தமிழக அரசியலில் பரபரப்பை ஏற்படுத்தும் கூட்டணி…! 3 நாட்களில் அறிவிக்கிறார் டாக்டர் ராமதாஸ்!
பாமக நிறுவனர் மருத்துவர் ராமதாஸ், 2026 சட்டமன்றத் தேர்தலுக்கான கூட்டணி குறித்து தைலாபுரம் தோட்டத்தில் இன்று செய்தியாளர்களை சந்தித்தபோது மிகவும் பரபரப்பான கருத்துக்களை பகிர்ந்துள்ளார்.
தமிழகச் சட்டமன்றத் தேர்தல் நெருங்கி வரும் வேளையில், பாட்டாளி மக்கள் கட்சியின் (பாமக) தேர்தல் கூட்டணி குறித்த சஸ்பென்ஸ் இன்னும் சில தினங்களில் உடைய உள்ளது. இன்று தைலாபுரம் தோட்டத்தில் செய்தியாளர்களைச் சந்தித்த பாமக நிறுவனர் டாக்டர் ராமதாஸ், கூட்டணி குறித்தப் பரபரப்பானத் தகவல்களைப் பகிர்ந்து கொண்டார்.
2026 சட்டமன்றத் தேர்தலில் பாமக யாருடன் கூட்டணி அமைக்கும் என்ற கேள்விக்கு, "நாங்கள் இணையும் கூட்டணி தமிழக அரசியலில் ஒரு மாபெரும் பரபரப்பை ஏற்படுத்தும். அதற்கானப் பேச்சுவார்த்தைகள் சரியானப் பாதையில் சென்று கொண்டிருக்கின்றன" எனப் பதிலளித்தார்.
தொண்டர்களுக்கு அவர் விடுத்தச் செய்தியில், "நமக்கான வாகனம் இதோ மிக அருகே வந்துவிட்டது. அந்த வாகனத்தில் ஏறி நாம் வெற்றிப் பயணத்தைத் தொடருவோம்" எனக் குறிப்பிட்டிருந்தார். இது பாமக புதியக் கூட்டணியில் இணையப் போவதைக் குறிக்கும் ஒரு குறியீடாகப் பார்க்கப்படுகிறது.
இதையும் படிங்க: விவசாய வாகனங்களுக்கு டோல்கேட் கட்டணம் வசூலிக்க கூடாது… சௌமியா அன்புமணி கோரிக்கை!
கூட்டணி குறித்து இறுதி முடிவு எப்போது எடுக்கப்படும் என்ற கேள்விக்கு, "இன்னும் மூன்று நாட்களுக்குப் பொறுத்திருங்கள். உங்களை விடவும், ஊடகங்களை விடவும் நான் அதிக ஆர்வமாக இருக்கிறேன். சஸ்பென்ஸ் விரைவில் உடையும்" எனத் தெரிவித்தார்.
-d4qa7.webp)
அதிமுகவுடன் ஏற்கனவே அன்புமணி ராமதாஸ் தரப்பு பேச்சுவார்த்தை நடத்தி வரும் சூழலில், டாக்டர் ராமதாஸ் 'பரபரப்பை ஏற்படுத்தும் கூட்டணி' எனக் குறிப்பிட்டிருப்பது திமுக அல்லது விஜய் தலைமையிலான தமிழக வெற்றிக் கழகத்துடன் (TVK) இணைய வாய்ப்புள்ளதா என்ற விவாதத்தை அரசியல் வட்டாரத்தில் கிளப்பியுள்ளது.
பாமக-வின் 'மாம்பழம்' சின்னத்தைச் சின்னங்கள் ஒதுக்கீட்டில் முடக்கக் கோரி தேர்தல் ஆணையத்திற்கு அவர் ஏற்கனவே கடிதம் எழுதியுள்ள நிலையில், சின்னம் பற்றியக் கேள்விகளுக்கு, "உங்களுக்குத் தெரியாமல் எதுவும் நடக்காது, ஊடகங்களுக்கு முறையானத் தகவல் வழங்கப்படும்" என உறுதியளித்தார்.
பாமக-வில் ஏற்பட்டுள்ள உட்கட்சி பிளவு மற்றும் சின்னம் தொடர்பான சர்ச்சைகளுக்கு இடையே, டாக்டர் ராமதாஸ் எடுக்கப் போகும் இந்த 'பரபரப்பு' முடிவு 2026 தேர்தல் களத்தில் மிக முக்கியத் திருப்புமுனையாக அமையும் என எதிர்பார்க்கப்படுகிறது.
இதையும் படிங்க: பாமக மோதல்…. தேர்தல் தேதியை தள்ளி வைக்க கோரி ராமதாஸ் வழக்கு நாளை விசாரணை!
