தமிழக அரசியலில் புதிய பரபரப்பை ஏற்படுத்தும் வகையில், பாஜக இளைஞர் மற்றும் விளையாட்டு மேம்பாட்டு பிரிவு தலைவராக இருந்த அமர் பிரசாத் ரெட்டி, கட்சியின் அனைத்து பொறுப்புகளிலிருந்தும் விலகியுள்ளார். அவர், முன்னாள் தமிழக பாஜக தலைவர் அண்ணாமலை தொடங்கியுள்ள புதிய அரசியல் இயக்கமான “இது நம்ம இயக்கம்” அமைப்பில் இணைவதாக அறிவித்திருப்பது அரசியல் வட்டாரங்களில் பெரும் கவனத்தை ஈர்த்துள்ளது.

சமீபத்தில் அண்ணாமலை தொடங்கியுள்ள “இது நம்ம இயக்கம்” என்ற புதிய தளத்தில், பல்வேறு சமூகப் பின்னணிகளைச் சேர்ந்த பொதுமக்கள் மற்றும் பல கட்சிகளின் நிர்வாகிகள் இணையம் மற்றும் செயலி வழியாக இணைந்து வருவதாக கூறப்படுகிறது. இந்த இயக்கம் தொடங்கப்பட்டதிலிருந்து உறுப்பினர் சேர்க்கை வேகமாக அதிகரித்து வருவதாகவும், இதுவரை 17 லட்சத்து 27 ஆயிரத்து 864 பேர் இணைந்துள்ளதாகவும் தகவல்கள் தெரிவிக்கின்றன.

இந்த சூழலில், பாஜகவின் முக்கிய நிர்வாகிகளில் ஒருவராக கருதப்பட்ட அமர் பிரசாத் ரெட்டியின் விலகல் அரசியல் முக்கியத்துவம் வாய்ந்ததாக பார்க்கப்படுகிறது. கட்சியில் இருந்து வெளியேறியதற்கான காரணம் குறித்து அவர் வெளிப்படையாக கருத்து தெரிவித்துள்ளார்.

இதையும் படிங்க: அண்ணாமலையால் விழும் அடி மேல் அடி... பாஜக கூடாரம் காலி... மொத்தமாக ராஜினாமா செய்த முக்கிய நிர்வாகிகள்!

அமர் பிரசாத் ரெட்டி கூறுகையில், “ஒரு குடும்பத்தின் கட்டுப்பாட்டில் திமுக இயங்குகிறது என்று விமர்சனம் செய்யும் பாஜக, தமிழகத்தில் சில குறிப்பிட்ட நபர்களின் கட்டுப்பாட்டில்தான் செயல்படுகிறது. தேர்தலில் தோல்வி அடைந்தாலும் அதே நபர்களே மீண்டும் மீண்டும் போட்டியிட வேண்டும் என்ற மனநிலையுடன் இருக்கின்றனர்” என்று குற்றம்சாட்டியுள்ளார்.

அவரது இந்த கருத்து தமிழக பாஜக வட்டாரத்தில் புதிய விவாதத்தை ஏற்படுத்தியுள்ளது. அதே நேரத்தில், அண்ணாமலையின் புதிய அரசியல் நகர்வுக்கு இது கூடுதல் வலுசேர்க்கும் நிகழ்வாகவும் பார்க்கப்படுகிறது.

வரவிருக்கும் காலங்களில் மேலும் பல முக்கிய நிர்வாகிகள் மற்றும் அரசியல் பிரமுகர்கள் “இது நம்ம இயக்கம்” அமைப்பில் இணைவார்களா என்ற எதிர்பார்ப்பும் அரசியல் வட்டாரங்களில் எழுந்துள்ளது. அமர் பிரசாத் ரெட்டியின் இந்த முடிவு, தமிழக அரசியலில் புதிய கூட்டணிகள் மற்றும் அரசியல் மாற்றங்களுக்கு வழிவகுக்குமா என்ற கேள்வியையும் எழுப்பியுள்ளது.

அண்ணாமலை தொடங்கியுள்ள புதிய இயக்கத்தின் வளர்ச்சி மற்றும் அதில் இணையும் அரசியல் தலைவர்களின் எண்ணிக்கை தொடர்ந்து அதிகரித்து வருவது, மாநில அரசியலில் புதிய திருப்பமாக கவனிக்கப்படுகிறது.

இதையும் படிங்க: "அதே டெய்லர்... அதே வாடகை"..! ஊடகங்களை முடக்குவதா..? அண்ணாமலை சரமாரி கேள்வி..!