TN TET! ஆசிரியர் தகுதித்தேர்வு இரண்டாம் தாள்! உற்சாகமாக வந்த தேர்வர்கள்!

தமிழகத்தில் அரசு மற்றும் அரசு உதவி பெறும் பள்ளிகளில் பட்டதாரி ஆசிரியர் பணிக்கான ஆசிரியர் தகுதித் தேர்வு (TNTET) இரண்டாம் நாள் இன்று தமிழகம் முழுவதும் அமைதியாக நடைபெற்றது. இந்தத் தேர்வில் 1.67 லட்சத்துக்கும் அதிகமான தேர்வர்கள் பங்கேற்றதால், மாநிலம் முழுவதும் உள்ள தேர்வு மையங்களில் காலை முதலே பரபரப்பான சூழல் நிலவியது.

ஆசிரியர் தேர்வு வாரியம் நடத்திய இந்தத் தேர்வு, தமிழகம் முழுவதும் 613 தேர்வு மையங்களில் ஒரே நேரத்தில் நடைபெற்றது. மொத்தம் 1,67,743 தேர்வர்கள் தேர்வில் பங்கேற்க பதிவு செய்திருந்தனர். ஆசிரியர் பணியை இலக்காகக் கொண்டு ஆயிரக்கணக்கான இளைஞர்கள் அதிகாலை முதலே தேர்வு மையங்களுக்கு வரத் தொடங்கினர்.

தேர்வர்களுக்கு காலை 8.30 மணி முதல் 9.30 மணிக்குள் மட்டுமே தேர்வு மையங்களுக்குள் அனுமதி வழங்கப்பட்டது. 9.30 மணிக்குப் பிறகு வந்தவர்களுக்கு அனுமதி மறுக்கப்பட்டதால், பலரும் முன்கூட்டியே வந்து வரிசையில் காத்திருந்தனர். காலை 10 மணிக்கு தொடங்கிய தேர்வு பிற்பகல் 1 மணி வரை நடைபெற்றது. மாற்றுத்திறனாளி தேர்வர்களுக்கு விதிமுறைகளின்படி கூடுதலாக ஒரு மணி நேரம் வழங்கப்பட்டது.

இதையும் படிங்க: ஆசை வார்த்தை கூறி தனிமையில் அழைத்த பெண்! பைனான்சியரை நிர்வாணமாக்கி மிரட்டல்! இருவர் கைது!

தேர்வில் முறைகேடுகளைத் தடுக்க பல்வேறு கட்டுப்பாடுகளும் அமல்படுத்தப்பட்டன. மொபைல் போன், ஸ்மார்ட் வாட்ச் உள்ளிட்ட மின்னணு சாதனங்களை தேர்வு மையத்திற்குள் கொண்டு செல்ல தடை விதிக்கப்பட்டது. மேலும், பெல்ட், ஷூ மற்றும் ஹை ஹீல்ஸ் அணிந்து தேர்வு எழுதவும் அனுமதி வழங்கப்படவில்லை. தேர்வு மையங்களில் தீவிர சோதனைக்குப் பிறகே தேர்வர்கள் உள்ளே அனுமதிக்கப்பட்டனர்.

நேற்று நடைபெற்ற முதல் தாள் தேர்வு எதிர்பார்த்ததை விட சற்று கடினமாக இருந்ததாக பல தேர்வர்கள் கருத்து தெரிவித்திருந்தனர். இதன் காரணமாக, இன்று நடைபெற்ற இரண்டாம் தாள் தேர்வு எவ்வாறு இருக்கும் என்ற எதிர்பார்ப்பும், சிறிய பதற்றமும் தேர்வர்கள் மத்தியில் காணப்பட்டது. இருப்பினும், பெரும்பாலானோர் நம்பிக்கையுடனும் உற்சாகத்துடனும் தேர்வை எதிர்கொண்டனர்.

தேர்வு மையங்களில் தேவையான பாதுகாப்பு மற்றும் கண்காணிப்பு ஏற்பாடுகள் செய்யப்பட்டிருந்தன. அதிகாரிகள் தொடர்ந்து ஆய்வு மேற்கொண்டதுடன், தேர்வு எந்தவித இடையூறும் இல்லாமல் நடைபெற நடவடிக்கை எடுத்தனர். ஆசிரியர் பணியை எதிர்நோக்கும் லட்சக்கணக்கான இளைஞர்களுக்கு இந்தத் தேர்வு முக்கியமானதாக கருதப்படுவதால், அதன் முடிவுகள் குறித்த எதிர்பார்ப்பும் அதிகரித்துள்ளது.

இதையும் படிங்க: 18 உயிர்களை பலிகொண்ட இறால் தொழிற்சாலை! நச்சு அமோனியாவை அகற்றும் பணி 2வது நாளாக துவக்கம்!