விசில் சத்தம் காதை கிழிக்கப்போகுது..!! 21ம் தேதி நந்தனத்தில்.. பிரம்மாண்ட பொதுக்கூட்டத்தில் பேசும் விஜய்..!!

தமிழக சட்டசபைத் தேர்தல் வரும் ஏப்ரல் 23-ம் தேதி ஒரே கட்டமாக நடைபெற உள்ள நிலையில், தேர்தல் பிரசாரத்துக்கு இன்னும் சில நாட்களே உள்ளன. இதனால் அரசியல் கட்சிகளின் தலைவர்கள் அனைவரும் தீவிரமாக பிரசாரத்தில் ஈடுபட்டு வருகின்றனர்.

தமிழக வெற்றிக் கழகம் (தவெக) தலைவர் விஜய் கடந்த சில நாட்களாக மாநிலத்தின் பல்வேறு பகுதிகளில் தொடர்ச்சியான பிரசாரப் பயணங்களை மேற்கொண்டு வருகிறார். இதுவரை திருச்சி, திருப்பூர், ஈரோடு, திருநெல்வேலி, கன்னியாகுமரி உள்ளிட்ட மாவட்டங்களில் அவர் சுற்றுப்பயணம் செய்து, தனது கட்சியின் விசில் சின்னத்துக்கு ஆதரவு திரட்டினார்.

நேற்று முன்தினம் சென்னையில் தியாகராயநகர் (தி.நகர்), எழும்பூர், ஆயிரம் விளக்கு தொகுதிகளில் விஜய் சாலை வழியாக பிரசாரம் செய்தார். அப்போது அவர் விசில் சின்னத்துக்கு வாக்கு கேட்டார். அவரது வருகையை ஒட்டி, வழிநெடுகிலும் ஏராளமான தொண்டர்கள், பெண்கள் மற்றும் பொதுமக்கள் பெரும் உற்சாகத்துடன் கூடி வரவேற்பு அளித்தனர். விஜய் சென்ற ஒவ்வொரு இடத்திலும் மக்கள் கூட்டம் அலைமோதியது. இது அவரது பிரசாரத்துக்கு மக்கள் மத்தியில் நல்ல வரவேற்பு இருப்பதை பிரதிபலித்தது.

இதையும் படிங்க: தமிழகத்தில் இருமுனை போட்டிதான்! தேர்தல் களம் குறித்து திருமாவளவன் விளக்கம்!

இந்த நிலையில், ஏப்ரல் 18-ம் தேதி (நாளை) விஜய் கடலூர் மற்றும் தர்மபுரி தொகுதிகளில் தீவிர பிரசாரத்தில் ஈடுபட உள்ளார். சென்னையில் இருந்து ஹெலிகாப்டர் மூலம் முதலில் கடலூர் செல்லும் அவர், அங்கு வேன் மூலம் ரோடு ஷோ நடத்தி பொதுமக்களிடையே வாக்கு சேகரிப்பார். பின்னர் ஹெலிகாப்டர் வழியாக தர்மபுரி சென்று, அங்கும் வேன் ரோடு ஷோ மூலம் பிரசாரம் செய்துவிட்டு சென்னை திரும்புவார். இந்தப் பயணம் அவரது தொடர் வேகத்தை காட்டுகிறது.

தொடர்ந்து ஏப்ரல் 19-ம் தேதி விஜய் திருவள்ளூர் தொகுதியில் பிரசாரம் செய்ய திட்டமிட்டுள்ளார். சென்னை நீலாங்கரையில் உள்ள தனது இல்லத்திலிருந்து காரில் சாலை மார்க்கமாக திருவள்ளூர் செல்லும் அவர், அங்கு வேனில் நின்றபடி ரோடு ஷோ நடத்தி மக்களிடம் தனது கட்சியின் கொள்கைகளை எடுத்துரைப்பார். பிரசாரத்தை முடித்துவிட்டு காரில் சென்னை திரும்புவார்.

ஏப்ரல் 20-ம் தேதி சென்னையில் மீண்டும் பிரசாரம். வில்லிவாக்கம், பெரம்பூர், அண்ணா நகர் தொகுதிகளில் ரோடு ஷோ மூலம் பிரசாரம் செய்யும் விஜய், தி.நகர் தொகுதி வேட்பாளர் என்.ஆனந்துக்கு ஆதரவாக மீண்டும் ஒருமுறை பிரசாரத்தில் ஈடுபட உள்ளார். தேர்தல் பிரசாரத்துக்கு ஏப்ரல் 21-ம் தேதி கடைசி நாள் என்பதால், இறுதி நாளில் விஜய் சென்னை நந்தனம் ஒய்.எம்.சி.ஏ. மைதானத்தில் பிரமாண்ட பொதுக்கூட்டத்தில் பங்கேற்கிறார். 

தவெக சார்பில் ஏற்பாடு செய்யப்பட்டுள்ள இந்த கூட்டத்தில் கட்சியின் பொதுச்செயலாளரும், தி.நகர் தொகுதி வேட்பாளருமான என்.ஆனந்த் உள்ளிட்ட சுமார் 4,000 பேர் கலந்துகொள்ள உள்ளனர். இந்த மேடையில் விஜய் சிறப்புரை ஆற்றி, தனது இறுதிக்கட்ட தேர்தல் பிரசாரத்தை நிறைவு செய்யவுள்ளார். விஜய்யின் இந்த தொடர் பிரசாரப் பயணங்கள் தவெகவுக்கு புதிய ஆற்றலை அளிப்பதாக அக்கட்சி தொண்டர்கள் நம்புகின்றனர். மக்கள் மத்தியில் காணப்படும் உற்சாக வரவேற்பு அவரது அரசியல் பயணத்துக்கு நல்ல அறிகுறியாக பார்க்கப்படுகிறது. 

இதையும் படிங்க: 'ஜனநாயகன்' படத்தை ஒளிபரப்பிய உள்ளூர் சேனல்! கோவையில் உரிமையாளர் உட்பட 5 பேர் கைது!