ஐசிசி 50 ஓவர் உலகக் கோப்பை 2027: ஆப்பிரிக்க மண்ணில் புதிய வடிவத்துடன் வரலாற்றுத் தொடர்..!!

அடுத்த ஆண்டு அக்டோபர் 4 முதல் நவம்பர் 21 வரை தென்ஆப்பிரிக்கா, ஜிம்பாப்வே மற்றும் நமீபியா ஆகிய மூன்று ஆப்பிரிக்க நாடுகளில் ஐசிசி ஆண்கள் 50 ஓவர் உலகக் கோப்பை தொடர் நடைபெற உள்ளது. 24 ஆண்டுகளுக்குப் பிறகு ஆப்பிரிக்காவுக்கு திரும்பும் இந்தப் பெரும் விழா, 2003-ல் தென்ஆப்பிரிக்கா-ஜிம்பாப்வே-கென்யாவில் நடைபெற்ற தொடருக்குப் பிறகு முதல்முறையாக இந்தக் கண்டத்தில் நடைபெறுகிறது. 

நமீபியா முதல்முறையாக மூத்த ஆண்கள் உலகக் கோப்பையை நடத்தும் வாய்ப்பைப் பெறுகிறது. போட்டிக்கான முழு அட்டவணை வருகிற அக்டோபர் 1-ஆம் தேதி ஐசிசி வெளியிட வாய்ப்புள்ளதாகத் தகவல்கள் தெரிவிக்கின்றன.

மொத்தம் 57 போட்டிகள் 12 மைதானங்களில் நடைபெறும். தென்ஆப்பிரிக்காவில் வொன்டரர்ஸ் (ஜோகன்னஸ்பர்க்), சென்சூரியன், நியூலாண்ட்ஸ் (கேப் டவுன்), கிங்ஸ்மீட் (டர்பன்) உள்ளிட்ட எட்டு மைதானங்களும், ஜிம்பாப்வேயில் ஹராரே, புலாவாயோ மற்றும் விக்டோரியா ஃபால்ஸில் உள்ள புதிய ஸ்டேடியமும், நமீபியாவில் விண்ட்ஹூக் மைதானமும் பயன்படுத்தப்படும். 

இதையும் படிங்க: மகளிர் கிரிக்கெட் சாம்பியன்ஸ் கோப்பை முதல் சீசன் இந்தியாவில் நடைபெறும்: ஐசிசி அதிகாரப்பூர்வ அறிவிப்பு!  

இறுதிப் போட்டி ஜோகன்னஸ்பர்க் வொன்டரர்ஸில் நடைபெற வாய்ப்புள்ளது.இந்திய அணியின் முன்னாள் தலைவர் விராட் கோலி, இந்தத் தொடரே தனது கடைசி உலகக் கோப்பை என அதிகாரப்பூர்வமாக அறிவித்துள்ளார். “இந்தியாவுக்காக நான் விளையாடும் கடைசி உலகக் கோப்பை இதுதான். முழுத் திறனையும் வெளிப்படுத்தி கோப்பையை வெல்வதே எனது இலக்கு” என அவர் தெரிவித்துள்ளார். இதனால் இந்தத் தொடருடன் சர்வதேச கிரிக்கெட்டில் இருந்து அவர் ஓய்வு பெற வாய்ப்புள்ளது என எதிர்பார்க்கப்படுகிறது.

14 அணிகள் பங்கேற்கும் இந்தத் தொடரில், சுவாரஸ்யத்தை அதிகரிக்கவும் போட்டிகளை அர்த்தமுள்ளதாக்கவும் ஐசிசி புதிய மூன்று நிலை வடிவத்தை அறிமுகப்படுத்தியுள்ளது. முதல் சுற்றில் (சூப்பர் சீரிஸ்) தகுதி பெற்ற 12 முதல் 14-வது இடத்தில் உள்ள மூன்று அணிகள் ரவுண்டு-ராபின் முறையில் விளையாடும். வெற்றியாளரே அடுத்த கட்டத்துக்குச் செல்லும். 

இரண்டாம் சுற்றில் 12 அணிகள் இரண்டு பிரிவுகளாகப் பிரிக்கப்பட்டு தலா ஆறு அணிகள் ரவுண்டு-ராபின் முறையில் போட்டியிடும் (30 போட்டிகள்). ஒவ்வொரு பிரிவிலும் முதல் மூன்று அணிகளும், இரு பிரிவுகளிலும் நான்காவது இடத்தில் உள்ள அணிகளில் சிறந்த அணியும் சேர்த்து ஏழு அணிகள் சூப்பர் 7 சுற்றுக்கு முன்னேறும். சூப்பர் 7-ல் (21 போட்டிகள்) ரவுண்டு-ராபின் முறையில் விளையாடி முதல் நான்கு அணிகள் அரையிறுதிக்குச் செல்லும். 

முதல் இடம் பிடித்த அணி நான்காவது அணியுடனும், இரண்டாவது அணி மூன்றாவது அணியுடனும் அரையிறுதியில் மோதும். இறுதியில் வெற்றியாளர் முடிவு செய்யப்படும். இந்தப் புதிய அமைப்பு ஒவ்வொரு போட்டியையும் முக்கியத்துவம் வாய்ந்ததாக மாற்றி, ரசிகர்களுக்கு அதிக சுவாரஸ்யத்தை வழங்கும் என ஐசிசி நம்புகிறது. ஆப்பிரிக்க மண்ணில் நடைபெறும் இந்த வரலாற்றுத் தொடர் உலகக் கிரிக்கெட் ரசிகர்களின் எதிர்பார்ப்பை உயர்த்தியுள்ளது.

இதையும் படிங்க: அதிரடி பேட்டிங்.. 250 ரன்கள்..!! துலீப் டிராபி பைனலில் இஷான் கிஷன் மாபெரும் சாதனை..!!