சென்னை: அ.தி.மு.க.வில் ஏற்பட்டுள்ள உட்கட்சி பிளவுக்குப் பிறகு, பொதுச்செயலர் எடப்பாடி பழனிசாமி தரப்பில் புதிய செய்தி சேனல் ஒன்றை தொடங்க முடிவு செய்யப்பட்டுள்ளது. இந்த சேனலுக்கு ‘அம்மா நியூஸ்’ என்ற பெயர் சூட்ட திட்டமிடப்பட்டுள்ளதாகக் கட்சி வட்டாரங்கள் தெரிவித்துள்ளன.

அ.தி.மு.க. ஆளுங்கட்சியாக இருந்தபோது ‘நியூஸ் ஜெ’ சேனல் தொடங்கப்பட்டது. முன்னாள் அமைச்சர்கள் சி.வி. சண்முகம், எஸ்.பி. வேலுமணி உள்ளிட்டோர் அதன் நிர்வாகத்தில் முக்கியப் பங்கு வகித்தனர். ஆனால், சமீபத்தில் கட்சி இரண்டாகப் பிளவுபட்ட பிறகு நிலைமை மாறியது. பழனிசாமி, சண்முகம் மற்றும் வேலுமணி உள்ளிட்டோரை கட்சி பொறுப்புகளில் இருந்து நீக்கியதைத் தொடர்ந்து, ‘நியூஸ் ஜெ’ சேனலை வேலுமணி-சண்முகம் தரப்பினர் கட்டுப்பாட்டுக்குள் கொண்டு வந்துள்ளனர்.

நேற்று முன்தினம் முதல் ‘நியூஸ் ஜெ’ சேனல் பழனிசாமி தரப்பு செய்திகளை புறக்கணித்து, அவருக்கு எதிரான செய்திகளை முன்னிலைப்படுத்தி ஒளிபரப்பத் தொடங்கியுள்ளது. இதனால் தங்கள் கட்சி நிலைப்பாட்டை மக்களுக்கு சரியாக எடுத்துச் செல்ல முடியாத நிலை ஏற்பட்டுள்ளதாக பழனிசாமி தரப்பினர் கருதுகின்றனர்.

இதையும் படிங்க: ரூ.10.கோடி வரை பேரம்! எடப்பாடி தரப்பு எம்.எல்.ஏ-வுக்கு வலை! வேலுமணி தரப்பு அதிரடி!

இதையடுத்து, புதிய சேனல் தொடங்கும் முடிவுக்கு வந்துள்ளனர். தற்போது நஷ்டத்தில் இயங்கும் ஒரு செய்தி சேனலை விலைக்கு பேசி வருவதாகத் தகவல்கள் வெளியாகியுள்ளன. சேலம் புறநகர் மாவட்ட செயலர் இளங்கோவன் உள்ளிட்ட முக்கிய நிர்வாகிகள் இந்தப் பணியை முன்னெடுத்து வருகின்றனர்.

அ.தி.மு.க. மூத்த நிர்வாகி ஒருவர் கூறுகையில், “ஜெயலலிதா மறைவுக்குப் பிறகு ஜெயா டிவி சசிகலா தரப்புக்கு ஆதரவாகச் செயல்பட்டதால், நியூஸ் ஜெ சேனலை தொடங்கினோம். தற்போது அந்த சேனலும் எதிர் தரப்பிடம் சென்றுவிட்டது. எனவே, கட்சியின் உண்மையான குரலை மக்களிடம் கொண்டு செல்ல ‘அம்மா நியூஸ்’ என்ற புதிய சேனலை விரைவில் தொடங்கவுள்ளோம்” என்றார்.

அ.தி.மு.க.வின் இந்த நடவடிக்கை கட்சியின் உட்கட்சி யுத்தத்தை மேலும் தீவிரப்படுத்தும் என அரசியல் வட்டாரங்கள் கருதுகின்றன. புதிய சேனல் எப்போது தொடங்கப்படும் என்பது விரைவில் அறிவிக்கப்படும் என எதிர்பார்க்கப்படுகிறது.

இதையும் படிங்க: அதிமுகவில் உட்கட்சி பிளவு உச்சம்! தவெகவுக்கு தாவும் நிர்வாகிகள்! செங்கோட்டையன் அசைன்மென்ட் சக்சஸ்!