அம்புட்டும் பொய்..! என்னது விஜய் நிகழ்ச்சிக்கு அனுமதி தரலையா? தவெக குற்றச்சாட்டை மறுத்த போலீஸ்..!!

வேலூரில் தமிழக வெற்றிக் கழகத் தலைவர் விஜய் பங்கேற்கும் நிர்வாகிகள் சந்திப்பு நிகழ்ச்சி குறித்து சமீபத்தில் பரபரப்பான குற்றச்சாட்டு ஒன்று எழுந்தது. தவெக தரப்பிலிருந்து, இந்த நிகழ்ச்சிக்கு காவல்துறை அனுமதி வழங்க மறுத்துவிட்டதாகவும், ஒன்றரை மாத காலமாக அலைக்கழிக்கப்பட்டதாகவும் சிலர் கூறினர். அனுமதி பெறுவதற்கே நீண்ட நேரம் எடுத்துக்கொண்டதாகவும், கடைசி நேரத்தில் தான் ஒப்புதல் கிடைத்ததாகவும் அவர்கள் தரப்பில் தெரிவிக்கப்பட்டது.

ஆனால், இந்தக் குற்றச்சாட்டுக்கு வேலூர் மாவட்ட காவல்துறை உடனடியாக மறுப்பு தெரிவித்துள்ளது. அவர்களின் விளக்கத்தின்படி, நிர்வாகிகள் சந்திப்பு நிகழ்ச்சிக்கு அனுமதி கோரிய மனு சரியான நேரத்தில் பரிசீலிக்கப்பட்டது. ஒன்றரை மாதம் அலைக்கழிப்பு என்ற கூற்று முற்றிலும் உண்மைக்கு புறம்பானது என்று அவர்கள் தெளிவாகக் கூறியுள்ளனர். உண்மையில், காவல்துறை சார்பில் நிகழ்ச்சி இடத்தை நேரில் ஆய்வு செய்த பின்னரே, பாதுகாப்பு மற்றும் கூட்ட நெரிசல் தவிர்ப்பு நோக்கில் சில நிபந்தனைகளுடன் அனுமதி வழங்கப்பட்டது.

மனு வழங்கப்பட்ட ஐந்து நாட்களில் அனுமதி கொடுக்கப்பட்டதாக தெரிவிக்கப்பட்டது. இந்த நிகழ்ச்சி பிப்ரவரி 23-ஆம் தேதி அகரம்சேரி பகுதியில் நடைபெற்றது. அதிகபட்சமாக 4,900 நிர்வாகிகள் மட்டுமே பங்கேற்க அனுமதி அளிக்கப்பட்டது. QR குறியீடு கொண்ட நுழைவுச் சீட்டு இல்லாதவர்களுக்கு அனுமதி இல்லை என்றும், கர்ப்பிணிகள், சிறுவர்கள், மாற்றுத்திறனாளிகள், உடல் நலம் குன்றியவர்கள் வரக்கூடாது என்றும் தெளிவான அறிவுறுத்தல்கள் வழங்கப்பட்டன எனவும் தெரிவிக்கப்பட்டுள்ளது. 

இதையும் படிங்க: கொலைகாரன கொலைகாரன் தான் சொல்லுவாங்க… விஜயை விளாசிய கான்ஸ்டன்டைன் ரவீந்திரன்..!!

மதியம் 12 மணி முதல் 3 மணி வரை மட்டுமே நிகழ்ச்சி நடத்த வேண்டும் என்ற கட்டுப்பாடும் விதிக்கப்பட்டது. இதனால், மக்கள் சந்திப்பாக தொடங்கிய திட்டம் பின்னர் நிர்வாகிகள் சந்திப்பாக மாற்றப்பட்டது. பாதுகாப்பு ஏற்பாடுகளைப் பொறுத்தவரை, சுமார் 900 முதல் 1,500 வரை போலீசார் பணியில் ஈடுபடுத்தப்பட்டனர். மூன்று அடுக்கு தடுப்புகள் அமைக்கப்பட்டன. விஜய் வருகையின்போது அவரது வாகனத்தை பின்தொடர அனுமதிக்கப்பட்ட சில வாகனங்களுக்கு மட்டுமே பாஸ் வழங்கப்பட்டது என காவல்துறை தரப்பில் கூறப்பட்டுள்ளது.

இவை அனைத்தும் கரூர் போன்ற முந்தைய சம்பவங்களை மனதில் கொண்டு, உயிரிழப்புகளைத் தவிர்க்க எடுக்கப்பட்ட முன்னெச்சரிக்கை நடவடிக்கைகளாகும். இறுதியில், நிகழ்ச்சி சுமூகமாக நடைபெற்றதாக தெரிவிக்கப்பட்டுள்ளது. தவெக தரப்பு அனுமதி கிடைப்பதில் தாமதம் இருந்ததாக உணர்ந்தாலும், காவல்துறை அதை மறுத்து, செயல்முறை சரியாகவே நடைபெற்றதாக விளக்கம் அளித்துள்ளது.

இதையும் படிங்க: வேலூரில் விஜய் சொன்ன குட்டி ஸ்டோரி… சுத்தி வளைச்சி எங்க வர்றாருன்னு கவனிச்சீங்களா??