சென்னை: முன்னாள் அமைச்சரும், தற்போதைய எதிர்க்கட்சித் தலைவருமான கே.என். நேருவுக்கு தொடர்புடைய இடங்களில் லஞ்ச ஒழிப்புத்துறை சோதனை நடத்தப்பட்ட நிலையில், நகராட்சி நிர்வாகம் மற்றும் குடிநீர் வழங்கல் துறையில் முறைகேடு நடந்ததாகக் கூறப்படும் வழக்கின் எஃப்.ஐ.ஆர் விவரங்கள் வெளியாகியுள்ளன. இதில் 13 பேர் மீது 14 பிரிவுகளின் கீழ் வழக்குப்பதிவு செய்யப்பட்டுள்ளதாக கூறப்படுவது அரசியல் வட்டாரங்களில் பரபரப்பை ஏற்படுத்தியுள்ளது.

கே.என். நேரு, தி.மு.க. ஆட்சியில் நகராட்சி நிர்வாகம் மற்றும் குடிநீர் வழங்கல் துறை அமைச்சராக இருந்தபோது பல்வேறு பணிகளுக்கான டெண்டர்கள் ஒதுக்கப்பட்டன. அந்த டெண்டர் நடைமுறைகளில் முறைகேடுகள் நடந்ததாக கிடைத்த புகார்களின் அடிப்படையில் வழக்குப்பதிவு செய்யப்பட்டுள்ளதாக லஞ்ச ஒழிப்புத்துறை தரப்பில் தெரிவிக்கப்பட்டுள்ளது.

இந்த வழக்கில் சுமார் ரூ.1,020 கோடி மதிப்பிலான முறைகேடு தொடர்பான குற்றச்சாட்டுகள் இடம்பெற்றுள்ளதாக எஃப்.ஐ.ஆர் தகவல்கள் தெரிவிப்பதாக கூறப்படுகிறது. ஆனால், இந்த தொகை தொடர்பான குற்றச்சாட்டுகள் நீதிமன்ற விசாரணையில் நிரூபிக்கப்பட வேண்டியவை என்பது குறிப்பிடத்தக்கது.

இதையும் படிங்க: நேருவை குறிவைக்கிறதா தவெக! 19 இடங்களில் நடக்கும் சோதனை! கனிமொழி எம்.பி காட்டமான பதிலடி!

இதன் தொடர்ச்சியாக சென்னை, திருச்சி, கோவை உள்ளிட்ட பல்வேறு இடங்களில் லஞ்ச ஒழிப்புத்துறை அதிகாரிகள் சோதனை மேற்கொண்டனர். கே.என். நேருவுக்கு தொடர்புடைய வீடுகள் மற்றும் அவரது சகோதரர் ரவிச்சந்திரனுடன் தொடர்புடையதாக கூறப்படும் வீடு, அலுவலகங்களிலும் சோதனை நடைபெற்றதாக தெரிவிக்கப்பட்டுள்ளது.

சோதனையின் முடிவில் 241 ஆவணங்கள் மற்றும் மின்னணு ஆதாரங்கள் கைப்பற்றப்பட்டதாக லஞ்ச ஒழிப்புத்துறை தெரிவித்துள்ளதாக தகவல் வெளியாகியுள்ளது. கைப்பற்றப்பட்ட ஆவணங்கள் மற்றும் மின்னணு ஆதாரங்கள் குறித்து அதிகாரிகள் தொடர்ந்து ஆய்வு செய்து வருவதாக கூறப்படுகிறது.

இதற்கிடையே, தன் மீதான சோதனை அரசியல் பழிவாங்கும் நடவடிக்கை என கே.என். நேரு குற்றம்சாட்டியுள்ளார். தனது வீட்டில் நடைபெற்ற சோதனையில் எதுவும் கிடைக்கவில்லை என்றும், விசாரணைக்கு முழு ஒத்துழைப்பு வழங்கியதாகவும் அவர் தெரிவித்துள்ளார். தான் எந்த தவறும் செய்யவில்லை என்றும், தேவையான சட்ட நடவடிக்கைகளை நீதிமன்றத்தில் எதிர்கொள்வோம் என்றும் கூறியுள்ளார்.

இந்த நிலையில், எஃப்.ஐ.ஆரில் இடம்பெற்றுள்ள குற்றச்சாட்டுகள் மற்றும் சோதனையில் கைப்பற்றப்பட்டதாக கூறப்படும் ஆவணங்கள் தொடர்பான விசாரணை அடுத்தகட்டத்தில் முக்கியத்துவம் பெறும் என எதிர்பார்க்கப்படுகிறது.

இதையும் படிங்க: “பிக் பாஸ் போல சட்டமன்றம்!” சீமானின் விமர்சனத்துக்கு அமைச்சர் ராஜ்மோகன் பதில்! பரபரப்பு பேச்சு!