கடந்த சில வாரங்களாக வரி விதிப்பு விஷயங்களை மறந்திருந்த அமெரிக்க அதிபர் டொனால்ட் டிரம்ப் தற்போது மீண்டும் புதிய வரிகளை விதிக்கத் தொடங்கிவிட்டார். அமெரிக்காவின் அதிபராக 2வது முறை பொறுப்பேற்றபின் அதிபர் ட்ரம்ப் வர்த்தகப் பற்றாக்குறையைக் குறைக்கும் வகையில் உலக நாடுகள் மீது பரஸ்பர வரிவிதிப்பை விதித்து வருகிறார். இதில் சீனாவுக்கு அதிகபட்சமாக 145 சதவீத வரியை அமெரிக்க அதிபர் ட்ரம்ப் விதித்துள்ளார்.
அமெரிக்கா பொருட்களுக்கு அதிக வரிவிதிக்கும் நாடுகளுக்கு அதிக வரியும், குறைவான வரிவிதிக்கும் நாடுகளுக்கு குறைந்தவரியும் அதிபர் ட்ரம்ப் விதித்துள்ளார். அந்த வகையில் இந்தியாவுக்கு 26 சதவீதம் வரி விதித்துள்ளார். பாஸ்போர்ட் கெடுபிடி, வரிவிதிப்பு, நிதியுதவி நிறுத்தம், குடியேற்றக் கொள்கை, ஊழியர்கள் குறைப்பு, கனடா, கிரீன்லாந்து, காஸா உள்ளிட்ட நாடுகளை அமெரிக்காவுக்குள் கொண்டுவர திட்டம் எனப் பல அதிரடி நடவடிக்கைகளை எடுத்து வருகிறார் அதிபர் டிரம்ப். இதுதவிர, வேறு புதிய அறிவிப்புகளையும் நடவடிக்கைகளையும் அமெரிக்காவில் அறிவித்து செயல்படுத்தி வருகிறார்.
இதையும் படிங்க: நெக்ஸ்ட் டார்கெட் சாம்சங்..! அடுத்தடுத்து ஷாக் கொடுக்கும் அதிபர் டிரம்ப்..!
கடந்த சில நாட்களுக்கு முன்பு, அமெரிக்காவுக்கு வெளியிலிருந்து தயாரிக்கப்பட்ட திரைப்படங்களுக்கு 100 விழுக்காடு வரி விதிக்கப்படும் என்று கூறிய அதிபர் ட்ரம்ப், அதற்கு அடுத்ததாக அமெரிக்காவில் விற்கப்படும் ஐபோன்களை அமெரிக்காவிலேயே தயாரிக்க வேண்டும், இந்தியாவில் தயாரித்தால் 25 சதவீதம் வரி விதிக்கப்படும் என்றும் ஐபோன் நிறுவனத்தைத் தொடர்ந்து மற்றொரு நிறுவனமான சாம்சங் நிறுவனத்திற்கும் வரி விதிக்கப்படும் என்றும் ட்ரம்ப் எச்சரிக்கை விடுத்திருந்தார்.
இந்நிலையில், தற்போது வெளிநாடுகளில் இருந்து அமெரிக்காவில் இறக்குமதி செய்யப்படும் இரும்பு, அலுமினியத்திற்கு ஏற்கனவே 25 சதவீத வரி விதிக்கப்பட்டிருந்தது. அந்த வரி மேலும் அதிகரிக்கப்பட்டுள்ளது. அதன்படி, இரும்பு, அலுமினியம் மீதான இறக்குமதி வரி 50 சதவீதமாக உயர்த்தி அதிபர் டொனால்ட் டிரம்ப் அறிவித்துள்ளார்.
இந்த வரி விதிப்பு இன்று முதல் அமலுக்கு வந்துள்ளது. இதன் காரணமாக இந்தியா, சீனா போன்ற நாடுகளில் இருந்து அமெரிக்காவிற்கு இரும்பு, அலுமினியத்தை ஏற்றுமதி செய்யும் நிறுவனங்கள் பாதிக்கப்படும் என எதிர்பார்க்கப்படுகிறது.
இதையும் படிங்க: வேறு நாட்டில் ஐபோன் உற்பத்தி.. அமெரிக்காவில் விற்றால் 25% வரி.. அதிபர் டிரம்ப்பின் அடுத்த ஷாக் மூவ்..!