2026 சட்டமன்றத் தேர்தலில் ஏற்பட்ட பின்னடைவைத் தொடர்ந்து, திமுகவில் கட்சிக் கட்டமைப்பை வலுப்படுத்தி இளைஞர்களுக்கு வாய்ப்பளிக்கும் நோக்கில் மு.க.ஸ்டாலின் தலைமையில் அண்ணா அறிவாலயத்தில் நடைபெற்ற உயர்நிலை செயற்குழுக் கூட்டத்தில் முக்கியத் தீர்மானங்கள் நிறைவேற்றப்பட்டுள்ளன. 

மாவட்டக் கழகங்களின் எண்ணிக்கை தற்போதைய 77-78-லிருந்து 110 ஆக உயர்த்தப்பட்டுள்ளது. இரண்டு சட்டமன்றத் தொகுதிகளுக்கு ஒரு மாவட்டக் கழகம் என்ற அடிப்படையில் இந்தப் பிரிப்பு மேற்கொள்ளப்பட்டுள்ளது. புதிய விதிமுறைகளின்படி, மாவட்டச் செயலாளர்களுக்கான அதிகபட்ச வயது வரம்பு 70 ஆக நிர்ணயிக்கப்பட்டுள்ளது. ஒருவர் அதிகபட்சம் மூன்று முறை மட்டுமே இப்பதவியை வகிக்க முடியும் (தொடக்கத்தில் இரண்டு முறை என அறிவிக்கப்பட்டு பின்னர் திருத்தம்). 

ஒன்றியச் செயலாளர்களுக்கு 60, நகர மற்றும் பகுதி செயலாளர்களுக்கு 60, வார்டு மற்றும் கிளைச் செயலாளர்களுக்கு 45-50 என வயது வரம்புகளும், பெரும்பாலான பதவிகளுக்கு இரண்டு முறை மட்டுமே வகிக்கும் கட்டுப்பாடும் கொண்டுவரப்பட்டுள்ளன. மாநகரச் செயலாளர் பதவி முழுவதுமாக ரத்து செய்யப்பட்டுள்ளது. இதனால், எ.வ.வேலு, ஆர்.காந்தி, செஞ்சி கே.எஸ்.மஸ்தான், சு.முத்துசாமி, எஸ்.ரகுபதி, கே.கே.எஸ்.எஸ்.ஆர்.ராமச்சந்திரன், அனிதா ஆர்.ராதாகிருஷ்ணன் உள்ளிட்ட 13-க்கும் மேற்பட்ட மூத்த மாவட்டச் செயலாளர்கள் பதவி இழக்கும் நிலை ஏற்பட்டுள்ளது. 

இதையும் படிங்க: அடுத்த பிரதமர் விஜய்னா காங்கிரஸ் என்ன சொல்லுது? தூத்துக்குடியில் கனிமொழி எம்பி கேள்வி!

பல ஆண்டுகளாக மாவட்டங்களில் ஆதிக்கம் செலுத்தி வந்த இவர்கள் தலைமைக் கழகப் பதவிகளை நோக்கி லாபியில் ஈடுபட்டுள்ளனர். துணைப் பொதுச் செயலாளர், அமைப்புச் செயலாளர், பொருளாளர் போன்ற பதவிகள் கோரப்படுகின்றன. சிலர் போதிய முக்கியத்துவம் வழங்கப்படாவிட்டால் விலகலாம் என எச்சரித்துள்ளதாகத் தகவல்கள் வெளியாகின்றன. மண்டலப் பொறுப்பாளர் பதவிகளும் ரத்து செய்யப்பட்டுள்ளன.

இந்த மறுசீரமைப்பு, இளைஞரணி செயலாளர் உதயநிதி ஸ்டாலின் மற்றும் துணைப் பொதுச் செயலாளர் கனிமொழி கருணாநிதி ஆதரவு அணிகளிடையே அதிகாரப் போட்டியைத் தூண்டியுள்ளது. இளைஞரணியிலிருந்து குறைந்தது 30 பேருக்கு மாவட்டப் பொறுப்புகள் வழங்கப்பட வேண்டும் என உதயநிதி தரப்பு அழுத்தம் தருகிறது. கனிமொழி தரப்பு, ஜனநாயக முறையில் உட்கட்சித் தேர்தல் நடத்தித் தேர்ந்தெடுக்க வேண்டும் என்றும், தனக்கு அதிகாரம் உள்ள பதவி வேண்டும் என்றும் வலியுறுத்துகிறது. 

சமூக வலைதளங்களில் இரு அணிகளிடையேயும் மறைமுக விமர்சனங்கள் பரவி, கட்சியின் தகவல் தொழில்நுட்பப் பிரிவிலும் விரிசல் தென்படுகிறது. இளைஞர்களுக்கு வாய்ப்பு அளிப்பதற்கும் மூத்த தலைவர்களின் விசுவாசத்தைத் தக்கவைப்பதற்கும் இடையே திமுக தலைமை சவாலை எதிர்கொண்டுள்ளது. இந்த அதிகாரச் சமன்பாடு கட்சியின் எதிர்காலத்தைத் தீர்மானிக்கும் முக்கியக் காரணியாகப் பார்க்கப்படுகிறது.

இதையும் படிங்க: துரைமுருகனுக்கு அடுத்து யார்? உதயநிதியை சுற்றி புதிய பதவி பேச்சு.. அறிவாலயத்தில் பரபரப்பு!