தெற்கு ரயில்வே எல்லைக்குட்பட்ட ரயில் நிலையங்களில், ஓடும் ரயில்களில் ஏறவோ அல்லது இறங்கவோ முயன்றபோது சமநிலை தவறி மரணத்தின் விளிம்பிற்குச் சென்ற ஆறு பயணிகளை, பணியில் இருந்த ரயில்வே பாதுகாப்புப் படை (RPF) வீரர்கள் தங்களின் சொந்த உயிரையும் துச்சமென மதித்து மின்னல் வேகத்தில் செயல்பட்டுப் பத்திரமாக மீட்டெடுத்துள்ளனர்.

ரயில் நிலையங்களில் பயணிகள் அவசர கதியில் ஓடும் ரயிலில் ஏறுவதையும் இறங்குவதையும் தவிர்க்குமாறு தொடர் எச்சரிக்கைகள் விடுக்கப்பட்டு வருகின்றன. இருப்பினும், கடந்த ஆகஸ்ட் மற்றும் செப்டம்பர் மாதங்களில் பெரம்பூர், கோயம்புத்தூர், நாகர்கோவில், சென்னை எழும்பூர் மற்றும் கிண்டி ஆகிய ரயில் நிலையங்களில் பதறவைக்கும் விபத்துகள் அரங்கேறின.

கடந்த ஆகஸ்ட் 11 அன்று பெரம்பூர் ரயில் நிலையத்தில் வண்டி எண் 22920 ரயிலில் ஏற முயன்று தவறி விழுந்த 65 வயது முதியவரைத் தலைமை காவலர் கே.ரமேஷ் மற்றும் காவலர் ஜிதேந்திர குமார் ஆகியோர் துரிதமாகச் செயல்பட்டு நடைமேடைக்கு இழுத்துக் காப்பாற்றினர்.

இதையும் படிங்க: சென்னை கடற்கரை - தாம்பரம் மின்சார ரயில்கள் ரத்து.... தெற்கு ரயில்வே அறிவிப்பு!

அதேபோல், ஆகஸ்ட் 14-ல் கோவை ரயில் நிலையத்தில் வண்டி எண் 22207 ரயிலில் ஏறும்போது நடைமேடைக்கும் ரயில் பெட்டிக்கும் இடையிலான குறுகிய இடைவெளியில் தவறி விழுந்த லட்சுமி என்ற பெண் பயணியை, உதவி சப்-இன்ஸ்பெக்டர் கே.ஆர்.பினு மற்றும் காவலர் நாசர் ஆகியோர் மின்னல் வேகத்தில் பற்றி இழுத்து உயிர்பிச்சை அளித்தனர்.

ஆகஸ்ட் 21 அன்று நாகர்கோவில் நிலையத்தில் வண்டி எண் 12633 ரயிலில் இருந்து இறங்கும்போது இடைவெளியில் சிக்கி இழுத்துச் செல்லப்பட்ட 51 வயதுடைய தூய்மைப் பணி ஊழியரை (OBHS) காவலர் டி.அசிசி நவீன் நொடிப் பொழுதில் காப்பாற்றினார்.

தொடர்ந்து ஆகஸ்ட் 23-ல் பெரம்பூரில் தவறவிட்ட செல்போனை எடுக்க ஓடும் ரயிலில் (12672) இருந்து குதித்துச் சமநிலை இழந்த பயணியை, தலைமை காவலர் ஜி.உதயகுமார் மற்றும் பெண் தலைமை காவலர் ஷெர்லின் ஜேம்ஸ் ஆகியோர் ரயிலுடன் ஓடிச் சென்று எட்டிப் பிடித்து மீட்டனர்.

செப்டம்பர் 20 அன்று சென்னை எழும்பூரில் வண்டி எண் 22675 ரயிலில் தொங்கிக்கொண்டு சென்ற ஆண் பயணியைக் காவலர் தீபக் அசாத்திய துணிச்சலுடன் நடைமேடைக்குள் இழுத்துப் பாதுகாத்தார்.

குறிப்பாக, செப்டம்பர் 23 அன்று கிண்டி ரயில் நிலையத்தில் வண்டி எண் 66046 புறநகர் ரயிலின் நடைமேடை இடைவெளியில் தவறி விழுந்து சுமார் 50 மீட்டர் தூரம் இழுத்துச் செல்லப்பட்டு மரணப் போராட்டத்திலிருந்த 69 வயது முதியவரை, காவலர் நாராயண் சிங் பாய்ந்து சென்று காப்பாற்றிய சம்பவம் பெரும் நெகிழ்ச்சியை ஏற்படுத்தியது.

கடமை உணர்வுடன் தக்க சமயத்தில் செயல்பட்டு ஆறு விலைமதிப்பற்ற உயிர்களைக் காத்த இந்த ஆர்பிஎஃப் வீரர்களுக்கு, தெற்கு ரயில்வேயின் முதன்மை முதன்மைப் பாதுகாப்பு ஆணையரும் ரயில்வே பாதுகாப்புப் படைத் தலைவருமான (IG/RPF/SR) கே.அருள் ஜோதி பாராட்டுச் சான்றிதழ்களை நேரில் வழங்கி கௌரவித்தார்.

நடப்பு 2026-ஆம் ஆண்டில் ஜனவரி முதல் செப்டம்பர் வரையிலான 9 மாத காலகட்டத்தில் மட்டும், தெற்கு ரயில்வே பாதுகாப்புப் படையினர் தங்களின் விழிப்புணர்வான ரோந்துப் பணியால் இதுவரை 25 பயணிகளின் உயிர்களைக் காப்பாற்றிப் பொதுமக்கள் மத்தியில் பெரும் நன்மதிப்பைப் பெற்றுள்ளனர்.

இதையும் படிங்க: மாற்றுத்திறனாளிகளுக்கு சிறப்பு வசதிகள்! எழும்பூர், தாம்பரம் ரயில் நிலையங்களில் தெற்கு ரயில்வே தீவிர ஏற்பாடு!