ஜம்மு காஷ்மீரின் புட்காம் மாவட்டத்தில் பாதுகாப்புப் படையினருக்கும் பயங்கரவாதிகளுக்கும் இடையே நடந்த துப்பாக்கிச்சண்டையில், லஷ்கர்-இ-தொய்பா அமைப்பைச் சேர்ந்ததாகக் கூறப்படும் முக்கிய பயங்கரவாதி ஒருவர் சுட்டுக்கொல்லப்பட்ட சம்பவம் பரபரப்பை ஏற்படுத்தியுள்ளது.

காஷ்மீரில் பல்வேறு தாக்குதல் சம்பவங்களில் தொடர்புடையதாக தேடப்பட்டு வந்த நபர் பாதுகாப்புப் படையினரால் சுட்டுக்கொல்லப்பட்டதாக அதிகாரிகள் தெரிவித்துள்ளனர்.

புட்காம் மாவட்டத்தின் கோராக் பகுதியில் பயங்கரவாதிகள் பதுங்கியிருப்பதாக பாதுகாப்புப் படையினருக்கு ரகசிய தகவல் கிடைத்ததாக கூறப்படுகிறது. இதையடுத்து ஜம்மு காஷ்மீர் போலீசார் மற்றும் பாதுகாப்புப் படையினர் இணைந்து அந்தப் பகுதியில் தீவிர தேடுதல் நடவடிக்கையை தொடங்கினர். வனப்பகுதி மற்றும் உயரமான மலைப்பகுதிகளில் பாதுகாப்புப் படையினர் தேடுதல் வேட்டையில் ஈடுபட்டிருந்தனர்.

இதையும் படிங்க: ஓடவும் முடியாது... ஒளியவும் முடியாது!! பயங்கரவாதத்திற்கு பின்விளைவுகள் இருக்கும்! ஐநாவில் பாகிஸ்தானுக்கு இந்தியா பதிலடி!

அப்போது அப்பகுதியில் பதுங்கியிருந்த பயங்கரவாதிகள், பாதுகாப்புப் படையினரை நோக்கி துப்பாக்கிச்சூடு நடத்தியதாக தெரிவிக்கப்பட்டுள்ளது. இதையடுத்து பாதுகாப்புப் படையினரும் பதிலடி தாக்குதல் நடத்தினர். இரு தரப்புக்கும் இடையே சிறிது நேரம் கடுமையான துப்பாக்கிச்சண்டை நடைபெற்றதாக அதிகாரிகள் தெரிவித்தனர்.

இந்த மோதலில் லஷ்கர்-இ-தொய்பா அமைப்பைச் சேர்ந்ததாகக் கூறப்படும் ஒரு பயங்கரவாதி சுட்டுக்கொல்லப்பட்டார். கொல்லப்பட்ட நபர் பாகிஸ்தானைச் சேர்ந்த சுலைமான் ஷா என்றழைக்கப்படும் மூசா என பாதுகாப்பு அதிகாரிகள் அடையாளம் கண்டுள்ளதாக தகவல் வெளியாகியுள்ளது. காஷ்மீரில் நடைபெற்ற பல்வேறு தாக்குதல் சம்பவங்களுடன் அவருக்கு தொடர்பு இருப்பதாக பாதுகாப்பு அமைப்புகள் தெரிவித்துள்ளன.

மோதல் நடைபெற்ற பகுதி வனப்பகுதியாகவும் உயரமான நிலப்பரப்பாகவும் இருப்பதால், அங்கு தேடுதல் நடவடிக்கை தொடர்ந்து நடைபெற்று வருகிறது. மேலும் பயங்கரவாதிகள் பதுங்கியிருக்கிறார்களா என்பது குறித்து பாதுகாப்புப் படையினர் தீவிரமாக சோதனை மேற்கொண்டு வருகின்றனர்.

சம்பவத்தைத் தொடர்ந்து அந்தப் பகுதியில் பாதுகாப்பு பலப்படுத்தப்பட்டுள்ளது. தேடுதல் நடவடிக்கை முழுமையாக நிறைவடைந்த பின்னரே அங்கு நிலவும் சூழல் குறித்து கூடுதல் தகவல்கள் வெளியாகும் என எதிர்பார்க்கப்படுகிறது. புட்காம் உள்ளிட்ட காஷ்மீர் பகுதிகளில் பயங்கரவாத எதிர்ப்பு நடவடிக்கைகள் தொடர்ந்து நடைபெற்று வரும் நிலையில், இந்த மோதல் சம்பவம் பாதுகாப்பு வட்டாரங்களில் முக்கியத்துவம் பெற்றுள்ளது.

இதையும் படிங்க: ஜம்மு காஷ்மீரில் மிகப்பெரிய சதித்திட்டம் முறியடிப்பு! பயங்கரவாதிகளுக்கு ‘பாதை’ காட்டிய 3 பேர் கைது!