மகாகும்பமேளாவில் பணியில் இருந்த 75 ஆயிரம் போலீசாருக்கு முதல்வர் யோகி ஆதித்யநாத் அற்புதமான பரிசு வழங்கியுள்ளார்.
இயற்கை பேரிடர் காலங்களில் கூட காவல்துறையினர் தங்களது உயிரையும் பொருட்படுத்தாமல் பொதுமக்களைப் பாதுகாக்க தங்கள் கடமைகளைச் செய்கிறார்கள். காவல்துறையின் பங்கு இல்லாமல் எந்த திட்டமும் வெற்றிபெற முடியாது. சட்டம் ஒழுங்கு போன்ற மிக முக்கியமான பகுதியில் ஏற்படும் சிறிய தவறு கூட கற்பனை செய்ய முடியாத சேதத்தை ஏற்படுத்தும்.
75 ஆயிரம் காவலர்களுக்கு பாராட்டு:
கோடிக்கணக்கான மக்கள் கலந்து கொண்ட மகா கும்பமேளாவின் ஆரம்பம் முதல் இறுதி வரை பொறுமை, ஒழுக்கம் மற்றும் பொறுப்புணர்வுடன் காவல்துறையினர் தங்கள் கடமைகளைச் செய்து அசத்தியுள்ளனர்.
இதையும் படிங்க: மகாகும்பமேளாவில் புனித நீராட நாளையே கடைசிநாள்... 45 நாள் கொண்டாட்டம் நிறைவுக்கு வருகிறது....
பிரயாக்ராஜில் 45 நாட்கள் நடைபெற்ற மகாகும்பமேளா அமைதியாக முடிந்தது. உத்தரபிரதேச அரசு அனைத்து துறைகளின் ஒருங்கிணைப்புடன் இந்த மகா திருவிழாவை வெற்றிகரமாக ஏற்பாடு செய்தது. இருப்பினும், கும்பமேளாவை வெற்றிகரமாக மாற்றுவதில் காவல்துறையினரின் பங்கு விலைமதிப்பற்றது என்று கூறி, உத்தரப் பிரதேச முதல்வர் யோகி ஆதித்யநாத் அவர்களைப் பாராட்டியுள்ளார்.
ஒன்றரை மாத கால கொண்டாட்டங்களின் முக்கிய பகுதியாக கோடிக்கணக்கான பக்தர்களைக் கட்டுப்படுத்துவதிலும் சட்டம் ஒழுங்கைப் பராமரிப்பதிலும் காவல்துறையின் ஒழுக்கமான அணுகுமுறையை பின்பற்றியதாக பாராட்டிய அவர், இந்தச் சூழலில், கும்பமேளா கடமைகளில் பங்கேற்ற கிட்டத்தட்ட 75,000 காவல்துறை அதிகாரிகளுக்கு தலா ரூ.10,000 சிறப்பு போனஸை அறிவித்துள்ளார்.
அத்துடன் ஊழியர்களின் சேவைகளைப் பாராட்டி 'மஹாகும்ப் சேவா பதக்கம்' வழங்கப்படும் என அறிவித்துள்ள யோகி, அவர்களுக்கு ஒவ்வொரு கட்டமாக ஒரு வார விடுமுறைகள் வழங்கப்படும் என்றும் அறிவித்துள்ளார். மேலும் கும்ப மேளாவில் பணியாற்றிய காவலர்களுடன் அமர்ந்து முதலமைச்சர் மதிய உணவு அருந்தினார்.
கும்பமேளாவில் குவிந்த மக்கள்:
மௌனி அமாவாசை நாளில் பக்தர்களை திறம்பட கட்டுப்படுத்துவதிலும், தீ விபத்துகளின் போது உயிர் இழப்பைத் தடுக்க விரைவாகச் செயல்படுவதிலும் பாதுகாப்புப் படையினரின் கூட்டு முயற்சிகளை உத்தரப் பிரதேச முதல்வர் பாராட்டினார்.
“மகா கும்பமேளா வெறும் மத கொண்டாட்டம் அல்ல. நிதிப் பிரச்சினைகளும் இதில் அடங்கும். கும்பமேளாவிற்காக பிரயாக்ராஜில் உள்கட்டமைப்பு மேம்பாட்டிற்காக மாநில அரசு ரூ.7,500 கோடியை செலவிட்டது. அதற்கு ஈடாக, பொருளாதாரத்தில் ரூ.3.5 லட்சம் கோடி சேர்க்கப்பட்டுள்ளது. மேளாவில் பங்கேற்றவர்களால் மட்டுமே இந்த நிகழ்வின் அளவைப் புரிந்து கொள்ள முடியும். எங்காவது உட்கார்ந்து எதிர்மறையான கருத்துக்களைச் சொல்வது மிகவும் எளிது” என்று உத்தரப் பிரதேச முதல்வர் கருத்து தெரிவித்துள்ளார்.
ஜனவரி 13 ஆம் தேதி புஷ்ய பௌர்ணமி நாளில் தொடங்கிய மஹாகும்பமேளாவிற்கு நாடு முழுவதிலுமிருந்து மட்டுமல்ல, வெளிநாடுகளிலிருந்தும் பக்தர்கள் திரண்டனர். கங்கை, யமுனை மற்றும் சரஸ்வதி நதிகள் சந்திக்கும் திரிவேணி சங்கமத்தில் புனித நீராட 66 கோடிக்கும் அதிகமான மக்கள் அங்கு சென்றனர். யாத்ரீகர்கள் எந்த சிரமத்தையும் சந்திக்காமல் இருக்க உத்தரபிரதேச அரசு சிறப்பு ஏற்பாடுகளைச் செய்துள்ளது. எந்த பிரச்சனையும் ஏற்படாமல் இருக்க பல முன்னெச்சரிக்கைகள் எடுக்கப்பட்டன. துப்புரவுப் பணியாளர்களின் சேவைகள் அளப்பரியவை. எங்கும் எந்த அசுத்தமும் இல்லை என்பதை உறுதிசெய்து, இரவும் பகலும் 24 மணி நேரமும் 15,000 பேர் பணியில் ஈடுபட்டனர். இது கின்னஸ் உலக சாதனையிலும் இடம் பெற்றுள்ளது. அவர்களின் சேவைகளைப் பாராட்டும் விதமாகவும் உத்தரப்பிரதேச அரசு போனஸை அறிவித்துள்ளது குறிப்பிடத்தக்கது.
இதையும் படிங்க: 55 கோடி பேர் புனித நீராடல் என்பது சுத்தப் பொய்..! புதிய சர்ச்சையை கிளப்பும் பிரசாந்த் கிஷோர்..!