சான் ஃபிரான்சிஸ்கோவின் டெக் உலகில் புதிய போக்கு ஒன்று இணையத்தில் வைரலாகி வருகிறது. AI அடிப்படையிலான கோடிங் கருவியை உருவாக்கும் கர்சர் (Cursor) என்ற ஸ்டார்ட்அப் நிறுவனத்தின் அலுவலகத்தில் காலணிகள் அணிவது தடை செய்யப்பட்டுள்ளது. ஊழியர்கள் அனைவரும் காலணிகளை வெளியே கழற்றிவிட்டு, காலுறைகள் அல்லது ஸ்லிப்பர்களுடன் உள்ளே செல்கின்றனர். இந்த தனித்துவமான கொள்கை தற்போது சமூக ஊடகங்களில் பெரும் கவனத்தை ஈர்த்துள்ளது.

கலிபோர்னியாவைச் சேர்ந்த டெவலப்பர் ஆண்ட்ரே லான்ட்கிராஃப் தனது X (முன்பு ட்விட்டர்) கணக்கில் ஒரு புகைப்படத்தைப் பகிர்ந்தார். அதில் அலுவலக நுழைவிடத்தில் ஏராளமான காலணிகள் சிதறிக் கிடப்பதைப் பார்க்கலாம். "சான் ஃபிரான்சிஸ்கோவில் இருப்பவர்களுக்கு இது எந்த ஆபீஸ் என்று உடனே தெரியும்" என்று அவர் கேப்ஷன் கொடுத்திருந்தார். 

பதிவைப் பார்த்த டெக் ஊழியர்கள் உடனடியாக "கர்சர் ஆபீஸ்", "கண்டிப்பாக கர்சர்தான்" என்று கமென்ட் செய்து அடையாளம் காட்டினர். இது சிலிக்கான் வேலியின் இளம் தலைமுறை ஊழியர்களிடையே பிரபலமான கலாச்சாரமாக மாறியுள்ளதை வெளிப்படுத்துகிறது. 

இதையும் படிங்க: அணு ஆயுதக் குறைப்பு விவகாரம்..!! மிரட்டும் டிரம்ப்.. அஞ்சாத ஈரான்..!! மீண்டும் பேச்சுவார்த்தை..!!

2022ஆம் ஆண்டு தொடங்கப்பட்ட கர்சர் நிறுவனத்தை மைக்கேல் ட்ரூல், அமன் சாங்கர், சுவாலே அசிஃப், ஆர்விந்த் லூன்மார்க் ஆகியோர் நிறுவினர். இதில் அமன் சாங்கர் இந்திய வம்சாவளியைச் சேர்ந்தவர்; MIT பல்கலைக்கழக முன்னாள் மாணவர். இந்நிறுவனம் AI உதவியுடன் இயங்கும் ஸ்மார்ட் கோட் எடிட்டரை வழங்குகிறது. இது டெவலப்பர்களுக்கு கோட் எழுதுதல், திருத்துதல், புரிந்துகொள்ளுதல் ஆகியவற்றை வேகமாகவும் திறம்படவும் செய்ய உதவுகிறது.

நவம்பர் 2025இல் கர்சர் 2.3 பில்லியன் டாலர் நிதி திரட்டியது. இதன்மூலம் நிறுவனத்தின் மதிப்பீடு 29.3 பில்லியன் டாலராக உயர்ந்துள்ளது. இது டெக் துறையில் வேகமாக வளரும் நிறுவனங்களில் ஒன்றாக அமைந்துள்ளது. ஆண்ட்ரேயின் பதிவு வைரலான பின்னர், பலரும் இதை "தெய்வீக அனுபவம்" போன்ற வார்த்தைகளால் புகழ்ந்தனர். சிலர் இதை வசதியான, உற்சாகமான சூழலாகக் கருதினர்.

இந்த கொள்கை கர்சருக்கு மட்டுமல்ல; சான் ஃபிரான்சிஸ்கோவில் உள்ள பல ஸ்டார்ட்அப்களில் பின்பற்றப்படுகிறது. கர்சர் ஊழியர் பென் லாங் சில மாதங்களுக்கு முன் இதேபோன்ற புகைப்படங்களைப் பகிர்ந்தபோது, 25க்கும் மேற்பட்ட ஸ்டார்ட்அப்கள் (லவபிள், திங்கி மெஷின்ஸ், ஸ்லோப் போன்றவை) இதே விதியைப் பின்பற்றுவதாக பட்டியல் வெளியிட்டார். இது அலுவலகத்தை சுத்தமாக வைத்திருக்கவும், ஊழியர்களுக்கு வீட்டு போன்ற வசதியை அளிக்கவும் உதவுவதாக நிறுவனங்கள் கூறுகின்றன.

இருப்பினும், சிலர் இதை விமர்சிக்கின்றனர். காலணிகள் இல்லாத சூழல் சுகாதாரம் சார்ந்த பிரச்சினைகளை ஏற்படுத்தலாம் என்ற கருத்துக்களும் உள்ளன. ஆயினும், இளம் டெக் ஊழியர்களிடையே இது படைப்பாற்றலைத் தூண்டும், தளர்வான கலாச்சாரமாக பார்க்கப்படுகிறது. சிலிக்கான் வேலியின் வித்தியாசமான ஆபீஸ் கலாச்சாரத்தை இது மீண்டும் விவாதத்துக்கு கொண்டு வந்துள்ளது. 

இதையும் படிங்க: ஈரானை விட்டு வெளியேறுங்கள்... இந்தியர்களுக்கு வெளியுறவு அமைச்சகம் அவசர எச்சரிக்கை!