சென்னை: தேர்தல் தோல்விக்குப் பிறகு அதிமுகவில் பெரும் குழப்பம் ஏற்பட்டுள்ளது. பொதுச்செயலர் எடப்பாடி பழனிசாமியின் பதவியைப் பறிக்க வேண்டும் என முன்னாள் அமைச்சர்கள் சி.வி.சண்முகம் மற்றும் எஸ்.பி.வேலுமணி தலைமையில் தீவிரமான முயற்சிகள் மேற்கொள்ளப்பட்டு வருகின்றன.

2026 சட்டசபைத் தேர்தலில் 169 தொகுதிகளில் போட்டியிட்ட அதிமுக வெறும் 47 இடங்களில் மட்டுமே வெற்றி பெற்று எதிர்க்கட்சி அந்தஸ்தை இழந்தது. இந்த படுதோல்வியைத் தொடர்ந்து கட்சியில் உள்ள அதிருப்தி வெளிப்படையாக வெடித்துள்ளது. 

ஒரு தரப்பினர் கூறுகையில், “திமுகவுடன் கூட்டணி அமைத்து ஆட்சி அமைக்க எடப்பாடி தயாராக இருந்தார். தனக்கு முதல்வர் பதவி கிடைக்கும் என நம்பினார். ஆனால் கூட்டணி கட்சிகள் ஆதரவு தராததால் திருமாவளவனை முதல்வராக்க திட்டம் மாற்றப்பட்டது. அதற்கும் எடப்பாடி சம்மதிக்கவில்லை. இறுதியில் தமிழக வெற்றிக் கழகத் தலைவர் விஜய் முதல்வரானார்” என்று தெரிவித்தனர்.

இதையும் படிங்க: இரண்டாக உடைந்தது அதிமுக! சட்டசபையில் வெட்ட வெளிச்சம்!! எடப்பாடி பழனிசாமி vs சி.வி.சண்முகம்!

இந்த நிலையில் சி.வி.சண்முகம், எஸ்.பி.வேலுமணி உள்ளிட்டோர் எடப்பாடி பழனிசாமியை பொதுச்செயலர் பதவியிலிருந்து நீக்க காய் நகர்த்தத் தொடங்கியுள்ளனர். 35 எம்எல்ஏக்கள் மற்றும் 48 மாவட்டச் செயலர்கள் தங்களுக்கு ஆதரவு அளித்துள்ளதாக அவர்கள் உறுதிப்படுத்தியுள்ளனர்.

எடப்பாடி பழனிசாமி தரப்போ தனது கட்டுப்பாட்டை மீட்டெடுக்க மாவட்டச் செயலர்கள் கூட்டத்தை நடத்தினார். ஆனால் 36 பேர்தான் கலந்துகொண்டதால் அவர் பதற்றமடைந்தார். கே.பி.முனுசாமி, கே.பி.அன்பழகன், உதயகுமார் உள்ளிட்டோரை அனுப்பி சண்முகம்-வேலுமணி அணியை சமாதானப்படுத்த முயன்றார். எனினும் அவர்கள் உறுதியாக இருப்பதால் எடப்பாடி தரப்பு தற்போது தவிப்பில் உள்ளது.

மேலும், தமிழக வெற்றிக் கழகத்துக்கு ஆதரவு அளிக்கும் யோசனையும் வலுப்பெற்றுள்ளது. சண்முகத்தின் நெருங்கிய உறவினர் விஜய் தரப்பை சந்தித்துப் பேசியதாகவும், தேவைப்பட்டால் போலீஸ் பாதுகாப்பு கோரியதாகவும் தகவல்கள் வெளியாகியுள்ளன. அதிமுக பெண் எம்எல்ஏ லீமா ரோஸ் இந்த அணியில் இணைந்து செயல்படுவதும் கவனத்தை ஈர்த்துள்ளது. அவரது குடும்பத் தொடர்புகள் விஜய் தரப்புடன் இருப்பதாகக் கூறப்படுகிறது.

எடப்பாடி தரப்புக்கு எதிராக 36 எம்எல்ஏக்கள் வரை அணி திரண்டுள்ள நிலையில், சிலர் வெளியில் இருந்து ஆதரவு அளிக்கலாம் எனவும், சிலர் உள்ளே நுழைந்து பதவிகளைப் பெறலாம் எனவும் கருத்து வேறுபாடுகள் நிலவுகின்றன. இந்த உட்கட்சி மோதல் அதிமுகவின் எதிர்காலத்தையே பாதிக்கும் என அரசியல் வட்டாரங்கள் எச்சரிக்கின்றன.

இதையும் படிங்க: தமிழகத்தின் முதல் சிறுபான்மை முதல்வர்!! தவெக தலைவர் விஜய் உருவாக்கிய வரலாறு!! சிறப்பு தருணம்!!