கூகுள் பே, போன் பே யூஸ் பண்றீங்களா..?? இனி பின் நம்பர் போட வேண்டாம்..!! விரைவில் வருகிறது புதிய வசதி..!!

இந்தியாவின் டிஜிட்டல் பணப்பரிவர்த்தனை உலகில் யுபிஐ (Unified Payments Interface) ஒரு புரட்சிகர மாற்றத்தை ஏற்படுத்தியுள்ளது. டீக்கடை முதல் பெரிய வணிக வளாகங்கள் வரை, QR கோடு ஸ்கேன் செய்து உடனடியாக பணம் செலுத்தும் வசதி இன்று அனைவரது வாழ்க்கையிலும் இன்றியமையாததாக மாறியுள்ளது. 

இந்நிலையில், தேசிய பேமென்ட்ஸ் கார்ப்பரேஷன் ஆஃப் இந்தியா (NPCI) மேலும் ஒரு முக்கியமான முன்னேற்றத்தை கொண்டு வர உள்ளது. அது, பாரம்பரிய UPI PIN இல்லாமல் பயோமெட்ரிக் அங்கீகாரம் மூலம் பணப்பரிவர்த்தனை செய்யும் வசதி. தற்போது, UPI மூலம் பணம் அனுப்ப அல்லது பெறும்போது 4 அல்லது 6 இலக்க ரகசிய PIN ஐ உள்ளிட வேண்டியது கட்டாயமாக உள்ளது. 

ஆனால், கூட்ட நெரிசலான இடங்களில், அவசர சூழலில் அல்லது PIN மறந்து விட்டால் பரிவர்த்தனை தோல்வியடைவது போன்ற சிரமங்கள் ஏற்படுகின்றன. இத்தகைய பிரச்சினைகளை தவிர்க்கவும், பயனர்களின் அனுபவத்தை மேலும் எளிமையாக்கவும் NPCI பயோமெட்ரிக் தொழில்நுட்பத்தை அறிமுகப்படுத்தப்படவுள்ளது.

இதையும் படிங்க: மார்கெட்டிற்கு புதுசு..!! அறிமுக சலுகைகளுடன் விற்பனை START..!! என்ன மாடல்.. என்ன விலை தெரியுமா..??

இப்புதிய வசதியின் மூலம், ஸ்மார்ட்போன்களில் உள்ள கைரேகை சென்சார் அல்லது முக அங்கீகாரம் (Face ID) ஐப் பயன்படுத்தி PIN ஐ உள்ளிடாமலேயே பணப்பரிவர்த்தனையை உறுதிப்படுத்த முடியும். இது குறிப்பாக சிறிய தொகை பரிவர்த்தனைகளுக்கு (தற்போதைய விதிகளின்படி ₹5,000 வரை) பயன்படுத்தப்படுகிறது. ₹5,000 க்கு மேற்பட்ட தொகைகளுக்கு இன்னும் பாரம்பரிய PIN தேவைப்படும், இதன்மூலம் உயர் பாதுகாப்பு உறுதி செய்யப்படுகிறது.

இந்த அமைப்பு ஆன்-டிவைஸ் பயோமெட்ரிக் அங்கீகாரத்தை அடிப்படையாகக் கொண்டது. அதாவது, உங்கள் தொலைபேசியின் உள்ளமைந்த பாதுகாப்பு அம்சங்களைப் பயன்படுத்தி பரிவர்த்தனை உறுதிப்படுத்தப்படுகிறது. இதனால், PIN ஐ பொது இடங்களில் டைப் செய்யும் போது ஏற்படும் திருட்டு அபாயம் குறையும். மேலும், கைரேகை மற்றும் முக அடையாளம் தனிநபருக்கு தனித்துவமானவை என்பதால், மோசடி செய்வது மிகவும் கடினமாகிறது. இது சைபர் குற்றங்களை கணிசமாக குறைக்கும் வாய்ப்பை உருவாக்குகிறது.

ஏற்கனவே UPI லைட் என்ற வசதி சிறிய தொகை பரிவர்த்தனைகளுக்கு PIN இல்லாமல் செயல்பட உதவுகிறது. ஆனால் அதற்கு முன்கூட்டியே வாலட்டில் பணம் ஏற்ற வேண்டும். புதிய பயோமெட்ரிக் முறை நேரடியாக வங்கிக் கணக்கிலிருந்து பணத்தை எடுக்க அனுமதிக்கிறது, இதனால் வசதி மேலும் அதிகரிக்கிறது. இந்த வசதி அக்டோபர் 2025 முதல் படிப்படியாக அறிமுகப்படுத்தப்பட்டு வருகிறது

PhonePe போன்ற பிரபல ஆப்கள் ஏற்கனவே Android சாதனங்களில் இதை செயல்படுத்தியுள்ளன. iOS ஆதரவு விரைவில் வரவுள்ளது. BHIM உள்ளிட்ட பிற UPI ஆப்களிலும் இது விரைவில் முழுமையாக கிடைக்கும் என NPCI தெரிவித்துள்ளது. குறைந்த விலை ஸ்மார்ட்போன்களிலும் இது சீராக இயங்குவதை உறுதி செய்ய சோதனைகள் நடைபெற்று வருகின்றன. 

இந்திய ரிசர்வ் வங்கியின் வழிகாட்டுதல்களின்படி, அனைத்து பாதுகாப்பு சோதனைகளும் முடிந்த பின்னரே இது முழுமையாக செயல்படுத்தப்படும். இந்த மாற்றம் இந்திய டிஜிட்டல் பொருளாதாரத்தை மேலும் வலுப்படுத்தும். பயனர்கள் விரைவாகவும், பாதுகாப்பாகவும், எளிதாகவும் பணப்பரிவர்த்தனை செய்ய முடியும். UPI-யின் இந்த புதிய அத்தியாயம், இந்தியாவை உலகின் முன்னணி டிஜிட்டல் பேமென்ட் நாடாக தொடர்ந்து உயர்த்தும் என எதிர்பார்க்கப்படுகிறது.