தமிழக வெற்றிக் கழகம் (தவெக) கட்சியின் தலைவரும் நடிகருமான விஜய், வரும் டிசம்பர் 18-ஆம் தேதி ஈரோட்டில் நடைபெறவுள்ள பொதுக்கூட்டத்தில் பொதுக்கூட்டத்தில் கலந்துகொள்ள உள்ளார். இந்த நிகழ்ச்சி காலை 11 மணி முதல் பகல் 1 மணி வரை நடைபெறும் என கட்சியின் தலைமை ஒருங்கிணைப்பாளர் கே.ஏ. செங்கோட்டையன் அறிவித்துள்ளார். இந்த அறிவிப்பு தவெக கட்சியின் அரசியல் நடவடிக்கைகளில் முக்கியமான திருப்புமுனையாக பார்க்கப்படுகிறது.
முன்னதாக டிசம்பர் 16-ஆம் தேதி திட்டமிடப்பட்டிருந்த இந்த கூட்டம், போலீஸ் தரப்பிலிருந்து விதிக்கப்பட்ட கடும் நிபந்தனைகள் காரணமாக இரண்டு நாட்கள் தள்ளிவைக்கப்பட்டது. தவெக கட்சியின் முதல் பொதுக்கூட்டமாக அமையவிருக்கும் இந்த நிகழ்ச்சி, ஈரோடு மாவட்டத்தில் உள்ள விஜயமங்கலம் பகுதியில் நடைபெற திட்டமிடப்பட்டுள்ளது.
இதையும் படிங்க: நிபந்தனைகளுடன் அனுமதி: விஜய் பரப்புரை கூட்டத்திற்கு புதுச்சேரி காவல்துறை அனுமதி - தமிழ்நாட்டினருக்குத் தடை!
ஆனால், கூட்டம் நடைபெறவிருக்கும் இடம் விஜயபுரி அம்மன் கோயிலுக்குச் சொந்தமான நிலம் என்பதால், கோயில் நிர்வாகம் எதிர்ப்பு தெரிவித்துள்ளது. இதனால், மாவட்ட ஆட்சியர் எஸ். கந்தசாமி மற்றும் காவல்துறை கண்காணிப்பாளருக்கு கோயில் நிர்வாக அதிகாரி கடிதம் எழுதி, அனுமதி வழங்க வேண்டாம் என கோரியுள்ளார். இதனிடையே, போலீஸ் தரப்பு 84 கடும் நிபந்தனைகளை விதித்துள்ளது, இதில் கூட்டத்தில் பங்கேற்கும் தொண்டர்களின் எண்ணிக்கை கட்டுப்பாடு, போக்குவரத்து ஏற்பாடுகள், பாதுகாப்பு அம்சங்கள் உள்ளிட்டவை அடங்கும்.
இந்நிலையில் செங்கோட்டையன், இது குறித்து செய்தியாளர்களிடம் பேசுகையில், "போலீஸ் தரப்பு விதித்த நிபந்தனைகள் அதிகமாக இருப்பதால், கூட்டத்தை டிசம்பர் 18-ஆம் தேதிக்கு மாற்றியுள்ளோம். "தலைவர் விஜய் அவர்கள் கண்டிப்பாக இந்த கூட்டத்தில் கலந்துகொள்வார். இது கட்சியின் வளர்ச்சிக்கு முக்கியமான நிகழ்வாக இருக்கும்" எனவும் அவர் உறுதியளித்தார்.
மேலும் பிரசார கூட்டம் காலை 11 மணி முதல்1 மணி வரை நடைபெற இருக்கிறது. அதற்கான ஏற்பாடுகளை கட்சியினர் மேற்கொண்டு வருகிறோம். அரசு அலுவலர்கள் கேட்டது போல பல்வேறு பணிகளை நிறைவேற்றி தருவதற்கு நடவடிக்கை எடுத்து வருகிறோம், என்னென்ன ஆலோசனைகளை சொல்கிறார்களோ, அதனை ஏற்று செய்வதற்கு தயாராக இருக்கிறோம். புதுச்சேரி பிரசாரத்திற்கு பிறகு தமிழகத்தில் முதன் முறையாக ஈரோடு வருகை தர உள்ளார். இந்த நிகழ்ச்சி வரலாறு படைக்கும் வகையில் இருக்கும் என்றார்.
