பிரபல கவிஞரும், மக்கள் நீதி மைய நிர்வாகியுமான சினேகனின் மனைவி நடிகை கன்னிகா, தனது இரட்டைப் பெண் குழந்தைகள் குறித்து ஆபாசமாகவும், இழிவாகவும் கமெண்ட் செய்த நபர் மீது சைபர் கிரைம் போலீசில் அதிரடியாகப் புகார் அளித்துள்ளார். சமூக வலைதளங்களில் குழந்தைகளுக்கு எதிராக நடக்கும் அத்துமீறல்களைச் சட்ட ரீதியாக எதிர்கொண்டுள்ள கன்னிகாவின் இந்தத் துணிச்சலான நடவடிக்கைக்குப் பலரும் ஆதரவு தெரிவித்து வருகின்றனர்.

கன்னிகா - சினேகன் தம்பதிக்கு அண்மையில் இரட்டைப் பெண் குழந்தைகள் பிறந்த நிலையில், குழந்தைகளின் வீடியோக்களை அவர் சமூக வலைதளங்களில் பகிர்ந்து வந்தார். கன்னிகா தனது குழந்தைகளின் வீடியோ ஒன்றைப் பகிர்ந்திருந்த நிலையில், அதன் கீழ் விக்னராஜ் எஸ்.ஜே. என்ற அடையாளம் தெரியாத நபர் ஒருவர், குழந்தைகளைக் குறித்து மிகவும் கீழ்த்தரமான மற்றும் ஆபாசமான முறையில் கமெண்ட் செய்திருந்தார். இதைக் கண்டு அதிர்ச்சியடைந்த கன்னிகா, அந்த நபரை வெறும் 'பிளாக்' (Block) செய்வதோடு நிறுத்திக் கொள்ளாமல், தகுந்த பாடம் புகட்ட முடிவெடுத்துள்ளார்.

இது குறித்து விழிப்புணர்வு வீடியோ ஒன்றை வெளியிட்டுள்ள கன்னிகா, அந்த நபர் மீது எடுத்துள்ள சட்ட நடவடிக்கைகள் குறித்து விளக்கியுள்ளார்: ஆபாச கமெண்ட் செய்த நபர் மீது முறையாகச் சைபர் கிரைம் போலீசில் புகார் அளித்துள்ளார். அந்த நபரின் சமூக வலைதளக் கணக்கை "Child Abuse" (குழந்தைத் துஷ்பிரயோகம்) பிரிவின் கீழ் ரிப்போர்ட் செய்து முடக்கியுள்ளார். குழந்தைகள் தொடர்பான குற்றங்களுக்குச் சட்டத்தில் கடுமையான தண்டனை உள்ளது. நான் அளித்த புகாரின் அடிப்படையில், அந்த நபருக்கு 3 ஆண்டுகள் வரை சிறை தண்டனை கிடைக்க வாய்ப்புள்ளது" என கன்னிகா அந்த வீடியோவில் எச்சரித்துள்ளார்.

இதையும் படிங்க: 8 ஆயிரம் டோக்கன் கொடுத்தால் முதல்வர் பதவி தருவார்களா? ஆலந்தூரில் சீமான் நக்கல் பேச்சு!

"குழந்தைகள் விஷயத்தில் இது போன்ற அநாகரிகமான செயல்களில் ஈடுபடுபவர்களுக்குச் சட்டப்படி தண்டனை கிடைப்பதை உறுதி செய்ய வேண்டும்" என கன்னிகா ஆவேசமாகப் பேசியுள்ளார். சமூக வலைதளங்களில் பெண்களுக்கு எதிராகவும், தற்போது பச்சிளம் குழந்தைகளுக்கு எதிராகவும் நடக்கும் இதுபோன்ற அத்துமீறல்களுக்கு எதிராகக் குரல் கொடுத்த கன்னிகாவிற்குப் பாராட்டுக்கள் குவிந்து வருகின்றன.

சமூக வலைதளங்களில் ஒருவரைப் பிளாக் செய்வது தீர்வல்ல, சட்டப்படி நடவடிக்கை எடுப்பதே இதுபோன்ற குற்றங்களைக் குறைக்கும் என்பதற்குத் தாராள உதாரணமாகத் திகழ்கிறார் கன்னிகா.

இதையும் படிங்க: டெல்லியின் முரட்டு அடிமை பழனிசாமி! எடப்பாடிக்கு எதிராக முதல்வர் ஸ்டாலின் 'முரட்டு' சாடல்!