தருமபுரி அதிமுக-வின் கோட்டை! சௌமியா அன்புமணியை ஆதரித்து எடப்பாடி பழனிசாமி பிரச்சாரம்!
நாங்கள் கூட்டணியில் இருந்தாலும் காவிரி விவகாரத்தில் நாடாளுமன்றத்தையே முடக்கினோம்; திமுக-வால் முடியுமா? என இபிஎஸ் கேள்வி.
தமிழகச் சட்டமன்றத் தேர்தலை முன்னிட்டு தருமபுரியில் நடைபெற்ற பிரம்மாண்டப் பொதுக்கூட்டத்தில் ஆற்றிய உரையில், முதலமைச்சர் மு.க. ஸ்டாலின் மற்றும் திமுக அரசின் செயல்பாடுகளை அதிமுக பொதுச்செயலாளர் எடப்பாடி கே. பழனிசாமி கடுமையாக விமர்சித்தார்.
நாங்கள் பாஜக-விற்கு அடிமை என ஸ்டாலின் கூறுகிறார். ஆனால், எதிர்க்கட்சித் தலைவராக இருந்தபோது பிரதமர் வந்தால் கருப்புக்கொடி காட்டிய அதே ஸ்டாலின், முதலமைச்சரானதும் அவருக்கு ரத்தினக் கம்பளம் விரித்து வரவேற்கிறார். இதுதான் அவர் போடும் இரட்டை வேடம். மக்களுக்கு எந்தப் பிரச்சினை வந்தாலும் நாங்கள் போராடுவோம், உங்களைப் போல் யாருக்கும் கூஜா தூக்க மாட்டோம் என ஆவேசமாகத் தெரிவித்தார்.
மத்திய அரசுடன் கூட்டணி வைத்திருந்த காலத்தைக் குறிப்பிட்ட அவர், காவிரி விவகாரத்தில் பாஜக அரசு காலம் தாழ்த்தியபோது, கூட்டணியில் இருந்தபோதே எங்களது 37 நாடாளுமன்ற உறுப்பினர்களை வைத்து அவையை முடக்கித் தீர்வு கண்டோம். இது எங்களால் மட்டுமே முடியும், திமுக-வால் இதுபோல் செய்ய முடியுமா? எனச் சவால் விடுத்தார்.
இதையும் படிங்க: அதிமுக அமித் ஷா கையில், திமுக கலைஞரிடமே இருந்தது! கரூரில் எடப்பாடி பழனிசாமியைச் சாடிய முதலமைச்சர் ஸ்டாலின்!
2021 தேர்தலில் ஆட்சிக்கு வந்ததும் நீட் தேர்வுக்கு விலக்கு பெறுவோம் என உதயநிதி ஸ்டாலின் கூறினார். ஆனால் ஆட்சிக்கு வந்து எதையும் செய்யவில்லை. நீட் விலக்கிற்காக திமுக கூட்டணி எம்பிக்கள் நாடாளுமன்றத்தில் குரல் கொடுக்காமல் பெஞ்சைத் தேய்த்துக் கொண்டிருந்தீர்களா? எனக் கேள்வி எழுப்பினார்.
தமிழகத்தில் சட்டம்-ஒழுங்குச் சீர்குலைவு குறித்துப் பேசிய இபிஎஸ், திமுக ஆட்சியில் கஞ்சா மற்றும் போதைப்பொருள் விற்பனை அமோகமாக நடைபெறுகிறது. இளைஞர்களும், பள்ளி மாணவர்களும் போதைப்பொருளால் சீரழிந்து வருகின்றனர். நாம் பெற்ற பிள்ளைகள் கண் முன்னே அழிவதை வேடிக்கை பார்க்க முடியாது. இதனைப் பலமுறை முதல்வரின் கவனத்திற்குக் கொண்டு சென்றும் எந்த நடவடிக்கையும் இல்லை எனக் குற்றம் சாட்டினார்.
தருமபுரி மாவட்டத்தின் வளர்ச்சி அதிமுக ஆட்சியில்தான் நிகழ்ந்தது எனக் குறிப்பிட்ட அவர், சௌமியா அன்புமணியின் வெற்றியை உறுதி செய்யுமாறு தொண்டர்களைக் கேட்டுக்கொண்டார். தமிழ்நாட்டிற்கு ஸ்டாலின் முதல்வராக இருக்கலாம், ஆனால் தருமபுரியைப் பொறுத்தவரை அதிமுக-பாமக தான் என்றும் ஆட்சி செய்கிறது எனத் தனது உரையை நிறைவு செய்தார்.
இதையும் படிங்க: முதலில் அரசியல் கத்துக்கிட்டு வாங்க! நடிகர் விஜய்யை வறுத்தெடுத்த அதிமுக விந்தியா!
