உச்ச நீதிமன்றத்தில் நீதி கேட்டு நேரில் ஆஜரான ஒரு பெண், தன் குடும்பத்தின் 15 ஆண்டு கால துயரத்தை விவரித்து, தாலியை கழற்றி முறையிட்ட சம்பவம் பெரும் பரபரப்பை ஏற்படுத்தியுள்ளது. தாமதமான நீதி என்பது மறுக்கப்பட்ட நீதியே என்ற உண்மையை மீண்டும் ஒருமுறை நினைவூட்டிய இந்த சம்பவம், நாடு முழுவதும் நிலுவையில் உள்ள வழக்குகளின் கடுமையான பாதிப்பை எடுத்துக்காட்டுகிறது.

நேற்று தலைமை நீதிபதி சூர்யகாந்த் தலைமையிலான அமர்வு வழக்குகளை விசாரித்துக் கொண்டிருந்தபோது, வழக்கறிஞர் உதவியின்றி நேரில் வந்த தெலுங்கானா மாநிலத்தைச் சேர்ந்த அந்தப் பெண், தனது சிவில் வழக்கு 15 ஆண்டுகளாக நிலுவையில் இருப்பதாக முறையிட்டார். “ஹைதராபாத்தில் இருந்து வருகிறேன். எங்கள் குடும்பம் முழுவதும் பொருளாதார நெருக்கடியில் சிக்கித் தவிக்கிறது. குழந்தைகளுக்கு உணவளிக்கவும், அவர்களின் கல்வியைத் தொடரவும் முடியாத நிலை ஏற்பட்டுள்ளது” என்று கண்ணீர் மல்கக் கூறினார்.

தொடர்ந்து, தன் கழுத்தில் அணிந்திருந்த தாலியை கழற்றிய அவர், “எங்களிடம் இதைத் தவிர வேறு எதுவும் இல்லை. இந்த அளவுக்கு கஷ்டத்தில் இருக்கிறோம்” என்று உருக்கமாக விளக்கினார். அவரது இந்தச் செயல் நீதிமன்றத்தில் சில நிமிடங்கள் பரபரப்பை ஏற்படுத்தியது. இருப்பினும், தலைமை நீதிபதி சூர்யகாந்த் அமைதியாக அவரது முறையீட்டைக் கேட்டு, வழக்கை அடுத்த திங்கட்கிழமை சிறப்பு அமர்வில் முதல் வழக்காக விசாரிக்க உத்தரவிட்டார். மேலும், நேரில் வர வேண்டிய அவசியமில்லை என்றும், ஆன்லைன் மூலம் ஆஜராகலாம் என்றும், தரப்பு வாதத்துக்கு போதுமான நேரம் ஒதுக்கப்படும் என்றும் உறுதியளித்தார்.

இதையும் படிங்க: தமிழ்நாட்டில் பசுக்கள், கன்றுகளை வெட்ட தடை... உச்சநீதிமன்றம் பிறப்பித்த பரபரப்பு உத்தரவு..!

இந்தச் சம்பவம் சமூக வலைத்தளங்களில் வேகமாகப் பரவி, பலரது கவனத்தை ஈர்த்துள்ளது. நீதிமன்றங்களில் வழக்குகள் நீண்டகாலம் நிலுவையில் இருப்பது இந்திய நீதித் துறையின் நீண்டகாலப் பிரச்சினையாகும். பல லட்சம் வழக்குகள் பல ஆண்டுகளாகக் காத்திருக்கும் நிலையில், பொதுமக்கள் பொருளாதார இழப்பு, மன உளைச்சல் உள்ளிட்ட பல்வேறு சிரமங்களை எதிர்கொள்கின்றனர்.

இதைச் சரிசெய்யும் வகையில், சமீபத்தில் உச்ச நீதிமன்றம் முக்கிய முயற்சியை மேற்கொண்டுள்ளது. பல ஆண்டுகளாக நிலுவையில் உள்ள சுமார் 800 பழைய சிவில் மற்றும் குற்றவியல் வழக்குகளை விரைந்து விசாரித்து முடிக்க நான்கு சிறப்பு அமர்வுகளை தலைமை நீதிபதி சூர்யகாந்த் அமைத்துள்ளார். இந்த முயற்சியின் கீழ் முன்னுரிமை அடிப்படையில் வழக்குகள் விசாரிக்கப்படுகின்றன.

இந்தப் பெண்ணின் உணர்ச்சிபூர்வ முறையீடு, நீதித் துறையில் தேக்கம் நீக்கும் முயற்சிகளின் அவசியத்தை மீண்டும் வலியுறுத்துகிறது. வழக்கின் முழு பின்னணி விவரங்கள் இன்னும் வெளியாகாத நிலையில், அடுத்த வாரம் விசாரணை தொடங்கும் என எதிர்பார்க்கப்படுகிறது.

இதையும் படிங்க: "எங்களுக்கே உத்தரவா?" மனுதாரரின் செயலால் உச்சநீதிமன்றத்தில் பரபரப்பு..!!