கொளத்தூரில் 'டூப்' விஜய்! தவெக வேட்பாளர் வி.எஸ். பாபுவின் வினோத பிரசாரத்தால் பரபரப்பு!

சென்னை கொளத்தூர் சட்டமன்றத் தொகுதியில் தமிழக வெற்றி கழகம் (TVK) சார்பில் போட்டியிடும் வேட்பாளர் வி.எஸ். பாபு, தனது பிரசாரத்தில் கட்சித் தலைவர் விஜய்யைப் போன்ற உருவ ஒற்றுமை கொண்ட ஒருவரை உடன் அழைத்துச் செல்வது அப்பகுதி மக்களிடையே பெரும் பேசுபொருளாகியுள்ளது.

முதலமைச்சர் மு.க. ஸ்டாலினை எதிர்த்துக் கொளத்தூரில் களம் காணும் வி.எஸ். பாபு, திறந்த ஜீப்பில் வாக்காளர்களைச் சந்தித்து வருகிறார். அப்போது, விஜய் போலவே உடை அணிந்து, அவரது உடல்மொழியைப் பிரதிபலிக்கும் 'டூப்' விஜய் ஒருவரை அருகில் நிற்க வைத்துக்கொண்டு அவர் வாக்கு சேகரித்து வருகிறார். பிரசாரத்தின் போது இந்த நபர் விஜய்யைப் போலவே பொதுமக்களைப் பார்த்து கையசைப்பதும், வணக்கம் சொல்வதுமாக இருக்கிறார்.

இந்தக் காட்சியைக் கண்ட கொளத்தூர் தொகுதி மக்கள் மற்றும் அரசியல் விமர்சகர்கள் சமூக வலைதளங்களில் கிண்டலாகப் பதிவிட்டு வருகின்றனர்: சினிமாவில் மட்டுமே சண்டைக் காட்சிகளுக்கு டூப் போட்டுப் பார்த்திருக்கிறோம். இப்போது அரசியலிலும் பிரசாரத்திற்கு டூப் போடுகிறார்கள் என அப்பகுதி மக்கள் விமர்சிக்கின்றனர். தலைவர் நேரில் வர முடியாத இடங்களில், இப்படி ஒருவரை நிற்க வைத்து ஏமாற்றுவது அரசியலுக்குச் சரிப்பட்டு வராது என்றும் சிலர் அதிருப்தி தெரிவித்துள்ளனர்.

இதையும் படிங்க: பரபரப்பு வீடியோ...!! - விஜய் வாகனத்தை பின் தொடர்ந்த தவெகவினர்... கொத்தாக விபத்தில் சிக்கிய பகீர் காட்சிகள்...!

தமிழகம் முழுவதும் 234 தொகுதிகளிலும் தலைவர் விஜய் ஒரே நேரத்தில் பிரசாரம் செய்ய முடியாது என்பதால், தொண்டர்களை உற்சாகப்படுத்தவும், 'பிராண்ட் விஜய்' (Brand Vijay) பார்வையில் படும்படி இருக்கவும் இந்தப் புதிய உத்தியைக் கையாண்டு வருவதாகத் தவெக தரப்பில் கூறப்படுகிறது.

இதற்காகச் சேலம் மற்றும் சென்னையைச் சேர்ந்த விஜய் போன்ற உருவ ஒற்றுமை கொண்ட கலைஞர்கள் (Lookalikes) ஒப்பந்தம் செய்யப்பட்டுள்ளதாகவும், அவர்களுக்கு ஒரு நாளைக்கு குறிப்பிட்ட தொகை சம்பளமாக வழங்கப்படுவதாகவும் தகவல்கள் கசிந்துள்ளன.

முதலமைச்சர் மு.க. ஸ்டாலின் தனது கோட்டையான கொளத்தூரில் மீண்டும் போட்டியிடும் நிலையில், அவரை எதிர்க்கத் தவெக சார்பில் வி.எஸ். பாபு நிறுத்தப்பட்டுள்ளார். இத்தகைய சினிமா பாணி பிரசாரங்கள் வாக்குகளாக மாறுமா அல்லது வெறும் கேலிப் பொருளாக முடியுமா என்பது மே 4-ஆம் தேதி தெரிந்துவிடும்.

சென்னை போன்ற மாநகரப் பகுதிகளில் இத்தகைய 'டூப்' கலாச்சாரம் வாக்காளர்களிடையே எத்தகைய தாக்கத்தை ஏற்படுத்தும் என்பது விவாதத்திற்குரிய ஒன்றாக மாறியுள்ளது.

இதையும் படிங்க: காலையிலேயே ஹேப்பி நியூஸ்... அடுத்த தரமான சம்பவத்திற்கு தயாராகும் விஜய்... தவெகவினர் கொண்டாட்டம்...!