யாரைக் கூட்டணியில் வைத்துக்கொள்ள வேண்டும் என்பதை தலைவர் விஜய் முடிவு செய்வார். விஜயபுரி அம்மன் கோவிலுக்கு சொந்தமான இடத்தில் விஜய் பிரசாரம் செய்ய எந்தவித தடையும் இல்லை. என்னை வரவேற்கிற வாழ்த்தும் என்னை அரவணைத்து செல்லும் இயக்கத்தில் சேர்வதால் தவறில்லை. த.வெ.க.வில் மட்டற்ற மகிழ்ச்சியுடன் இருக்கிறேன். எம்ஜி.ஆர்- ஜெயலலிதா காலத்தில் அ.தி.மு.க.வில் எப்படி இருந்தேனோ, அப்படி தான் த.வெ.க.வில் இருக்கிறேன். மக்கள் மத்தியில் த.வெ.க,வுக்கு வரவேற்பு இருக்கிறது என்றார்.
2026 சட்டமன்ற தேர்தலை இலக்காகக் கொண்டு செயல்பட்டு வரும் தவெக கட்சி, தமிழக அரசியலில் புதிய மாற்றத்தை ஏற்படுத்தும் என எதிர்பார்க்கப்படுகிறது. ஏற்கனவே, கட்சியின் தொண்டர்கள் பல்வேறு மாவட்டங்களில் உறுப்பினர் சேர்க்கை பணிகளை தீவிரமாக மேற்கொண்டு வருகின்றனர். இந்த பொதுக்கூட்டம், விஜய்யின் அரசியல் பிரவேசத்திற்குப் பிறகு நடைபெறும் முதல் பெரிய நிகழ்வு என்பதால், தமிழகம் முழுவதும் இருந்து ஏராளமான தொண்டர்கள் பங்கேற்கும் என எதிர்பார்க்கப்படுகிறது.
இதனிடையே, தவெக கட்சி தேர்தல் கூட்டணி பேச்சுவார்த்தைக்கான குழு மற்றும் தேர்தல் அறிக்கை தயாரிப்புக்கான குழுக்களை அமைத்துள்ளது. இது, 2026 தேர்தலுக்கு தயாராகும் நடவடிக்கையாக பார்க்கப்படுகிறது. போலீஸ் அனுமதி கிடைக்காவிட்டால், மாற்று இடத்தை தேர்வு செய்யும் வாய்ப்பும் உள்ளது என கட்சி வட்டாரங்கள் தெரிவிக்கின்றன.
இந்த கூட்டத்தின் மூலம், விஜய் தனது அரசியல் கொள்கைகளை விரிவாக விளக்குவார் என எதிர்பார்க்கப்படுகிறது. தமிழக அரசியலில் புதிய சக்தியாக உருவெடுத்து வரும் தவெக, இந்த நிகழ்வின் வழியாக தனது வலிமையை நிரூபிக்கும் என அரசியல் விமர்சகர்கள் கருத்து தெரிவித்துள்ளனர். மேலும், போலீஸ் நிபந்தனைகள் குறித்து எழுந்த சர்ச்சை, கட்சியின் வளர்ச்சியை தடுக்கும் முயற்சியா என கேள்விகளும் எழுந்துள்ளன.
இதையும் படிங்க: மக்களின் துயரத்திற்கு தமிழக அரசு தான் காரணம்! வடிகால் பணிகள் முழுமையடையாதது ஏன்? தவெக தலைவர் விஜய் சரமாரி கேள்வி!