புகையிலை, பான் மசாலா மீது புதிய ‘செஸ்’ வரி.. புதிய மசோதா தாக்கல் செய்யும் நிதியமைச்சர்!

புகையிலை, புகையிலைப் பொருட்கள் மற்றும் பான் மசாலா ஆகியவற்றின் மீது புதிய 'செஸ்' வரியை விதிக்க மத்திய அரசு முன்னெடுப்பு எடுத்துள்ளது. இந்தத் திட்டத்தை முன்னெடுக்கும் வகையில், மத்திய நிதி அமைச்சர் நிர்மலா சீதாராமன் இன்று மக்களவையில் இதற்கான மசோதாவைத் தாக்கல் செய்யவுள்ளார். தேசியப் பாதுகாப்பு மற்றும் பொதுச் சுகாதாரத்திற்கான செலவினங்களைச் சந்திப்பதற்கான ஆதாரங்களை அதிகரிப்பதே இந்தச் சட்டத் திருத்தத்தின் பிரதான நோக்கம் என்று அறிவிக்கப்பட்டுள்ளது.

அண்டை நாடுகளில் நிலவும் பதட்டமான சூழ்நிலைக்கு மத்தியில், இந்தக் கட்டணம் மூலம் பாதுகாப்புத் துறைக்கு அதிக நிதிகளை ஒதுக்க மத்திய அரசுக்கு வழிவகுக்கும் என்று நிதி வட்டாரங்கள் எதிர்பார்க்கின்றன. 2017-ஆம் ஆண்டு ஜிஎஸ்டி நடைமுறைக்கு வந்தபோது, மாநிலங்களின் வருவாய் வளர்ச்சிக்காக, கார், புகையிலை, பான் மசாலா போன்ற தீங்கு விளைவிக்கும் பொருட்களின் மீது இழப்பீட்டு செஸ் விதிக்கப்பட்டது. கரோனா பரவல் காரணமாகக் கணக்கீடுகள் மாறியதால், இந்தச் செஸ் வரி மார்ச் 2026 வரை நீட்டிக்கப்பட்டுள்ளது.

தற்போதுள்ள இழப்பீட்டு செஸ் வரி விலக்கிக் கொள்ளப்படும் நாளிலிருந்து, இந்த இரண்டு தீங்கு விளைவிக்கும் பொருட்களின் பிரிவுகளின் மீது சுகாதாரம் மற்றும் பாதுகாப்புக் கட்டணம் என்ற பெயரில் புதிய செஸ் வரியை விதிக்க மத்திய அரசு திட்டமிட்டுள்ளது. மார்ச் 2026 வரை விதிக்கப்படக்கூடிய இழப்பீட்டு செஸ் வரி விலக்கிக் கொள்ளப்பட்டவுடன், உடனடியாகப் புதிய செஸ் வரி நடைமுறைக்கு வரும். "நுகர்வோருக்கான விலை மாறாமல் இருப்பதை உறுதி செய்வதே இதன் நோக்கம். இது கூடுதல் வருவாயை ஈட்டுவதற்கான நடவடிக்கை அல்ல," என்று மத்திய அரசு அதிகாரி மட்டத்தில் தெளிவுபடுத்தியுள்ளார்.

இதையும் படிங்க: சென்னையை கவரும் Wonderla..!! முதல்வர் ஸ்டாலின் திறந்து வைத்த உலகத் தர பொழுதுபோக்கு பூங்கா!

ஜிஎஸ்டி மறுசீரமைப்பு அறிவிக்கப்பட்டபோதே, இந்த இரண்டு பொருட்களின் மீது புதிய செஸ் வரி விதிக்கப்படும் என்று அரசு குறிப்பிட்டிருந்தது குறிப்பிடத்தக்கது. மத்திய அரசு இந்தப் புதிய மசோதாவை இந்தக் குளிர்காலக் கூட்டத் தொடரிலேயே நிறைவேற்றத் திட்டமிட்டுள்ளதாகத் தகவல்கள் வெளியாகியுள்ளன.

இதையும் படிங்க: இனி இது இல்லனா வாட்ஸ் அப் யூஸ் பண்ண முடியாது..!! மத்திய அரசு அதிரடி..!!