விஜய்க்கு உரிய பாதுகாப்பு இல்லை! திமுக அரசு மீது தவெக நிர்வாகி ஆதவ் அர்ஜுனா கடும் சாடல்!

தமிழகச் சட்டமன்றத் தேர்தலில் பெரம்பூர் மற்றும் திருச்சி கிழக்கு தொகுதிகளில் போட்டியிடும் தமிழக வெற்றிக் கழகத் (தவெக) தலைவர் விஜய் அவர்களின் இன்றைய சென்னை பிரசாரத்தில் பாதுகாப்பு குளறுபடிகள் ஏற்பட்டுள்ளதாகப் புகார் எழுந்துள்ளது. இது குறித்துத் தவெக மாநில துணைப் பொதுச்செயலாளர் ஆதவ் அர்ஜுனா அவர்கள் செய்தியாளர்களிடம் பேசுகையில், திமுக அரசு திட்டமிட்டே தவெக-வின் பிரசாரத்தை முடக்கி வருவதாகக் குற்றம் சாட்டினார்.

பாதுகாப்புக் காரணங்களுக்காக இன்று மாலை நடைபெறவிருந்த வில்லிவாக்கம் பிரசாரத்தை விஜய் அவர்கள் ரத்து செய்துள்ளதாகத் தகவல்கள் தெரிவிக்கின்றன.

எங்கள் தலைவர் விஜய் அவர்களின் பிரசாரத்திற்கு உரிய பாதுகாப்பு வழங்கப்படவில்லை. காவல்துறையினர் இப்போதும் முதலமைச்சரின் பேச்சைக் கேட்டுத்தான் செயல்படுகிறார்கள் என்று ஆதவ் அர்ஜுனா சாடினார். நாங்கள் பலமுறை வேண்டுகோள் விடுத்தும் பிரசாரக் களத்திற்குப் பெண்கள் மற்றும் குழந்தைகள் அதிகளவில் வருகின்றனர். அவர்களைக் கட்டுப்படுத்தப் போதிய காவல்துறை பாதுகாப்பு இல்லை என்று அவர் தெரிவித்தார்.

இதையும் படிங்க: திமுக என்றால் டிபார்ட்மெண்டல் கட்சி! ஸ்டாலினின் தேர்தல் அறிக்கையை விளாசிய வானதி சீனிவாசன்!

தவெக-வின் எழுச்சியைக் கண்டு பயந்துபோயுள்ள திமுக அரசு, எங்களின் பிரசாரத்தை எப்படியாவது முடக்க வேண்டும் என்று திட்டமிட்டுச் செயல்படுகிறது என்று அவர் குற்றம் சாட்டினார். ஏற்கனவே கரூரில் நடந்த அசம்பாவிதம் போன்ற ஒரு சம்பவம் மீண்டும் நடந்துவிடக் கூடாது என்பதில் தலைவர் விஜய் உறுதியாக இருக்கிறார். அதனால்தான் பாதுகாப்பு அச்சுறுத்தல் காரணமாக வில்லிவாக்கம் பிரசாரத்தை ரத்து செய்துள்ளார் என்று அவர் விளக்கமளித்தார்.

நேற்று காரைக்குடியில் சீமான் அவர்களின் வாகனம் சோதனையிடப்பட்டபோது ஏற்பட்ட வாக்குவாதத்தைத் தொடர்ந்து, தற்போது விஜய்யின் பிரசார ரத்து மற்றும் பாதுகாப்பு குறித்த புகார்கள் தமிழக அரசியல் களத்தில் பெரும் சலசலப்பை ஏற்படுத்தியுள்ளன. இன்று மதியம் பெரம்பூர் தொகுதியில் விஜய் அவர்கள் திறந்த வாகனத்தில் பிரசாரம் செய்தபோது பல்லாயிரக்கணக்கான தொண்டர்கள் திரண்டது குறிப்பிடத்தக்கது.

வேட்புமனு தாக்கல் தொடங்கிய முதல் நாளிலேயே பாதுகாப்பு குறித்த இத்தகைய விவாதங்கள் எழுந்துள்ள நிலையில், தேர்தல் ஆணையம் தவெக-வின் புகார்கள் மீது எத்தகைய நடவடிக்கை எடுக்கப்போகிறது என்ற எதிர்பார்ப்பு எழுந்துள்ளது.

இதையும் படிங்க: இந்த முறை சூப்பர் ஸ்டார்! 525 வாக்குறுதிகளுடன் திமுக தேர்தல் அறிக்கையை வெளியிட்டார் முதலமைச்சர் மு.க.ஸ்டாலின்!