தமிழகத்திற்கு நிதி ஒதுக்கல.. பாராளுமன்றத்தில் கேள்வி கேட்போம்..!! திருமா பரபரப்பு பேட்டி..!!

விடுதலை சிறுத்தைகள் கட்சியின் தலைவர் தொல். திருமாவளவன் சென்னையிலிருந்து டெல்லி நோக்கி விமானப் பயணம் மேற்கொண்டார். புறப்படுவதற்கு முன்னதாக சென்னை விமான நிலையத்தில் செய்தியாளர்களுக்கு அவர் அளித்த பேட்டியில், தற்போதைய பாராளுமன்ற கூட்டத் தொடரில் ஆளும் பாஜக அரசின் செயல்பாடுகளை கடுமையாக விமர்சித்தார்.

பாஜகவினர் பாராளுமன்றத்தை நடத்துவதற்கே உரிய விருப்பமின்றி செயல்படுவதாகக் குற்றஞ்சாட்டிய திருமாவளவன், எதிர்க்கட்சித் தலைவர்களுக்கு பேசுவதற்கான வாய்ப்பை மறுப்பதாகவும் தெரிவித்தார். பாராளுமன்ற விவாதங்களில் புத்தகங்கள், இதழ்கள் ஆகியவற்றிலிருந்து மேற்கோள்கள் காட்டி பேசுவது வழக்கமான நடைமுறை எனினும், காங்கிரஸ் தலைவர் ராகுல் காந்தி பேசும்போது வெளியிடப்படாத ஒரு நூலை சுட்டிக்காட்டியதை காரணமாகக் கூறி அவரைத் தடுத்து நிறுத்தியதாகவும், கடந்த வாரம் முழு கூட்டத் தொடரையே நடத்தாமல் விட்டதாகவும் விமர்சித்தார்.

இந்த வாரமும் அதே சூழல் தொடரும் என்று அவர் அச்சம் வெளியிட்டார். பேசுவதற்கான சூழல் கிடைத்தால், தமிழ்நாட்டுக்கு மத்திய அரசு நிதி ஒதுக்கீடு செய்யாமல் இருப்பது குறித்து கேள்வி எழுப்புவோம் என்று தெரிவித்த திருமாவளவன், கல்வி உள்ளிட்ட பல்வேறு துறைகளுக்கான நிதியை இதுவரை ஒதுக்காமல் வைத்திருப்பதாகக் குற்றம் சாட்டினார்.

இதையும் படிங்க: பதில் உரை ஆற்றாத பிரதமர்... ஜனநாயகத்திற்கே தலைகுனிவு..! திருமாவளவன் கண்டனம்..!

ஒவ்வொரு பட்ஜெட் கூட்டத் தொடரிலும் மாநிலங்களுக்கு கணிசமான நிதி ஒதுக்கீடு செய்யப்படும் போது, தமிழ்நாட்டுக்கு மட்டும் ஏன் இந்த ஓரவஞ்சனை என்ற கேள்வியை எழுப்புவோம் எனவும் அவர் வலியுறுத்தினார். பாஜக ஆளாத மாநிலங்களை திட்டமிட்டு புறக்கணிப்பதாகவும், நிதி ஒதுக்கீட்டில் வேண்டுமென்றே பாகுபாடு காட்டுவதாகவும் திருமாவளவன் குற்றஞ்சாட்டினார்.

தமிழ்நாடு இந்த பட்டியலில் முக்கிய இடம் பெற்றுள்ளது என்றும், மேற்கு வங்கம், கேரளா, கர்நாடகா, தெலுங்கானா போன்ற பிற எதிர்க்கட்சி ஆளும் மாநிலங்களுக்கும் இதே போன்ற ஓரவஞ்சனை நடைமுறையில் உள்ளது என்றும் அவர் சுட்டிக்காட்டினார்.

மத்திய அரசின் இத்தகைய அணுகுமுறை மாநிலங்களின் வளர்ச்சியைத் தடுப்பதோடு, கூட்டாட்சி கொள்கையையும் பலவீனப்படுத்துவதாக திருமாவளவன் கண்டனம் தெரிவித்தார். தமிழ்நாட்டு மக்களின் உரிமைகளுக்காகவும், நியாயமான நிதி ஒதுக்கீட்டுக்காகவும் பாராளுமன்றத்தில் குரல் கொடுப்போம் என்று உறுதியளித்த அவர், டெல்லி நோக்கிய பயணத்தைத் தொடர்ந்தார்.
 

இதையும் படிங்க: தமிழினமே கமல்ஹாசனை பாராட்டுது... பாஜககாரங்களுக்கு வயித்தெரிச்சல்...! திருமா. தாக்கு..!