நவீன சந்தைச் சூழலில், ஒரு உணவுப் பொருளைத் தேர்வு செய்ய வாடிக்கையாளர்கள் செலவிடும் நேரம் வெறும் 6 முதல் 10 விநாடிகள் மட்டுமே என்று பல ஆய்வுகள் தெரிவிக்கின்றன. பெரும்பாலானோர் காலாவதி தேதி மற்றும் விலையை மட்டும் பார்த்து வாங்கிவிடுகின்றனர். ஆனால், பொருளின் பின்புற லேபிளில் உள்ள முக்கிய தகவல்களைப் புரிந்துகொண்டால், பல உணவுப் பொருட்களை வாங்காமலேயே தவிர்த்துவிடலாம்.

இந்திய உணவுப் பாதுகாப்பு மற்றும் தர நிர்ணய ஆணையம் (FSSAI) நிர்ணயித்துள்ள விதிமுறைகளின்படி, உணவுப் பாக்கெட்டுகளில் ஊட்டச்சத்து விவரங்கள் கட்டாயம் இடம்பெற வேண்டும். இந்தத் தகவல்கள் பெரும்பாலும் சிக்கலான சொற்களிலும் சதவீதங்களிலும் கொடுக்கப்படுவதால், பொதுமக்களுக்கு புரியாமல் போகிறது. எனினும், இவற்றைப் படிக்கக் கற்றுக்கொண்டால், உணவின் தரத்தை எளிதில் மதிப்பிட முடியும். இந்தியாவில் உணவு லேபிளிங், ஒரு ஆரோக்கியமான நபரின் தினசரி உணவுத் தேவையை 2,000 கிலோகலோரிகளாகக் கருதி தயாரிக்கப்படுகிறது. 

இதை அடிப்படையாகக் கொண்டு பரிந்துரைக்கப்பட்ட ஊட்டச்சத்து அளவுகள் (RDA) நிர்ணயிக்கப்படுகின்றன. உதாரணமாக, ஒரு நாளைக்கு 130 கிராம் கார்போஹைட்ரேட் பரிந்துரைக்கப்படுகிறது. ஒரு 30 கிராம் பதப்படுத்தப்பட்ட வேர்க்கடலைப் பாக்கெட்டில் 24 சதவீதம் கார்போஹைட்ரேட் இருப்பதாக லேபிளில் குறிப்பிடப்பட்டிருந்தால், அது தினசரி தேவையில் சுமார் 18 சதவீதத்தை நிறைவு செய்கிறது. 100 கிராம் சாப்பிட்டால், அன்றைய கார்போஹைட்ரேட் தேவையில் பெரும் பகுதி நிரம்பிவிடும். மீதி உணவுகளுடன் சேர்த்தால் எளிதில் வரம்பைத் தாண்டிவிடும் அபாயம் உள்ளது. 

சர்விங் சைஸ் முக்கியம்: லேபிளில் முதலில் ‘சர்விங் சைஸ்’ (பரிமாறும் அளவு) குறிப்பிடப்பட்டிருக்கும். மற்ற அனைத்து ஊட்டச்சத்து விவரங்களும் இந்த அளவை அடிப்படையாகக் கொண்டவை. இந்தியாவில் பெரும்பாலும் 100 கிராம் அடிப்படையில் தகவல்கள் தரப்படுகின்றன. நீங்கள் அதைவிட அதிக அளவு உட்கொண்டால், ஊட்டச்சத்துகளும் அதற்கேற்ப அதிகரிக்கும். பொருட்களின் பட்டியல் இறங்கு வரிசையில் (அதிக அளவு முதல் குறைவு வரை) அமையும். எனவே முதல் இரு-மூன்று பொருட்களை கவனித்தால் உணவின் முக்கிய அமைப்பை அறியலாம்.

கவனம் செலுத்த வேண்டிய நான்கு ‘கெட்ட’ கூறுகள்: மொத்த கொழுப்பு, நிறைவுற்ற கொழுப்பு (Saturated Fat), சோடியம் (உப்பு) மற்றும் சர்க்கரை. இவை அதிகமாக இருந்தால் எடை அதிகரிப்பு, ரத்த அழுத்தம், இதய நோய் மற்றும் பக்கவாத அபாயம் அதிகரிக்கும். டிரான்ஸ் ஃபேட் போன்றவற்றையும் சரிபார்க்கவும். ஊட்டச்சத்து லேபிளைப் படிக்கும் பழக்கத்தை வளர்த்துக்கொள்ளுங்கள். வைட்டமின்கள், தாதுக்கள் போதுமான அளவில் உள்ளதா, சேர்க்கைகள் அதிகமா என்பதை அறிந்து ஆரோக்கியமான தேர்வு செய்யுங்கள். உங்கள் உடல்நலம் உங்கள் கையில்!