காவிரியின் குறுக்கே மேகதாதுவில் புதிய அணை கட்டும் ஆரம்பகட்ட கட்டுமானப் பணிகளைக் கர்நாடக அரசு தீவிரமாகத் தொடங்கியுள்ளதாக, அங்கு நேரில் சென்று கள ஆய்வு நடத்திய தமிழக அனைத்து விவசாயிகள் சங்கங்களின் ஒருங்கிணைப்புக் குழுத் தலைவர் பி.ஆர். பாண்டியன் மிகவும் அதிர்ச்சிகரமான தகவலை வெளியிட்டுள்ளார்.

காவிரி நதிநீர் உரிமை மற்றும் மேகதாது அணை விவகாரம் தொடர்பாகத் தமிழக அரசியல் மற்றும் விவசாய வட்டாரங்களில் தொடர்ந்து விவாதங்கள் நீடித்து வரும் நிலையில், பி.ஆர். பாண்டியன் தலைமையிலான விவசாய சங்கப் பிரதிநிதிகள் குழுவினர் கர்நாடகாவின் மேகதாது பகுதிக்கு நேரில் சென்று ரகசியமாகக் கள ஆய்வு மேற்கொண்டனர். அங்கு நிலவும் தற்போதைய சூழல் குறித்துச் செய்தியாளர்களிடம் பேசிய பி.ஆர். பாண்டியன், தமிழக எல்லையையொட்டியுள்ள கர்நாடகப் பகுதிகளில் அணை கட்டுவதற்கான பூர்வாங்க வேலைகள் மிகத் துரிதமாக நடந்து வருவதாகக் குற்றம் சாட்டினார்.

மேகதாது பகுதியில் அணை கட்டுமானப் பணிகள் நடப்பது அப்பட்டமாக அடையாளப்படுத்தப்பட்டுள்ளதாகக் குறிப்பிட்ட அவர், "நாங்கள் மேகதாது பகுதிக்கு நேரில் சென்று பார்வையிட்டபோது, அங்கு அணை கட்டுவதற்காகப் படிக்கட்டுகள் அமைக்கப்பட்டு, இரும்பு கம்பிகள் நடப்பட்டு, கட்டுமான வேலைகள் முழு வீச்சில் தொடங்கி நடைபெற்று வருவது துல்லியமாகத் தெரியவந்துள்ளது. உச்ச நீதிமன்றத் தீர்ப்புகளையும், நதிநீர் மேலாண்மை ஆணையத்தின் விதிகளையும் மதிக்காமல் கர்நாடக அரசு தன்னிச்சையாக இந்த அசுரத்தனமான பணிகளை மேற்கொண்டு வருகிறது" என்று ஆதங்கத்துடன் தெரிவித்தார்.

இதையும் படிங்க: ராகுல் காந்தி தலையிட வேண்டும்: கர்நாடக முதல்வர் சிவக்குமாரை தடுக்க அன்புமணி ராமதாஸ் கோரிக்கை!

மேலும், இந்த விவகாரத்தில் தமிழக அரசு உடனடியாகத் தலையிட்டு உரிய சட்ட உத்திகள் மூலம் கட்டுமானப் பணிகளைத் தடுத்து நிறுத்த வேண்டும் என்றும், அண்டை மாநிலத்தின் இந்த அத்துமீறலுக்கு எதிராக ஒட்டுமொத்தத் தமிழகமும், விவசாய அமைப்புகளும் ஒன்றிணைந்து குரல் கொடுக்க வேண்டும் என்றும் அவர் கேட்டுக்கொண்டார். மேகதாதுவில் அணை அமைக்கப்பட்டால் தமிழகத்தின் 25 மாவட்டங்கள் பாலைவனமாகும் அபாயம் உள்ளதாக ஏற்கனவே எச்சரிக்கப்பட்டு வரும் நிலையில், பி.ஆர். பாண்டியன் நேரில் சென்று பார்த்து வெளியிட்டுள்ள இந்த அதிர்ச்சித் தகவல், டெல்டா மாவட்ட விவசாயிகள் மத்தியிலும் சமூக ஊடகங்களிலும் தற்போது பெரும் பரபரப்பையும் கொந்தளிப்பையும் ஏற்படுத்தியுள்ளது.

இதையும் படிங்க: அந்தமானுக்கு ஒரு நீதி; கர்நாடகாவுக்கு ஒரு நீதியா?: ராகுல் காந்திக்கு அன்புமணி கேள்வி?