பல விருதுகள்.. அப்துல் கலாமிடம் இருந்து பாராட்டு.. இஸ்ரோ முன்னாள் விஞ்ஞானி மறைவு..!
இஸ்ரோ முன்னாள் விஞ்ஞானி நெல்லை சு.முத்து, திருவனந்தபுரத்தில் உடல்நலக்குறைவால் காலமானார்.
தமிழகத்தைச் சேர்ந்த புகழ்பெற்ற விஞ்ஞானியும், அறிவியல் எழுத்தாளரும், கவிஞருமான சு. முத்து திருநெல்வேலியில் 1951ம் ஆண்டு மே 10ம் தேதி பிறந்தார். இந்திய விண்வெளி ஆய்வு மையமான (ISRO) ஸ்ரீஹரிகோட்டாவிலுள்ள சதீஸ் தவான் விண்வெளி மையத்தில் முதல்நிலை விஞ்ஞானியாகப் பணியாற்றினார். விக்ரம் சாராபாய் விண்வெளி மையத்திலும் பணியாற்றிய இவர், ‘ஓல்ஃபெக்ஸ்’ என்ற தீயணைப்புப் பொடியைக் கண்டுபிடித்த குழுவில் உறுப்பினராக இருந்து இந்தியப் பதிவு உரிமம் பெற்றவர்.
அறிவியல், சிறுவர் இலக்கியம், கவிதை, வரலாறு, மொழிபெயர்ப்பு, திறனாய்வு ஆகிய துறைகளில் 160-க்கும் மேற்பட்ட நூல்களை எழுதிய இவருக்கு, அறிவூட்டும் விஞ்ஞான விளையாட்டு, ஐன்ஸ்டீனும் அண்டவெளியும், செவ்வாயில் உள்வேட்கையும் நல்வாய்ப்பும், அறிவியல் ஆத்திசூடி ஆகிய 4 நூல்களுக்காக தமிழ்நாடு அரசு சார்பில் சிறந்த நூலாசிரியர் விருது வழங்கப்பட்டது.
இதையும் படிங்க: மீண்டும் மீண்டுமா? ஆக்சியம்-4 மிஷன்: விண்வெளி பயணம் 4வது முறையாக ஒத்திவைப்பு..
மேலும் இவர் மலேசியாவின் உலகத் தமிழ்க் கவிஞர் பேரவையின் கவிமாமணி விருது, தேசிய அறிவியல் மற்றும் தொழில்நுட்ப கவுன்சிலின் 2004-ஆம் ஆண்டு விருது, பாரதியார் பல்கலைக்கழகத்தின் மகாகவி பாரதி அய்ந்தமிழ் விருது, பால் மருதுவர் ஜி. சிற்றம்பலநார் விருது என பல விருதுகளை பெற்றுள்ளார்.
நெல்லை சு. முத்து எழுதிய “விண்வெளியில் மருத்துவ ஆராய்ச்சி”, “செவ்வாய்க் கிரக நிலையை மாற்ற இயலுமா?” போன்ற கட்டுரைகள் தினமணி இதழில் வெளியாகின. மேலும் தமிழில் அறிவியல் குறிப்புகள் புதைந்துள்ளன என்பதை வலியுறுத்தி, புராணங்களில் உள்ள விமானக் குறிப்புகள், சூரியனை கோள்கள் சுற்றுதல் போன்றவற்றை எடுத்துரைத்தார்.
முன்னாள் குடியரசுத் தலைவர் டாக்டர் ஏ.பி.ஜே. அப்துல் கலாம், “தம்மை ஒத்த அலைநீளத்தில் சிந்திப்பவர்” என நெல்லை சு. முத்துவைப் பாராட்டினார். மேலும் இவர் அப்துல் கலாமுடன் இணைந்து பணியாற்றியவர்.
BAPASI-யால் நெல்லை சு. முத்து விருது நிறுவப்பட்டு, சிறந்த சிறுவர் அறிவியல் நூலாசிரியருக்கு ஆண்டுதோறும் வழங்கப்படுகிறது. மேலும் பல கல்லூரிகளில் இவரது பெயரில் விருதுகள் வழங்கப்படுகின்றன.
இந்நிலையில் நெல்லை சு. முத்து, உடல்நலக்குறைவால் திருவனந்தபுரத்தில் இன்று காலமானார். அவரது மறைவிற்கு பலர் இரங்கல் தெரிவித்து வருகின்றனர்.
இதையும் படிங்க: இது 3வது முறை.. தொடர்கதையாகும் விண்வெளிப் பயணம் ஒத்திவைப்பு.. இஸ்ரோ, நாசா சேர்ந்து கொடுத்த அப்டேட்..!
