மத்திய கிழக்கில் ஈரான் - அமெரிக்கா - இஸ்ரேல் இடையே நடைபெற்று வரும் போர் இந்தியர்களின் உயிரையும் பறிக்கத் தொடங்கியுள்ளது. சவுதி அரேபியாவில் மேலும் ஒரு இந்தியர் ஏவுகணை தாக்குதலில் உயிரிழந்ததையடுத்து, இந்தப் போரில் உயிரிழந்த இந்தியர்களின் எண்ணிக்கை 6ஆக உயர்ந்துள்ளது.

ஈரான், அமெரிக்க ராணுவத் தளங்கள் அமைந்துள்ள ஐக்கிய அரபு எமிரேட்ஸ், கத்தார், குவைத், சவுதி அரேபியா உள்ளிட்ட நாடுகளை குறிவைத்து ஏவுகணை மற்றும் ட்ரோன் தாக்குதல்களை தொடர்ந்து நடத்தி வருகிறது. இந்தத் தாக்குதல்களால் ஏற்கனவே ஓமன் மற்றும் சவுதி அரேபியாவில் வேலை செய்து கொண்டிருந்த ஐந்து இந்தியர்கள் உயிரிழந்திருந்தனர்.

இந்நிலையில், சவுதி அரேபியாவின் தலைநகர் ரியாத்தை நோக்கி ஈரான் அனுப்பிய ஏவுகணைகளை சவுதி பாதுகாப்புப் படையினர் சுட்டு வீழ்த்தினர். அப்போது விழுந்த ஏவுகணை பாகங்கள் ஒரு கட்டிடத்தின் மீது விழுந்ததில், அங்கு பணியாற்றி வந்த இந்திய இளைஞர் ஒருவர் சம்பவ இடத்திலேயே உயிரிழந்தார். இதனால் இந்தப் போரில் உயிரிழந்த இந்தியர்களின் மொத்த எண்ணிக்கை 6 ஆக அதிகரித்துள்ளது.

இதையும் படிங்க: ஈரான் தாக்குதலில் இந்தியர் 3 பேர் பலி!! 20 பேர் காயம்!! எண்ணெய் டேங்கர் கப்பலை சுக்குநூறாக்கிய ட்ரோன்!!

மத்திய கிழக்கு நாடுகளில் லட்சக்கணக்கான இந்தியர்கள் வேலை செய்து வரும் நிலையில், ஈரான் தொடர்ந்து நடத்தும் தாக்குதல்கள் அவர்களின் உயிருக்கு பெரும் அச்சுறுத்தலாக மாறியுள்ளது. குறிப்பாக, கட்டுமானத் துறை, எண்ணெய் தொழிற்சாலைகள், சேவைத் துறை ஆகியவற்றில் பணியாற்றும் இந்தியர்கள் அதிக அளவில் பாதிக்கப்படும் அபாயம் உள்ளது.

இந்திய வெளியுறவு அமைச்சகம் ஏற்கனவே மேற்காசிய நாடுகளில் உள்ள இந்தியர்களுக்கு எச்சரிக்கை விடுத்துள்ளது. தேவையில்லாத பயணங்களைத் தவிர்க்கவும், பாதுகாப்பான இடங்களில் தங்குமாறும் அறிவுறுத்தியுள்ளது. இருப்பினும், போர் மேலும் தீவிரமடைந்தால் இந்தியர்களின் உயிரிழப்பு எண்ணிக்கை இன்னும் அதிகரிக்கும் என அஞ்சப்படுகிறது.

ஈரான் - இஸ்ரேல் - அமெரிக்கா இடையேயான இந்த மோதல் விரைவில் முடிவுக்கு வர வேண்டும் என்று உலக நாடுகள் வலியுறுத்தி வருகின்றன. ஆனால், தற்போதைய நிலவரப்படி போர் முடிவுக்கு வரும் அறிகுறி இல்லாததால், வெளிநாட்டு தொழிலாளர்களுக்கு ஏற்படும் ஆபத்து நாளுக்கு நாள் அதிகரித்து வருகிறது.

இந்திய அரசு தனது குடிமக்களின் பாதுகாப்புக்கு முன்னுரிமை அளித்து, தேவையான நடவடிக்கைகளை உடனடியாக எடுக்க வேண்டும் என்று குடும்பத்தினர் வலியுறுத்தி வருகின்றனர். 

இதையும் படிங்க: ஹார்முஸ் ஜலசந்திக்கு மாற்றுபாதை வேண்டும்! இஸ்ரேல் வலியுறுத்தல்! ஈரானுக்கு நெருக்கடி தர நெதன்யாகு திட்டம்!