திமுக கூட்டணியில் இருந்து வெளியேறும் கட்சிகளை பாஜக கூட்டணிக்கு இழுக்க வேண்டும் என்று பாஜக தேசிய தலைவர் ஜெ.பி.நட்டா தமிழக பாஜக நிர்வாகிகளுக்கு அறிவுறுத்தி உள்ளதாக தகவல்கள் வெளியாகியுள்ளன.

தமிழக சட்டப்பேரவை தேர்தல் அடுத்த ஆண்டு நடைபெற உள்ளது. இத்தேர்தலுக்காக அதிமுக - பாஜக கூட்டணி உறுதி அமைத்துள்ளன. இரு கட்சிகளும் இணைந்து தேர்தல் பணிகளை தொடங்கி விட்டன. தமிழக பாஜக தலைவர்கள் டெல்லி சென்றும், மேலிடத் தலைவர்கள் தமிழகம் வந்தும் ஆலோசனை நடத்தி செல்கின்றனர். அந்த வகையில் செங்கல்பட்டு மாவட்டம் காட்டாங்கொளத்தூர் தனியார் பல்கலைக்கழக நிகழ்ச்சியில் பங்கேற்க பாஜக தேசிய தலைவர் ஜெ.பி. நட்டா சென்னைக்கு வந்தார். பல்கலைக்கழக வளாகத்தில் பாஜக மாநில மையக் குழு கூட்டமும் நடைபெற்றது. இக்கூட்டத்தில் தமிழக பாஜக நிர்வாகிகள் பங்கேற்றனர்.

இக்கூட்டத்தில் 2026 சட்டப் பேரவை தேர்தல் தொடர்பாக ஜெ.பி.நட்டா தமிழக கட்சி நிர்வாகிகளுக்கு அறிவுரை வழங்கியுள்ளார். நிர்வாகிகளுடன் அவர் பேசுகையில்,"நம் கூட்டணி சிறப்பாக அமைந்திருக்கிறது. அதிமுகவுடன் ஒருங்கிணைந்து தேர்தல் பணிகளைச் செய்ய வேண்டும். இந்தக் கூட்டணியை இன்னும் வலுப்படுத்தும் வகையில் நிர்வாகிகள் உழைக்க வேண்டும். பாஜகவினர் எப்போதும் தொலைநோக்கு பார்வையுடந்தான் செயல்பட வேண்டும். குறுகிய நோக்கோடு ஒருபோதும் செயல்படக் கூடாது. அது நம் வெற்றிக்கு தடையாக அமையும்.

தமிழகத்தில் பாஜகவை அடிமட்ட அளவில் வலுப்படுத்த வேண்டும். அதற்கு பூத் கமிட்டியை வலுப்படுத்துவதே ஒரே இலக்காக இருக்க வேண்டும். தமிழகத்தில் பாஜகவின் வெற்றிவாய்ப்பு அதிகமுள்ள தொகுதிகளை கண்டறிந்து, அந்தத் தொகுதிகளில் கூடுதலாக கவனம் செலுத்த வேண்டும். திமுகவின் ஊழல் முறைகேடுகளை முன்னிறுத்தியே பொதுமக்களைச் சந்திக்க வேண்டும்.
பாஜக இன்னும் பலம் வாய்ந்த கூட்டணியாக அமைய வேண்டுமென்றால், திமுக கூட்டணி கட்சிகளின் செயல்பாடுகளை தொடர்ந்து கண்காணிக்க வேண்டும். அந்தக் கூட்டணியில் உள்ள சில கட்சிகள் எப்போது வேண்டுமானாலும் வெளியேறலாம், ஒரு வேலை அவ்வாறு வெளியேறினால், அந்தக் கட்சிகளை பாஜக கூட்டணிக்கு இழுக்கும் நடவடிக்கையில் செயல்பட வேண்டும்." என்று ஜெபி நட்டா அறிவுறுத்தியதாக பாஜக தரப்பில் கூறப்படுகிறது.

இதையும் படிங்க: பாஜக கூட்டணிக்கு வந்தால் விஜய்யை வரவேற்போம்.. ஆனால், விஜய்க்கு பாஜக ஒரு கண்டிஷன்!

இதையும் படிங்க: '3 மத்திய அமைச்சர்கள்.. 5 இணை அமைச்சர்கள்..! கோட்டை விட்ட எடப்பாடியார் - லீக்கான முக்கிய ஆடியோ!