தெலுங்கு திரையுலகில் இந்த ஆண்டின் மிகப் பெரிய எதிர்பார்ப்புக்குரிய திரைப்படங்களில் ஒன்றாக வெளியான படம் ‘மன சங்கர வர பிரசாத் காரு’. மெகாஸ்டார் சிரஞ்சீவி நடிப்பில், பிரபல இயக்குநர் அனில் ரவிபுடி இயக்கத்தில் உருவாகியுள்ள இந்த படம், இன்று திரையரங்குகளில் வெளியாகி ரசிகர்கள் மத்தியில் நல்ல வரவேற்பை பெற்றுவருகிறது. சிரஞ்சீவியின் 157-வது திரைப்படம் என்பதே இந்த படத்திற்கு கூடுதல் முக்கியத்துவத்தை ஏற்படுத்தியுள்ளது.

அனில் ரவிபுடி என்றாலே, வணிக அம்சங்களோடு கூடிய குடும்ப ரசிகர்களை கவரும் கதைகள் நினைவுக்கு வரும். சமீபத்தில் அவர் இயக்கிய ‘பகவந்த் கேசரி’ திரைப்படம் மிகப்பெரிய வெற்றியை பெற்றிருந்த நிலையில், அதே இயக்குநர் சிரஞ்சீவியை வைத்து படம் இயக்குகிறார் என்ற அறிவிப்பே ரசிகர்களிடையே பெரும் எதிர்பார்ப்பை உருவாக்கியது. அதிலும், நீண்ட இடைவெளிக்குப் பிறகு நயன்தாரா சிரஞ்சீவியுடன் இணைந்து நடித்திருப்பது, இப்படத்தின் மீதான ஆர்வத்தை மேலும் அதிகரித்தது.

இந்த படத்தை, சுஷ்மிதா கொனிடேலா நடத்தும் கோல்ட் பாக்ஸ் எண்டர்டெயின்மென்ட்ஸ் நிறுவனத்துடன் இணைந்து, ஷைன் ஸ்கிரீன்ஸ் பேனரின் கீழ் சாஹு கரபதி தயாரித்துள்ளார். பெரிய பட்ஜெட், பிரமாண்டமான தயாரிப்பு மதிப்பு, நட்சத்திர நடிகர்கள் என அனைத்து அம்சங்களையும் கொண்ட ஒரு முழு வணிகப் படமாக ‘மன சங்கர வர பிரசாத் காரு’ உருவாகியுள்ளது. படத்தில் கேத்தரின் தெரசா முக்கிய வேடத்தில் நடித்துள்ளார். மேலும், ரசிகர்களுக்கு சர்ப்ரைஸ் அளிக்கும் வகையில் வெங்கடேஷ் ஒரு சிறப்பு கேமியோ ரோலில் தோன்றியுள்ளார் என்பதும் குறிப்பிடத்தக்கது.

இதையும் படிங்க: இழுத்தடித்த தணிக்கை குழு.. சாதகமாக்கி கொண்ட படக்குழு..! போட்டியே இல்லாமல் பொங்கலுக்கு களமிறங்கும் 'வா வாத்தியார்'..!

படத்தின் இசையை பீம்ஸ் செசிரோலியோ அமைத்துள்ளார். அவரது பின்னணி இசையும் பாடல்களும் படத்தின் உணர்ச்சிப்பூர்வமான காட்சிகளுக்கும், வணிக அம்சங்களுக்கும் வலு சேர்த்துள்ளதாக ரசிகர்கள் கருத்து தெரிவித்து வருகின்றனர். குறிப்பாக, சிரஞ்சீவியின் அறிமுக காட்சிகளுக்கும், முக்கியமான திருப்பங்களுக்கும் இசை பெரிய பிளஸ் பாயிண்டாக அமைந்துள்ளதாக கூறப்படுகிறது.

இன்று வெளியான இந்த படம், முதல் காட்சியிலிருந்தே ரசிகர்களின் ஆதரவை பெற்றுவருகிறது. குடும்ப ரசிகர்கள், மெகாஸ்டார் ரசிகர்கள் என பல தரப்பினரும் படத்தை கொண்டாடி வருகின்றனர். அதே சமயம், சமூக வலைதளங்களில் சில நெகட்டிவ் விமர்சனங்கள் மற்றும் திட்டமிட்ட விமர்சன தாக்குதல்கள் இருப்பதாக படக்குழு கவனத்தில் எடுத்துள்ளது. இதனைத் தொடர்ந்து, படக்குழு ஒரு முக்கியமான மற்றும் சர்ச்சைக்குரிய முன்னெடுப்பை எடுத்துள்ளது.

அதாவது, டிக்கெட் முன்பதிவு தளங்களில் வழங்கப்படும் ரேட்டிங் மற்றும் கருத்துகள் ஆகியவற்றை பதிவு செய்ய முடியாதபடி நீதிமன்றத்தின் மூலம் தடை பெற்றுள்ளதாக படக்குழு அறிவித்துள்ளது. பொதுவாக, இந்த முன்பதிவு தளங்களில் கொடுக்கப்படும் ரேட்டிங் மற்றும் கருத்துகள் பல நேரங்களில் போலியானவை, அல்லது திட்டமிட்டு ஒரு படத்தை குறிவைத்து பதிவிடப்படுபவை என்ற குற்றச்சாட்டு நீண்ட காலமாக இருந்து வருகிறது. குறிப்பாக, பெரிய நட்சத்திர நடிகர்களின் படங்கள் வெளியாகும் போது, முதல் நாளிலேயே குறைந்த ரேட்டிங் கொடுத்து படத்தின் இமேஜை பாதிக்கும் முயற்சிகள் நடைபெறுவதாக தயாரிப்பாளர்கள் தரப்பில் கூறப்படுகிறது.

