இந்தியர்களை மீட்டு தாயகம் அழைத்து வரும் பணிகள் மும்முரம்!! மேற்காசிய நோக்கி பறக்கும் சிறப்பு விமானங்கள்!

துபாய்: ஈரான்-இஸ்ரேல் இடையேயான போர் பதற்றம் காரணமாக மேற்காசியாவில் வான்வெளி மூடப்பட்டு, விமான சேவைகள் முடங்கிய நிலையில், துபாய் உள்ளிட்ட இடங்களில் சிக்கித் தவிக்கும் ஆயிரக்கணக்கான இந்தியர்களை மீட்க மத்திய அரசு தீவிர நடவடிக்கை எடுத்துள்ளது. இண்டிகோ, ஏர் இந்தியா, ஸ்பைஸ்ஜெட் போன்ற இந்திய விமான நிறுவனங்களுடன் ஒருங்கிணைந்து சிறப்பு மீட்பு விமானங்களை இயக்க ஏற்பாடு செய்யப்பட்டுள்ளது.

அமெரிக்கா-இஸ்ரேல் தாக்குதலால் ஈரான் பதிலடி கொடுத்ததால், துபாய் சர்வதேச விமான நிலையத்தில் வழக்கமான 1,200க்கும் மேற்பட்ட தினசரி விமானங்கள் மிகக் குறைவாகவே இயங்குகின்றன. சில நாட்களுக்கு முன் ஒரே நாளில் 20 விமானங்கள் மட்டுமே புறப்பட்டு வந்தன. எமிரேட்ஸ், எதிஹாட் போன்ற விமான நிறுவனங்கள் பெரும்பாலான சேவைகளை ரத்து செய்தன. இதனால், துபாயில் சிக்கிய இந்திய சுற்றுலாப் பயணிகள், தொழிலாளர்கள் உள்ளிட்டோர் பெரும் சிரமத்திற்கு ஆளாகியுள்ளனர்.

இந்நிலையில், மத்திய விமானப் போக்குவரத்து அமைச்சகம் உயர் மட்ட ஆலோசனைக் கூட்டம் நடத்தி, விமான நிறுவனங்களுக்கு தெளிவான அறிவுறுத்தல்கள் வழங்கியது. பயணிகளின் பாதுகாப்பு முதன்மையானது என வலியுறுத்தப்பட்டது. டிக்கெட் திரும்பப் பெறுதல், நேர மாற்றம், உதவிகள் ஆகியவற்றை வெளிப்படையாக வழங்குமாறு கூறப்பட்டது. வெளியுறவு அமைச்சகம், விமான நிலையங்கள் உட்பட அனைத்துத் தரப்பினருடனும் ஒருங்கிணைப்பு ஏற்படுத்தப்பட்டுள்ளது.

இதையும் படிங்க: ஒரு நாளைக்கு மட்டும் ரூ.7000 கோடி செலவு!! ஈரான் மீது அமெரிக்கா நடத்தும் போர்! அதிகரிக்கும் செலவீனம்!

இதன் பலனாக, துபாயிலிருந்து சிறப்பு விமானங்கள் இயக்கப்பட்டன. நேற்று காலை இண்டிகோ, ஏர் இந்தியா விமானங்கள் மூலம் பலர் பாதுகாப்பாக இந்தியா திரும்பினர். சென்னைக்கு 217 பேருடன் ஒரு விமானம் வந்தது. சவுதி அரேபியாவின் ஜெட்டாவிலிருந்து இண்டிகோ 10 சிறப்பு விமானங்கள் இயக்க திட்டமிடப்பட்டுள்ளது. மஸ்கட், மதீனா போன்ற இடங்களிலிருந்தும் வரையறுக்கப்பட்ட விமானங்கள் இயங்குகின்றன. தாக்குதல் அபாயம் குறையும் போது, மாற்று வான்வழிகளைப் பயன்படுத்தி சேவைகளை அதிகரிக்க திட்டமிடப்பட்டுள்ளது.

ஸ்பைஸ்ஜெட் நான்கு சிறப்பு விமானங்களை ஐக்கிய அரபு எமிரேட்சிலிருந்து இயக்கியது. இன்று மேலும் 58 விமானங்கள் (இண்டிகோ 30, ஏர் இந்தியா 23 உள்ளிட்டவை) திட்டமிடப்பட்டுள்ளன. பிரதமர் மோடி குவைத், ஓமன் தலைவர்களுடன் தொலைபேசியில் பேசி, இந்தியர்களின் பாதுகாப்பு குறித்து கவலை தெரிவித்தார்.

நிலைமை சீரடையும் வரை இந்த மீட்பு நடவடிக்கைகள் தொடரும். இது இந்தியர்களுக்கு பெரும் நம்பிக்கையை அளித்துள்ளது.

இதையும் படிங்க: பதற வைக்கும் ஈரான் ஆயுத கிடங்கு!! வீச வீச குறையாத குண்டு! குலை நடுங்கும் கொடிய ஆயுதங்கள்!