என்டிஏ கூட்டணியில் அமமுக பொதுச்செயலாளர் டி.டி.வி.தினகரன் இணைந்து ஒரு மாதம் ஆகிவிட்டது. "பழைய பகையை மறந்து பங்காளியாகிவிட்டோம்" என்று அவர் அறிவித்தார். ஆனால் அதன் பிறகு இருவரும் எந்த அரசியல் நிகழ்ச்சியிலும் இணைந்து பங்கேற்கவில்லை. இது கூட்டணியில் சுமுக உறவு இல்லாத நிலையை காட்டுவதாக அரசியல் வட்டாரங்கள் கூறுகின்றன.

அதிமுக தரப்பினர் கூறுகையில், தினகரன் சில நிர்பந்தங்களால் கூட்டணியில் இணைந்துள்ளார். என்டிஏ முதல்வர் வேட்பாளர் எடப்பாடி பழனிசாமி என்று அவர் ஏற்க மறுக்கிறார். "பாஜகதான் சீட்களை ஒதுக்கும்" என்ற ரீதியில் பேசி வருகிறார். 

அமமுகவினர் பழைய பகையை மறக்கவில்லை. அதனால் பழனிசாமி கலந்துகொள்ளும் நிகழ்ச்சிகளுக்கு அழைத்தாலும் அமமுகவினர் புறக்கணிக்கின்றனர். இதனால் தேர்தல் பணியில் இரு கட்சியினரும் இணைந்து செயல்படுவார்களா என்ற சந்தேகம் எழுந்துள்ளது.

இதையும் படிங்க: ஒரு கட்சியையும் விடாதீங்க! மெகா கூட்டணிக்கு ஸ்டாலின் திட்டம்! தேஜ கூட்டணியின் வாக்குகளை மொத்தமாக அள்ளும் திமுக!

பீஹார் தேர்தலில் என்டிஏ கூட்டணி தலைவர்கள் இடையே ஒற்றுமை காட்ட, வீடுகளில் விருந்து நிகழ்ச்சி நடத்தப்பட்டது. அதேபோல் தமிழகத்திலும் பழனிசாமி-தினகரன் வீடுகளில் விருந்து நிகழ்ச்சிக்கு பாஜக தரப்பில் அழுத்தம் கொடுக்கப்பட்டது. ஆனால் தினகரன் ஒப்புக்கொள்ளாததால் அத்திட்டம் கிடப்பில் போடப்பட்டதாக அதிமுகவினர் தெரிவித்தனர்.

கூட்டணி அமைந்த பிறகு பியூஷ் கோயல் உடனான சந்திப்பு, செய்தியாளர் சந்திப்பு போன்றவை நடந்தாலும், பழனிசாமி-தினகரன் நேரடி சந்திப்பு அல்லது இணைந்த நிகழ்ச்சி இதுவரை இல்லை. இது கூட்டணியின் உள் பதற்றத்தை வெளிப்படுத்துவதாக எதிர்க்கட்சிகள் விமர்சிக்கின்றன. 2026 சட்டமன்றத் தேர்தலில் தென் மாவட்டங்களில் அமமுக செல்வாக்கு முக்கியமானது. ஆனால் உறவில் விரிசல் இருந்தால் வாக்கு பிரிவு ஏற்படும் அபாயம் உள்ளது.

என்டிஏ தலைமை இதை சீர்செய்ய முயற்சி செய்ய வேண்டும் என அரசியல் நோக்கர்கள் கூறுகின்றனர். தினகரன் பாஜகவுடன் நெருக்கமாக இருப்பதால், பழனிசாமி தரப்பு அச்சம் கொண்டுள்ளது. கூட்டணி வலுவாக இருந்தாலும், உள் ஒற்றுமை இல்லையெனில் தேர்தல் களத்தில் பின்னடைவு ஏற்படலாம்.

இதையும் படிங்க: காங்கிரஸுக்கு ராஜ்யசபா சீட் கன்ஃபார்ம்..!! ஸ்டாலினே சொல்லிட்டாரு... செல்வப் பெருந்தகை பேட்டி..!!