நான் சொல்றபடி செய்யுங்க! திமுக கூட்டணி வேணும்னு கேளுங்க!! மாவட்ட தலைவர்களுக்கு செல்வப்பெருந்தகை சைலண்ட் ஆர்டர்!

தமிழக சட்டமன்ற தேர்தல் 2026 நெருங்கி வரும் நிலையில், காங்கிரஸ் கட்சியில் உள்ளக பதற்றம் அதிகரித்துள்ளது. டெல்லியில் நேற்று நடந்த மாநில வாரியாக காங்கிரஸ் மாவட்ட தலைவர்கள் கூட்டத்தில், தமிழக காங்கிரஸ் மாவட்ட தலைவர்களுக்கு மாநில தலைவர் கே. செல்வப்பெருந்தகை தரப்பிலிருந்து திமுகவுடன் கூட்டணியில் நீடிக்க வேண்டும் என வலியுறுத்தப்பட்டது.

கூட்டத்தில் பங்கேற்ற தமிழக காங்கிரஸ் மாவட்ட தலைவர்களை செல்வப்பெருந்தகையின் ஆதரவாளரும் அமைப்பு செயலருமான ராம்மோகன் தொலைபேசியில் தொடர்பு கொண்டு பேசியுள்ளார். "அனைவரும் ஒருமித்த குரலில் திமுக கூட்டணியில் தொடர வேண்டும் என கூறுங்கள்" என அறிவுறுத்தியுள்ளார்.

ஆனால், மாவட்ட தலைவர்கள் இதற்கு கடும் எதிர்ப்பு தெரிவித்துள்ளனர். "திமுக கூட்டணியில் நீடிக்க வேண்டுமானால், ஆட்சியில் பங்கு தர வேண்டும். குறைந்தது 6 அமைச்சர் பதவிகள் கிடைக்க வேண்டும். தொகுதி பங்கீடு 41 இடங்களுக்கு குறையக் கூடாது" என வலியுறுத்தியுள்ளனர்.

இதையும் படிங்க: காங்கிரஸ் மாவட்ட தலைவர்களாக களமிறங்கும் ஜூனியர்கள்! எம்.எல்.ஏ சீட்டுக்கு கனவு கண்ட சீனியர்களுக்கு கல்தா!!

மேலும், "திமுக இந்த கோரிக்கைகளை ஏற்க மறுத்தால், தமிழக வெற்றிக் கழகம் (தவெக) தலைவர் விஜய்யுடன் கூட்டணி அமைக்கலாம்" என அதிரடியாக பேசியுள்ளனர். இந்த தகவல் செல்வப்பெருந்தகை மற்றும் அவரது ஆதரவாளர்களை அதிர்ச்சியடையச் செய்துள்ளது.

தற்போது திமுகவுடன் கூட்டணி தொடர்பான பேச்சுவார்த்தைகள் தாமதமாகி வருகின்றன. காங்கிரஸ் தரப்பில் உடனடியாக தொகுதி பங்கீடு குழு அமைக்க வேண்டும் என வலியுறுத்தப்பட்டு வருகிறது. ஆனால், உள்ளகத்தில் சிலர் அதிக இடங்கள், அதிகார பகிர்வு கோரி வருகின்றனர். தவெகவுடன் கூட்டணி வாய்ப்பு குறித்த விவாதங்கள் கட்சியில் புதிய சர்ச்சையை ஏற்படுத்தியுள்ளன.

இந்த உள்ளக கருத்து வேறுபாடு தமிழக அரசியலில் பெரும் அதிர்வலைகளை ஏற்படுத்தும் என எதிர்பார்க்கப்படுகிறது. காங்கிரஸ் உயர்மட்டம் இதை எப்படி கையாளப் போகிறது என்பது இனி தெரியவரும். தேர்தல் நெருங்கும் நிலையில் இந்த பிளவு கட்சிக்கு பின்னடைவாக அமையுமா என்பது கேள்விக்குறியாக உள்ளது.

இதையும் படிங்க: நாளை மறுநாள் தமிழகம் வருகிறார் ராகுல்காந்தி!! கூடலூரில் நிகழ்ச்சி! கூட்டணி குறித்தும் ஆலோசனை!!