக்கு டெங்கு தொற்று உறுதிசெய்யப்பட்டுள்ளது. 

நடப்பாண்டில் இதுவரை மொத்தம் 17,949 பேர் பாதிக்கப்பட்டுள்ள நிலையில், ஒன்பது பேர் உயிரிழந்துள்ளனர். சென்னையில் மட்டும் 79 பேருக்கு பாதிப்பு பதிவாகியுள்ளது. அதேநேரம், உன்னிகாய்ச்சல் எனப்படும் ஸ்க்ரப் டைபாஸால் 4,656 பேர் பாதிக்கப்பட்டுள்ளனர். பருவநிலை மாற்றம், இடைக்கிடை பெய்து வரும் மழை மற்றும் பல்வேறு இடங்களில் தேங்கும் மழைநீர் ஆகியவை டெங்குவைப் பரப்பும் ஏடீஸ் கொசுக்களின் உற்பத்தியை அதிகரித்துள்ளன. 

செப்டம்பர் மாதத் தொடக்கத்திலிருந்து பாதிப்புகள் தொடர்ந்து உயர்ந்து வருகின்றன. இதற்கு முந்தைய நாட்களில் தினசரி பாதிப்பு 200 முதல் 250 வரை இருந்தது. செப்டம்பர் 16ம் தேதி 283, 17ம் தேதி 244, 18ம் தேதி 253, 19ம் தேதி 224 மற்றும் 20ம் தேதி 228 பாதிப்புகள் பதிவான நிலையில், இப்போது 301 ஆக உயர்ந்துள்ளது. தமிழக அரசு தேவையான முன்னெச்சரிக்கை நடவடிக்கைகளை மேற்கொண்டு வருவதாக தெரிவிக்கப்பட்டுள்ளது. 

இதையும் படிங்க: டாஸ்மாக் ஊழியர்களுக்கு ஊதிய உயர்வு: தமிழக அரசு அதிகாரப்பூர்வ அரசாணை வெளியீடு!

2024ம் ஆண்டை விட இந்த ஆண்டு பாதிப்பு எண்ணிக்கை குறைவாக இருந்தாலும், சமீபத்திய நாட்களில் திடீர் உயர்வு கவலை அளிக்கிறது. பருவமழை தாமதமாகத் தொடங்கியதால் அதீத வெப்பம் நிலவுகிறது. பகலில் சுட்டெரிக்கும் வெப்பமும் மாலையில் மழையும் சேர்ந்து வெப்பநிலையில் திடீர் மாற்றத்தை ஏற்படுத்தி காய்ச்சல் பாதிப்புகளை அதிகரிக்கச் செய்கின்றன. திடீர் மழையால் தேங்கும் நீர் கொசு உற்பத்திக்கு ஏதுவாக அமைகிறது.

சுகாதாரத்துறை அதிகாரிகள் ஆகஸ்ட்-செப்டம்பர் மாதங்களில் டெங்கு பாதிப்பு அதிகரிப்பது வழக்கமானது என்றாலும், பொதுமக்கள் விழிப்புடன் இருக்க வேண்டும் என எச்சரிக்கின்றனர். வீடுகளைச் சுற்றிலும் உள்ளேயும் மழைநீர் தேங்காமல் பார்த்துக்கொள்ள வேண்டும். 

கொசு வலை, ரெப்பலண்ட் ஆகியவற்றைப் பயன்படுத்தி கொசுக்கள் உள்ளே நுழையாதவாறு பாதுகாத்துக் கொள்ள வேண்டும். காய்ச்சல் தோன்றினால் உடனடியாக மருத்துவரை அணுக வேண்டும். சுய மருத்துவம் அல்லது வீட்டு முறை சிகிச்சை மேற்கொள்ளக் கூடாது. ஆரம்ப நிலையில் சிகிச்சை பெறுவதன் மூலம் உயிரிழப்புகளைத் தவிர்க்க முடியும்.

இதையும் படிங்க: ஆறுகள் குளங்களை உடனே ஆய்வு செய்து குப்பைகளை அகற்றுக: எல்-நினோ நிபுணர் குழு பரிந்துரை!