இந்த சூழ்நிலையை கருத்தில் கொண்டு தான், ‘மன சங்கர வர பிரசாத் காரு’ படக்குழு இந்த முடிவை எடுத்துள்ளதாக தகவல்கள் தெரிவிக்கின்றன. இதன் மூலம், படத்திற்கெதிரான நெகட்டிவ் பிரச்சாரம் மற்றும் டிஜிட்டல் தாக்குதல்கள் பெருமளவு குறைய வாய்ப்பு இருப்பதாக திரையுலக வட்டாரங்கள் கருதுகின்றன. அதே நேரத்தில், இது கருத்து சுதந்திரத்தை பாதிக்குமா என்ற விவாதங்களும் எழுந்துள்ளன. இந்த முன்னெடுப்புக்கு ஆதரவாக, தெலுங்கு திரையுலகின் முன்னணி நடிகர் விஜய் தேவரக்கொண்டா வெளிப்படையாக தனது ஆதரவை தெரிவித்துள்ளார். அவர் தனது எக்ஸ் பக்கத்தில் வெளியிட்டுள்ள நீண்ட பதிவில், இந்த விவகாரம் குறித்து ஆழமான கருத்துகளை பகிர்ந்துள்ளார். அந்த பதிவில், “இந்த முன்னெடுப்பை கண்டு மகிழ்ச்சியாகவும் வருத்தமாகவும் இருக்கிறது.

பலரின் கடின உழைப்பையும், கனவுகளையும், பணத்தையும் பாதுகாக்கும் முயற்சியாக இது இருப்பதைப் பார்க்கும்போது மகிழ்ச்சியாக இருக்கிறது. ஆனால், அதே சமயம் நம் சொந்த மக்களே இதுபோன்ற பிரச்சனைகளை உருவாக்குகிறார்கள் என்ற யதார்த்தத்தைப் பார்த்து வருத்தமாகவும் இருக்கிறது” என்று அவர் குறிப்பிட்டுள்ளார். மேலும், “‘வாழு, வாழ விடு’ என்ற கொள்கைக்கும், அனைவரும் ஒன்றிணைந்து வளர்வோம் என்ற எண்ணத்துக்கும் என்ன ஆனது?” என கேள்வி எழுப்பியுள்ள விஜய் தேவரக்கொண்டா, தனது ‘டியர் காம்ரேட்’ படத்தின் போது சந்தித்த அனுபவங்களையும் பகிர்ந்துள்ளார். அந்த படத்தின் வெளியீட்டின்போது, திட்டமிட்ட தாக்குதல்கள் மற்றும் நெகட்டிவ் அரசியல் எப்படி செயல்பட்டது என்பதை அவர் முதல் முறையாக அப்போது உணர்ந்ததாக கூறியுள்ளார்.

அதில் “ஒரு நல்ல படத்தை யாராலும் தடுக்க முடியாது” என்று சொல்லப்பட்டாலும், அதன்பிறகு தன்னுடன் படம் தயாரித்த ஒவ்வொரு தயாரிப்பாளரும், இயக்குநரும் இந்த பிரச்சனையின் தீவிரத்தை உணர்ந்ததாகவும் அவர் தெரிவித்துள்ளார். “இதுபோன்ற செயல்களில் ஈடுபடும் மனிதர்கள் யார்? பலரின் கனவுகளைப் பாதுகாக்க அவர்களை எப்படி எதிர்கொள்வது?” என்று யோசித்து பல இரவுகள் தூங்காமல் இருந்ததாகவும், இப்போது இந்த பிரச்சனை வெளிப்படையாக நீதிமன்றம் வரை வந்திருப்பதில் மகிழ்ச்சி அடைவதாகவும் விஜய் தேவரக்கொண்டா கூறியுள்ளார். மேலும், “பெரிய நடிகர்களின் படங்களுக்குக் கூட இவ்வளவு பெரிய அச்சுறுத்தல் இருக்கிறது என்பதை நீதிமன்றம் அங்கீகரித்திருப்பது முக்கியமான விஷயம். இது முழுமையான தீர்வு அல்ல.. ஆனால் நம் கவலையை குறைத்திருக்கிறது” என்று தனது பதிவை முடித்துள்ளார்.

மொத்தத்தில், ‘மன சங்கர வர பிரசாத் காரு’ திரைப்படம், திரையரங்குகளில் நல்ல வரவேற்பை பெறுவதோடு மட்டுமல்லாமல், டிஜிட்டல் விமர்சன கலாச்சாரம், போலி ரேட்டிங், திட்டமிட்ட நெகட்டிவ் பிரச்சாரம் போன்ற விவகாரங்களை மீண்டும் தேசிய அளவில் விவாதத்துக்கு கொண்டு வந்துள்ளது. இந்த முன்னெடுப்பு, எதிர்காலத்தில் பிற தயாரிப்பாளர்களும் பின்பற்றும் ஒரு முன்னுதாரணமாக மாறுமா, அல்லது புதிய சர்ச்சைகளுக்கு வழிவகுக்குமா என்பதை காலமே தீர்மானிக்க வேண்டும். தற்போது, அனைத்து கவனமும் ‘மன சங்கர வர பிரசாத் காரு’ படம் திரையரங்குகளில் தனது வெற்றிப் பயணத்தை எந்த அளவுக்கு தொடரும் என்பதிலேயே குவிந்துள்ளது.

இதையும் படிங்க: 'ஜனநாயகன்' தலையெழுத்தை மாற்ற நாள் குறித்த உச்சநீதிமன்றம்..! படபடப்பில் விஜய் ரசிகர்கள்..!