இன்று முத்தமிழறிஞர் கலைஞர் கருணாநிதி அவர்களின் எட்டாவது நினைவுநாள். இந்த நாளை முன்னிட்டு திமுக தலைவர் மு.க.ஸ்டாலின் தனது உணர்வுகளை வெளிப்படுத்தியுள்ளார். கலைஞர் குறித்து அவர் பகிர்ந்துள்ள கருத்துகள், அந்த மாபெரும் தலைவரின் வாழ்க்கைப் பயணத்தை முழுமையாக நினைவுபடுத்துகின்றன. எண்பது ஆண்டுகாலப் பொதுவாழ்க்கைக்குச் சொந்தக்காரர் என்று கலைஞரை வர்ணித்துள்ள ஸ்டாலின், அரைநூற்றாண்டு காலம் ஒரு பேரியக்கத்தின் தலைவராக அவர் திகழ்ந்ததை எடுத்துக்காட்டியுள்ளார்.

ஐந்து முறை தமிழ்நாட்டின் முதலமைச்சராகப் பொறுப்பேற்றவர், 13 முறை சட்டமன்ற உறுப்பினராக மக்கள் குரலாக இருந்தவர் என்றும் குறிப்பிட்டுள்ளார். தமிழ்நாட்டின் முதலமைச்சராக அதிக ஆண்டுகள் பணியாற்றிய பெருமை கலைஞருக்கு உண்டு என்பதை வலியுறுத்திய ஸ்டாலின், அரசின் எண்ணற்ற கோப்புகளில் கையெழுத்திட்டு தமிழ்நாட்டின் தலையெழுத்தை மாற்றியவர் என்றும் நவீனத் தமிழ்நாட்டை உருவாக்கிய சிற்பி என்றும் பாராட்டியுள்ளார்.அரசியலும் ஆட்சியும், கலையும் இலக்கியமும், திரையும் நாடகமும், சின்னத்திரையும் சமூக வலைத்தளமும் என அனைத்துத் தளங்களிலும் கோலோச்சிய நிரந்தரத் தமிழ் ஆளுமையாக கலைஞர் விளங்கினார் என்று ஸ்டாலின் தெரிவித்துள்ளார்.

கருப்புக் கண்ணாடியும் கரகரத்த குரலுமாய் நம் நினைவுகளில் நிலைத்திருக்கும் தலைவர் கலைஞர், உடலால் விலகி நம் உள்ளங்களில் நிரந்தரமென நிறைந்த நாள் இன்று என்றும் உணர்ச்சிப்பூர்வமாகக் குறிப்பிட்டுள்ளார். அவர்தான் நமக்கு எல்லாம்; அவரின்றி நாம் இல்லை என்ற ஆழமான உணர்வை ஸ்டாலின் இந்த நினைவுநாளில் வெளிப்படுத்தியுள்ளார்.

இதையும் படிங்க: என்னது WASTE- ஆ..? திமுக நடத்தியதே உதார் ஆட்சி..!! வெளுத்துவிட்ட தவெக..!!

இந்த நினைவுநாளை முன்னிட்டு சென்னையில் அமைதிப் பேரணி நடைபெற்றது. ஓமந்தூரார் அரசினர் தோட்ட வளாகத்தில் அமைந்துள்ள கலைஞர் சிலையருகே தொடங்கிய அந்தப் பேரணி மெரினாவில் உள்ள நினைவிடம் வரை சென்றது. கருப்புச் சட்டையணிந்த தொண்டர்கள் அமைதியாக நடந்து சென்ற காட்சி, கலைஞரின் வாழ்க்கைப் பாதையை நினைவுபடுத்தியது. நினைவிடம் வண்ண மலர்களால் அலங்கரிக்கப்பட்டிருந்தது. அங்கு மலர்வளையங்கள் வைக்கப்பட்டு அஞ்சலி செலுத்தப்பட்டது. இந்த நிகழ்வு வெறும் சடங்காக இல்லாமல், கலைஞரின் கொள்கைகளைத் தொடர்ந்து முன்னெடுத்துச் செல்லும் உறுதியாக அமைந்தது.கலைஞரின் வாழ்க்கை ஒரு போராட்டத்தின் தொடர்ச்சியாகவே இருந்தது என்பதை ஸ்டாலின் நினைவுகூர்ந்துள்ளார். 

இதையும் படிங்க: #BREAKING: உதயநிதி ஸ்டாலின் ARREST..! தஞ்சை போலீஸ் அதிரடி நடவடிக்கை..!!