தமிழக சட்டமன்றத் தேர்தல் 2026 நெருங்கி வரும் நிலையில், திமுக தலைமையிலான கூட்டணியின் தொகுதி பங்கீடு குறித்த முதற்கட்ட வரைவு அரசியல் வட்டாரங்களில் பெரும் பரபரப்பை ஏற்படுத்தியுள்ளது. 
அதிகாரப்பூர்வ அறிவிப்பு இன்னும் வெளியாகாத போதிலும், முதலமைச்சர் மு.க. ஸ்டாலினின் ஒப்புதலுக்கு அனுப்பப்பட்டுள்ள தொகுதி ஒதுக்கீட்டு பட்டியல் குறித்த தகவல்கள் வெளியாகியுள்ளன. இதன்படி, திமுக கூட்டணி இம்முறை மிகவும் வலுவான அமைப்புடன் களமிறங்கும் என எதிர்பார்க்கப்படுகிறது.

2021 தேர்தலில் திமுக 177 தொகுதிகளில் போட்டியிட்டு பெருவெற்றி பெற்றது. காங்கிரஸ் 25 தொகுதிகள், விசிக, மதிமுக, சிபிஐ, சிபிஎம் ஆகியவை தலா 6 தொகுதிகள், கொமக மற்றும் முஸ்லிம் லீக் தலா 3 தொகுதிகள், மனிதநேய மக்கள் கட்சி 2 தொகுதிகள், தமிழக வாழ்வுரிமை கட்சி 1 தொகுதி என பங்கீடு செய்யப்பட்டது. 

இம்முறையும் பெரும்பாலான கட்சிகள் அதே அளவில் தொடரும் என எதிர்பார்க்கப்படுகிறது. ஆனால், மக்கள் நீதி மய்யம், தேமுதிக, பாமக ராமதாஸ் அணி போன்ற புதிய கூட்டணி கட்சிகளின் வருகையால் சில மாற்றங்கள் ஏற்படலாம்.

இதையும் படிங்க: மோடி வர்றதுக்கு முன்னாடியே முடிச்சிரணும்!! பக்கா ப்ளான் போடும் பியூஸ்! அதிமுக - பாஜ கூட்டணி விறுவிறு!

தற்போது வெளியாகியுள்ள முதற்கட்ட தகவலின்படி, திமுக 164 தொகுதிகளில் போட்டியிடும் என்றும், காங்கிரஸுக்கு 25 தொகுதிகள் ஒதுக்கப்படும் என்றும் கூறப்படுகிறது. விடுதலை சிறுத்தைகள் கட்சி, மதிமுக, மார்க்சிஸ்ட் கம்யூனிஸ்டு கட்சி, இந்திய கம்யூனிஸ்டு கட்சி ஆகியவற்றுக்கு தலா 6 தொகுதிகள் வழங்கப்படலாம். 

தேமுதிகவுக்கு 6 தொகுதிகள் மற்றும் கூடுதலாக ஒரு ராஜ்யசபா இடம் வழங்கப்படும் என்ற பேச்சு நிலவுகிறது. பாமக ராமதாஸ் அணிக்கு 4 தொகுதிகள், கொங்குநாடு மக்கள் தேசிய கட்சிக்கு 3 தொகுதிகள், மக்கள் நீதி மய்யத்துக்கு 3 தொகுதிகள், இந்திய யூனியன் முஸ்லிம் லீக்குக்கு 3 தொகுதிகள், மனிதநேய மக்கள் கட்சிக்கு 2 தொகுதிகள் ஒதுக்கப்படும் என்றும் தகவல்கள் வெளியாகியுள்ளன.

தனியரசு, வேல்முருகன், கருணாஸ், ஸ்ரீதர் வாண்டையார் உள்ளிட்ட தலைவர்களுக்கு உதயசூரியன் சின்னத்தில் 1 அல்லது 2 தொகுதிகள் வழங்கப்பட வாய்ப்புள்ளது. இந்த பட்டியல் இறுதி வடிவம் பெறுவதற்கு முன்பு சில மாற்றங்கள் ஏற்படலாம் என்றாலும், திமுக கூட்டணி மொத்தமாக 234 தொகுதிகளையும் உள்ளடக்கிய வலுவான அமைப்பாக உருவெடுத்துள்ளது.

விசிக தலைவர் திருமாவளவன் ஏற்கனவே இரட்டை இலக்க தொகுதிகளை கோரியுள்ள நிலையில், அவரது கோரிக்கைக்கு ஏற்ப சில மாற்றங்கள் இருக்கலாம்.

திமுக தலைமை இப்போது கூட்டணி கட்சிகளுடன் தொகுதி பங்கீடு பேச்சுவார்த்தைகளை தீவிரப்படுத்தி வருகிறது. பாமக ராமதாஸ் அணி மற்றும் தேமுதிகவுடனான பேச்சுவார்த்தைகள் இறுதிக்கட்டத்தை எட்டியுள்ளன.

இந்த கூட்டணி இறுதி வடிவம் பெற்றால், தமிழக அரசியலில் 2026 தேர்தல் மிகப்பெரிய மாற்றத்தை ஏற்படுத்தும் என அரசியல் விமர்சகர்கள் கருதுகின்றனர். திமுக கூட்டணியின் இந்த வலுவான அமைப்பு அதிமுக-பாஜக கூட்டணிக்கு பெரும் சவாலாக அமையும் என்று எதிர்பார்க்கப்படுகிறது.

இதையும் படிங்க: அதிமுக - பாஜக கூட்டணிக்கு விஜய் வரணும்!! எப்படியாவது முடிச்சிருங்க!! டெல்லிக்கு போன ரிக்வெஸ்ட்!