முகாம் நடத்த ஸ்கூல் லீவ் விடுவீங்களா? எதுக்கு இந்த வெத்து விளம்பரம்… அண்ணாமலை விமர்சனம்…!

ஜோலார்பேட்டை அருகே உள்ள அரசு மேல்நிலைப் பள்ளியில் உங்களுடன் ஸ்டாலின் முகாம் இன்று நடைபெறுகிறது. இதன் காரணமாக பள்ளிக்கு விடுமுறை அளித்து இருப்பதாக குற்றச்சாட்டுகள் எழுந்தன. இது தொடர்பான வீடியோ ஆதாரங்களும் வெளியானது. இந்த சம்பவத்தை அண்ணாமலை கடுமையாக கண்டித்துள்ளார்.

திருப்பத்தூர் ஜோலார்பேட்டை அருகே உள்ள தாமலேரி முத்தூர் ஊராட்சியில் உள்ள அரசு மேல்நிலைப்பள்ளிக்கு, திமுக அரசின் உங்களுடன் ஸ்டாலின் முகாமுக்காக இன்று விடுமுறை அளித்திருக்கிறார்கள் என்றும் ஆட்சிக்கு வந்து நான்கு ஆண்டுகளாக, எந்தத் துறை நிர்வாகத்தையும் கவனிக்காமல், வெற்று விளம்பரங்களிலேயே நாட்களைக் கடத்தி விட்டு, தற்போது, ஆட்சி முடியும் தருவாயில், முகாம் நடத்துகிறோம், குறை தீர்க்கிறோம் என்று, அரசுப் பள்ளிகள், அரசு அலுவலகங்கள் அனைத்தையும் செயலிழக்கச் செய்து கொண்டிருக்கிறார்கள் எனவும் குற்றம்சாட்டினார்.

நான்கு ஆண்டுகளாக எந்தச் செயல்பாடும் இல்லாமல் தமிழக அரசு இயந்திரம் முடங்கிக் கிடந்தது என்பதற்கு, இப்போது அவசர அவசரமாக ஆங்காங்கே நடக்கும் கண்துடைப்பு முகாம்களே சாட்சி என்றும் கூறினார். அரசுப் பள்ளிகளுக்கு விடுமுறை அளித்து முகாம் நடத்தலாம் என்ற அகம்பாவம் எங்கிருந்து வருகிறது திமுக அரசுக்கு என்றும் உங்கள் கையாலாகாத்தனத்துக்கு, அரசுப் பள்ளிகளில் பயிலும் ஏழை, எளிய மாணவர்களைப் பலிகடா ஆக்குவதா எனவும் கேள்வி எழுப்பினார்.

இதையும் படிங்க: அனைத்து அரசு சேவையும் ஒரே இடத்தில்..!! லிஸ்ட்ல உங்க ஏரியா இருக்கா பாருங்க..!!

ஏற்கனவே திருச்சி மாவட்டம் உப்பிலியாபுரம் அரசுப் பள்ளிக்கு விடுமுறை அளித்து முகாம் நடத்தியதை, கண்டித்த உடன், இனி இப்படி நடைபெறாது என்று உறுதியளித்த பள்ளிக்கல்வித்துறை அமைச்சர், இவற்றை எதையும் கண்டுகொள்ளாமல், மாதம்தோறும் வெளிநாட்டுச் சுற்றுலாவில் பிசியாக இருக்கிறார் என்றும் தெரிவித்துள்ளார். ஏற்கனவே முகாம்களில் பெற்ற மனுக்களை, வைகையாற்றில் மிதக்க விட்டுவிட்டு, எதற்கு இந்த வெட்டி விளம்பரம் என முதலமைச்சர் ஸ்டாலினுக்கு கேள்வி எழுப்பினார். 

இதையும் படிங்க: இந்த பகுதி மக்களே விட்டுடாதீங்க.. நாளை ஒரே ஒரு வார்டில் 'உங்களுடன் ஸ்டாலின்' முகாம்..!!