இந்தியாவின் விண்வெளி ஆய்வு வரலாற்றில் பொன்னெழுத்துக்களால் பொறிக்கப்படவுள்ள வரலாற்றுச் சிறப்புமிக்க ககன்யான் திட்டத்தின் கீழ், விண்வெளிக்கு மனிதர்களைப் பாதுகாப்பாக அனுப்பி மீண்டும் பூமிக்குக் கொண்டு வருவதற்கான முதல் ஆளில்லாப் பரிசோதனை விண்கலம் (G1 Mission) நடப்பாண்டு இறுதிக்குள் திட்டமிட்டபடி விண்ணில் ஏவப்படும் என்று இந்திய விண்வெளி ஆராய்ச்சி நிறுவனத்தின் தலைவர் வி.நாராயணன் உறுதிபடத் தெரிவித்துள்ளார்.  

இந்திய விண்வெளி வீரர்கள் மூவரை புவியின் 400 கிலோமீட்டர் தாழ்வட்டப் பாதைக்கு அனுப்பி, மூன்று நாட்கள் விண்வெளியில் ஆய்வுப் பணிகளை மேற்கொண்ட பின்னர் அவர்களைப் பத்திரமாகப் பூமிக்குக் கொண்டு வந்து கடலில் இறக்கும் பிரம்மாண்ட கனவுத் திட்டமாக 'ககன்யான்' முன்னெடுக்கப்பட்டு வருகிறது. 

இந்தியர்களை ஏற்றிச் செல்லும் இறுதி மனிதப் பயணத்திற்கு முன்னதாக, விண்கலத்தின் பாதுகாப்பு, உயிர்காக்கும் அமைப்புகளின் செயல்பாடு மற்றும் பூமியின் வளிமண்டலத்திற்குள் விண்கலம் மீண்டும் நுழையும் போது தாங்க வேண்டிய வெப்பத் தடுப்பு உத்திகள் ஆகியவற்றை முழுமையாகப் பரிசோதிக்க அடுத்தடுத்து ஆளில்லாப் பயணங்களை இஸ்ரோ திட்டமிட்டுள்ளது.

இதையும் படிங்க: GSLV-F17 வெற்றி எதிரொலி! மேலும் 6 ஏவுதல்களுக்கு தயாராகும் ஸ்ரீஹரிகோட்டா! இஸ்ரோ தலைவர் நாராயணன் முக்கிய அறிவிப்பு!

ஆந்திர மாநிலம் ஸ்ரீஹரிகோட்டாவில் செய்தியாளர்களிடம் பேசிய இஸ்ரோ தலைவர் டாக்டர் வி.நாராயணன், இந்தியாவின் முதல் மனித விண்வெளிப் பயணத் திட்டத்திற்கான முன்னோட்டமாக அமையும் ககன்யான் முதல் ஆளில்லா விண்கலத்தை விண்ணில் செலுத்துவதற்கான பணிகள் மிகத் தீவிரமாகவும், துல்லியமான திட்டமிடுதலுடனும் நடைபெற்று வருகின்றன. 

எவ்விதத் தாமதமும் இன்றி இந்த 2026-ஆம் ஆண்டின் இறுதி நாட்களுக்குள் முதல் ஆளில்லா விண்கலம் வெற்றிகரமாக விண்ணில் பாயும். விண்கலத்தின் பாகங்கள் ஒருங்கிணைப்பு மற்றும் பல்வேறு கட்டக் களப் பரிசோதனைகள் அனைத்தும் இறுதி வடிவம் பெற்று வருகின்றன என்று பெருமிதத்துடன் குறிப்பிட்டார்.  

விண்வெளி வீரர்கள் செல்லும் அறையின் அதிநவீன உள்கட்டமைப்பு மற்றும் பாராசூட் இறங்கு தொழில்நுட்பங்கள் ஏற்கனவே விரிவான ஆய்வுகளுக்கு உட்படுத்தப்பட்டு வரும் நிலையில், இந்த ஆண்டு இறுதியில் விண்ணில் பாயவுள்ள முதல் ஆளில்லா விண்கலப் பரிசோதனை வெற்றி பெற்றால், அமெரிக்கா, ரஷ்யா, சீனா ஆகிய நாடுகளுக்கு அடுத்தபடியாக மனிதர்களை விண்வெளிக்கு அனுப்பும் ஆற்றல் வாய்ந்த நான்காவது உலக வல்லரசாக இந்தியா சர்வதேச அரங்கில் கம்பீரமாக உருவெடுக்கும் என்பது குறிப்பிடத்தக்கது.

இதையும் படிங்க: அதிகாலை 2.55 மணிக்கு விண்ணில் பாய்ந்த GSLV-F17! இந்தியாவுக்கு பெருமை சேர்த்த ISRO! பிரதமர் மோடி பாராட்டு!