பாதிக்கப்படும் குழந்தைகள்! விரைவில் அமைதி கிடைக்கும்!! ஐநா சபையில் அதிபர் ட்ரம்ப் மனைவி உருக்கம்!!

நியூயார்க்: ஐக்கிய நாடுகள் சபை பாதுகாப்பு கவுன்சிலின் இந்த மாத தலைமைப் பொறுப்பை அமெரிக்கா ஏற்றுள்ள நிலையில், 'மோதலில் பாதிக்கப்படும் குழந்தைகள்' என்ற தலைப்பில் நேற்று முன்தினம் நடைபெற்ற சிறப்புக் கூட்டத்தில் அமெரிக்க அதிபர் டொனால்ட் டிரம்பின் மனைவி மெலானியா டிரம்ப் பங்கேற்று உரையாற்றினார். குழந்தைகள் நலனில் ஆழ்ந்த அக்கறை கொண்டவர் என அறியப்பட்ட மெலானியா, இந்தக் கூட்டத்தில் அனுமதிக்கப்பட்டு பேசியது உலக அரங்கில் கவனத்தை ஈர்த்துள்ளது.

மெலானியா தனது உரையில், "அமெரிக்கா உலகம் முழுதும் உள்ள அனைத்து குழந்தைகளுக்கும் ஆதரவாக உள்ளது. விரைவில் அவர்களுக்கு அமைதி கிடைக்கும் என்று நான் உறுதியாக நம்புகிறேன்" என்று உணர்ச்சிமயமாகத் தெரிவித்தார்.

 மேலும், "எல்லா சமூகங்களிலும் அறிவும் புரிதலும் முழுமையாக மதிக்கப்படும்போதுதான் நிலைத்த அமைதி வரும். அறிவும் ஞானமும் ஆளுகின்ற இடம்தான் அதிக அமைதியுடன் இருக்கும். உலகம் முழுதும் அமைதியை நிலைநாட்ட குழந்தைகள் வெற்றி பெற வேண்டும். அதற்கான வலிமையும் உறுதியும் குழந்தைகளுக்கு கிடைக்க வேண்டும்" என வலியுறுத்தினார்.

இதையும் படிங்க: விவசாய கடன் தள்ளுபடி… லஞ்சமில்லா நெல் கொள்முதல்.. தஞ்சையில் விஜய் மாஸ் வாக்குறுதி..!

இந்த உரை யூக்ரெயின், காசா, சூடான், மியான்மர் உள்ளிட்ட பல்வேறு மோதல் பகுதிகளில் பாதிக்கப்பட்ட குழந்தைகளின் நிலையை மனதில் கொண்டு ஆற்றப்பட்டதாக தெரிகிறது. மெலானியா டிரம்ப் தனது 'Be Best' முயற்சியின் மூலம் குழந்தைகளின் உடல், மன ஆரோக்கியம், கல்வி, பாதுகாப்பு ஆகியவற்றுக்கு எப்போதும் முன்னுரிமை அளித்து வருபவர். ஐ.நா. மேடையில் அவர் பேசியது, அமெரிக்காவின் மனிதநேய அணுகுமுறையை வெளிப்படுத்தியதாக பார்க்கப்படுகிறது.

கூட்டத்தில் பல நாடுகளின் பிரதிநிதிகள் கலந்துகொண்டனர். சில நாடுகள் மோதல்களை முடிவுக்குக் கொண்டுவருவதற்கான அழைப்பு விடுத்தன. மெலானியாவின் பேச்சு சமூக வலைதளங்களில் பெரும் வரவேற்பைப் பெற்றுள்ளது. பலர் "குழந்தைகளின் குரலாக மெலானியா பேசியது உண்மையானது" என பாராட்டியுள்ளனர். இந்த உரை உலக அமைதிக்கான முயற்சிகளில் குழந்தைகளின் பாதுகாப்பை மையமாகக் கொள்ள வேண்டும் என்பதை நினைவூட்டியுள்ளது.

அமெரிக்கா தற்போது பாதுகாப்பு கவுன்சில் தலைமையில் இருப்பதால், அடுத்த சில நாட்களில் மேலும் பல முக்கிய விவாதங்கள் நடைபெற உள்ளன. மெலானியாவின் இந்த உரை, போர் பாதிப்புகளால் துன்புறும் குழந்தைகளுக்கு உலக நாடுகள் ஒன்றிணைந்து உதவ வேண்டும் என்பதற்கு வலுவான செய்தியாக அமைந்துள்ளது.

இதையும் படிங்க: இந்தியாவுக்கு கச்சா எண்ணெய் சப்ளை செய்ய ரெடி..!! ரஷ்யா அதிரடி அறிவிப்பு..!!