அ.தி.மு.க. அமைப்பை மேலும் வலுப்படுத்தும் நோக்கில், புரட்சித் தலைவி அம்மா பேரவையின் சார்பில் சனிக்கிழமை தோறும் மாவட்ட அளவிலான ஆலோசனைக் கூட்டங்கள் நடைபெறும் என்று கட்சியின் பொதுச்செயலாளர் எடப்பாடி கே. பழனிசாமி அறிவித்துள்ளார். இதற்கான அதிகாரப்பூர்வ அறிவிப்பு கட்சி சார்பில் வெளியிடப்பட்டுள்ளது.
அந்த அறிவிப்பின்படி, வருகிற ஜூலை 25, 2026 முதல் ஏப்ரல் 17, 2027 வரை ஒவ்வொரு சனிக்கிழமையும் மாவட்ட வாரியாக ஆலோசனைக் கூட்டங்கள் நடத்தப்பட உள்ளன. இந்தக் கூட்டங்களில், அம்மா பேரவையின் செயல்பாடுகளை விரிவுபடுத்துவது, கட்சி வளர்ச்சிப் பணிகளை தீவிரப்படுத்துவது மற்றும் வரவிருக்கும் தேர்தல்களை முன்னிட்டு மேற்கொள்ள வேண்டிய நடவடிக்கைகள் குறித்து ஆலோசிக்கப்பட உள்ளது.
மேலும், தேர்தல் வாக்குறுதிகளை நிறைவேற்றத் தவறியுள்ளதாக அ.தி.மு.க. குற்றம்சாட்டும் தற்போதைய தமிழக அரசின் செயல்பாடுகளை மக்களிடம் எடுத்துரைப்பது தொடர்பாகவும், கட்சி நிர்வாகிகளுக்கு வழிகாட்டுதல் வழங்கப்படும் என்று அறிவிப்பில் தெரிவிக்கப்பட்டுள்ளது. அடுத்த சட்டப்பேரவைத் தேர்தலில் அ.தி.மு.க.வை மீண்டும் ஆட்சிக்கு கொண்டு வருவதற்கான அமைப்பு ரீதியான பணிகள் குறித்தும் விரிவாக விவாதிக்கப்பட உள்ளது.
இதையும் படிங்க: "துரோகிகளுக்கு பாடம் புகட்ட வேண்டும்"... விராலிமலை இடைத்தேர்தலை குறிவைத்த எடப்பாடி பழனிசாமி!
இந்த ஆலோசனைக் கூட்டங்களுக்கு, அ.தி.மு.க. புரட்சித் தலைவி அம்மா பேரவைச் செயலாளரும், முன்னாள் அமைச்சருமான ஆர்.பி. உதயகுமார் தலைமை தாங்குகிறார். மாவட்டக் கழகச் செயலாளர்கள், தலைமைக் கழக நிர்வாகிகள், தற்போதைய மற்றும் முன்னாள் நாடாளுமன்ற, சட்டமன்ற உறுப்பினர்கள், முன்னாள் அமைச்சர்கள், அம்மா பேரவை மாநில மற்றும் மாவட்ட நிர்வாகிகள் உள்ளிட்டோர் இதில் பங்கேற்று கருத்துகளை பகிர்ந்து கொள்ள உள்ளனர்.
மாவட்ட அளவில் நடைபெறும் இந்தக் கூட்டங்கள் சிறப்பாக நடைபெற தேவையான அனைத்து ஏற்பாடுகளையும் சம்பந்தப்பட்ட மாவட்ட புரட்சித் தலைவி அம்மா பேரவை நிர்வாகிகள் மேற்கொள்ள வேண்டும் என்றும், மாவட்டக் கழகச் செயலாளர்கள் முழு ஒத்துழைப்பு வழங்க வேண்டும் என்றும் எடப்பாடி பழனிசாமி கேட்டுக் கொண்டுள்ளார்.
அ.தி.மு.க. அமைப்பை அடிமட்டத்தில் இருந்து பலப்படுத்தி, வரவிருக்கும் தேர்தலுக்கான பணிகளை வேகப்படுத்தும் முயற்சியாக இந்த வாராந்திர ஆலோசனைக் கூட்டங்கள் பார்க்கப்படுகின்றன.
இதையும் படிங்க: சொத்தை காப்பாற்ற ஆளுங்கட்சிக்கு ஓடினார்கள்! துரோகிகள் சொல்வதை நம்ப வேண்டாம்.. இபிஎஸ் காட்டம்!