விளாத்திகுளம் சிறுமி படுகொலை! 98 சிசிடிவி, 2574 அழைப்புகள் ஆய்வு - எஸ்.பி. மதன் அதிரடி விளக்கம்!

விளாத்திகுளம் அருகே சிறுமி படுகொலை செய்யப்பட்ட வழக்கில், எவ்வித அரசியல் அழுத்தமும் இன்றி, முற்றிலும் அறிவியல் பூர்வமான ஆதாரங்களின் அடிப்படையில் குற்றவாளி கைது செய்யப்பட்டுள்ளதாகத் தூத்துக்குடி மாவட்டக் காவல் கண்காணிப்பாளர் (SP) ஏ. மதன் இன்று விரிவான விளக்கம் அளித்துள்ளார்.

சம்பவம் நடந்த இடத்தில் நேரடியாக சிசிடிவி கேமராக்கள் இல்லை. இருப்பினும், அந்தப் பகுதியைச் சுற்றியுள்ள சாலைகள் மற்றும் கடைகளில் இருந்த 98 சிசிடிவி கேமராக்களையும் தனிப்படைகள் அமைத்துத் துல்லியமாக ஆய்வு செய்தோம். சம்பவம் நடந்த நேரத்தில் அந்தப் பகுதியில் பதிவான 2,574 செல்போன் எண்களின் அழைப்பு விபரங்களை சேகரித்து ஆய்வு செய்ததில் முக்கியத் தடயங்கள் கிடைத்தன.

குற்றப் பின்னணி கொண்ட 461 நபர்களிடம் விசாரணை நடத்தியதுடன், அந்த கிராமத்தைச் சேர்ந்த 800 ஆண்களிடம் தனித்தனியாக விசாரணை நடத்தினோம். இறுதியில் தர்ம முனீஸ்வரன் என்பவருக்கு இதில் தொடர்பிருப்பது உறுதி செய்யப்பட்டது. சிறுமி பாலியல் வன்கொடுமை செய்யப்பட்டு, அதன் பின்னரே படுகொலை செய்யப்பட்டுள்ளார் என்பது உடற்கூறாய்வு மற்றும் அறிவியல் பூர்வமான சோதனையில் உறுதியாகியுள்ளது.

இதையும் படிங்க: அதிமுக ஆட்சி அமைந்ததும் உரிய நடவடிக்கை! விளாத்திகுளம் மாணவி குடும்பத்தினருக்கு ஈபிஎஸ் உறுதி!

கைது செய்யப்பட்டுள்ள தர்ம முனீஸ்வரன் மீது போக்சோ (POCSO) மற்றும் கொலை வழக்குப்பதிவு செய்யப்பட்டுள்ளது. இந்த வழக்கில் இன்னும் சில தினங்களில் நீதிமன்றத்தில் குற்றப்பத்திரிகை (Charge Sheet) தாக்கல் செய்யப்பட்டு, விரைந்து தண்டனை பெற்றுத் தரப்படும்.

விளாத்திகுளம் பகுதியில் கடந்த வாரம் சிறுமி மாயமான நிலையில், அவர் சடலமாக மீட்கப்பட்டது அப்பகுதியில் பெரும் கொந்தளிப்பை ஏற்படுத்தியது. குற்றவாளியைத் தப்பிக்க வைக்க முயற்சி நடப்பதாகக் கூறி பொதுமக்கள் சாலை மறியலில் ஈடுபட்டனர். இந்நிலையில், எஸ்.பி. மதனின் இந்த விளக்கம் வதந்திகளுக்கு முற்றுப்புள்ளி வைத்துள்ளது.

இதையும் படிங்க: 41 குடும்பத்தோட சாபம் சும்மா விடுமா? - சிபிஐ வலையில் சிக்கிய விஜய்... வெளியானது ஷாக்கிங் வீடியோ... !!